«Մենք Հայաստանին այլընտրանք ենք առաջարկում». «Ադեկվադ» ՔԿ-ի ղեկավարը հարցազրույց է տվել Free West Media-ին

«Ադեկվադ» նախաձեռնության հիման վրա ստեղծված նույնանուն քաղաքական կուսակցության ղեկավար Արթուր Դանիելյանը հարցազրույց է տվել Free West Media-ին, որի ժամանակ խոսել է իր ծրագրերի և գաղափարների մասին:

Նրա խոսքով՝ «Ադեկվադ» նախաձեռնության հիման վրա քաղաքական կուսակցություն ստեղծելու անհրաժեշտությունը թելադրված էր 2018թ.-ի գարնանն իշխանության եկած նոր վարչակարգի կողմից, քանի որ հեղափոխությունից հետո այս մեկ տարվա ընթացքում երկրում հանցավորության կտրուկ աճ է գրանցվել, ավանդական արժեքներն անդադար հարձակումների են ենթարկվում, իսկ ընդդիմադիր լրատվամիջոցներն աննախադեպ ճնշումների են ենթարկվում ոստիկանության և հատուկ ծառայությունների կողմից, և իրենց՝ քաղաքական կուսակցություն հիմնելը կապված է Ադրբեջանի հետ չլուծված հակամարտության ֆոնին ազգային անվտանգությանը սպառնացող այս վտանգներով:

Ի պատասխան լրագրողի այն հարցին, թե արդյոք ճիշտ է եվրոպացիների տպավորությունն այն մասին, թե ՀՀ վարչապետ Նիկոլ Փաշինյանն Իտալիայի ներքին գործերի նախարար Մատտեո Սալվինիի ոճի պոպուլիստ է, Դանիելյանը նկատել է, որ Փաշինյանը հաճախ հիշատակում է Մահաթմա Գանդիին և Նելսոն Մանդելային՝ որպես իրեն օրինակ ծառայած գործիչների՝ միաժամանակ նշելով, որ տվյալ գործիչները ոչնչացրել են սեփական երկիրը և գլոբալիստների պաշտամունքի առարկան են:

«Փաշինյանի կառավարությունը և ինքն անձամբ պարտադիր պատվաստումներ են առաջ քաշում, նրա օտարերկրյա հովանավորները մեծացրել են Հայաստանում ամեն տեսակի հակաբեղմնավորման ծրագրերի ֆինանսական աջակցությունը և շուտով կփորձեն վավերացնել Ստամբուլի կոնվենցիան, շարունակել ԼԳԲՏ համայնքի պաշտպանությունը: Փաշինյանը մեծապես կողմ է Եվրամիության և միջազգային գլոբալիստական կազմակերպությունների գաղափարներին, հետևաբար այս երկուսը (Փաշինյանը և Սալվինին – Tert.am) բոլորովին նման չեն միմյանց»,- ասել է «Ադեկվադ»-ի առաջնորդը՝ հավելելով, որ Փաշինյանն «օտարերկրյա գործակալների հետ համագործակցող հանցագործ է», որ իշխանության է եկել Հայաստանի օրինական կառավարությունը տապալելու համար, և այժմ իր հովանավորներին փոխհատուցելու համար գլոբալիստական օրակարգ է առաջ մղում, որը խարխլում է մեր պետականության հիմքերն ու ազգային ինքնությունը:

Խոսելով ղարաբաղյան հիմնախնդրի կարգավորման հեռանկարներից՝ Արթուր Դանիելյանը նշել է, որ Ադրբեջանի ներկայիս հռետորաբանությունը երկկողմ հարաբերությունների կարգավորման առումով դրական ակնկալիքներ չի ներշնչում, սակայն, չնայած ներկա հանգամանքներին, հույս է հայտնել, որ մի օր խաղաղություն կհաստատվի:

Նա ընդգծել է, որ «սիրո և համերաշխության» քարոզի իրական նպատակն այնպես անելն է, որ հայ երիտասարդները հրաժարվեն իրենց հայրենիքին ծառայելուց, ինչի մասին է վկայում նաև Հայաստանում հայրենասիրական ծրագրերի դադարեցումը:

«Նրանց համար միևնույն է, որ Սիրիան, Իրաքը, Լիբիան և շատ այլ երկրներ կործանվեցին հենց այդ նույն կարգախոսի ներքո»,- հավելել է Դանիելյանը:

Լրագրողի այն հարցին, թե ինչպես է «Ադեկվադ»-ը հակազդում ԼԳԲՏ լոբբիստական կազմակերպությունների և արևմտյան արժեհամակարգի սպառնալիքներին, զրուցակիցն ասել է, որ այդ մարտահրավերներին հակազդելու իրենց հիմնական ռազմավարությունը կապված է նման արժեքների և քարոզչության կեղծավորությունը ցույց տալու հետ:

«Նրանք մարդու իրավունքները որպես դրոշակ են օգտագործում, թվացյալ կերպով պայքարում են հանուն խոսքի ազատության, սակայն ամեն կերպ լռեցնում են ընդդիմության ձայնը: Նրանց կեղծավորությունը ցույց տալը մեր հիմնական զենքն է»,- նշել է նա՝ ընդգծելով, որ նախաձեռնության անդամները գործունեության սկզբից ի վեր հարձակումների են ենթարկվել, որոնց համար ոչ ոք պատասխանատվության չի ենթարկվել, սակայն հարձակումներն ուղիղ եթերով հեռարձակվել են Facebook-ում և YouTube-ում:

«Մենք պետք է պատրաստ լինենք մինչև վերջ գնալու: Անկախ նրանից, թե որքան մեծ հարվածներ կհասցնեն մեզ, մենք երբեք հետ չենք կանգնի մեր արժեքներից, երբեք ներողություն չենք խնդրի հայրենասեր լինելու, մեր ինքնությունը պահպանելու ցանկության համար»,- հայտարարել է «Ադեկվադ»-ի ղեկավարը:

Դանիելյանը դեմ է արտահայտվել Եվրամիությանը՝ պարզաբանելով, որ այն Հայաստանում կառավարությունը տապալելու նպատակով «ահաբեկիչների է աջակցել»՝ ֆինանսավորելով մարդու իրավունքների ակտիվիստների, լրատվամիջոցների, քարոզիչների և այլն, սակայն մյուս կողմից նշել է, որ նախաձեռնության անդամները կողմ են Եվրամիության առանձին երկրների և Հայաստանի միջև երկկողմ հարաբերությունների զարգացմանը:

Զրույցի վերջում լրագրողը հարցրել է, թե ինչ հեռանկար են առաջարկում Արթուր Դանիելյանն ու իր կուսակցությունը Հայաստանի համար, և թե ինչպիսին պետք է լինի մեր երկիրը լուսավոր ապագայում:

«Նախ և առաջ մենք պետք է անհրաժեշտ տեղեկատվական և քաղաքական ենթակառուցվածքներ ստեղծենք, որպեսզի կարողանանք արդյունավետ կերպով պայքարել պոստմոդեռնիստական տոտալիտարիզմի քարոզչական վիթխարի «հրետանու» դեմ: Մեր սեփական փորձը ցույց է տալիս, որ մենք կարող ենք հաջողությամբ կռվել և անգամ հաղթել, չնայած մեր ռեսուրսները հարյուրավոր անգամ քիչ են, քան թշնամունը: Նրանք մեզնից մեծ և ուժեղ են, նրանք ունեն տեխնոլոգիաներ, սակայն մենք մի շատ կարևոր առավելություն ունենք՝ մենք ճանաչում ենք մեր ժողովրդին: Նրանք զանգվածների կողմից ստեղծված արտադրանքներ են օգտագործում, ինչպիսիք Հոլիվուդն ու փոփ մշակույթն են, որոնց մենք հակազդում ենք հստակ այլընտրանքներով: Ինչպես «Այլընտրանք Գերմանիայի համար» կուսակցությունը, մենք Հայաստանում այլընտրանք ենք առաջարկում՝ ոչ միայն քաղաքական, այլ նաև մշակութային և քաղաքակրթական: Ես անկեղծորեն կարծում եմ, որ այլընտրանքը Հայաստանի համար ոչ միայն կենսունակ է, այլև կարող է վարակիչ դառնալ տարածաշրջանի համար: Հայաստանում ստեղծված ճգնաժամը շատ նման է Վրաստանում, Ուկրաինայում, Բալկանյան երկրներում և այլուր տիրող ճգնաժամին: Եթե մենք կռվելու պատրաստակամություն ցուցաբերենք, թշնամին պարտության կմատնվի: Ամենակարևոր բանը կամքն է՝ խոհեմ, ողջախոհ, խիզախ և արդար լինելու կամքը»,- եզրափակել է «Ադեկվադ»-ի ղեկավարը: