Մոսկվայում ձեռք բերված պայմանավորվածությունը խախտելը ապտակ է ՌԴ-ին, որը որևէ պարագայում չպետք է ներվի. Վարդան Ոսկանյան

Ադրբեջանն ուներ շատ պատճառներ չկատարելու Մոսկվայում արտգործնախարարների մակարդակով ձեռքբերված հրադադարի մասին պայմանավորվածությունը, Tert.am-ի հետ զրույցում ասաց իրանագետ Վարդան Ոսկանյանը՝ նկատելով, որ այս անգամ իրական պատճառն այն է, որ Ադրբեջանի ներսում հասարակական սպասումներն են մեծ, Բաքվի բռնապետն առաջացրել է շատ մեծ սպասումներ, փորձում է դրանք արդարացնել:

«Խոսք էր գնում տարածքներ «ազատագրելու», ամբողջ Արցախը «վերադարձնելու», ադրբեջանական բանակի հաղթանակի և այլ առասպելների մասին, որոնք սերմանվել էին հասարակության մեջ և հետևաբար ակնհայտ էր, որ տվյալ պահի իրավիճակն այդ սպասումները չէր արդարացնում, և Իլհամ Ալիևը երկրի ներսում կանգնում էր դժվարությունների առջև»,- ասաց նա:

Ըստ Վարդան Ոսկանյանի` Ալիևին դժվարություններ են սպասվում` հաշվի առնելով երկրում սկիզբ առնող ներիշխանական պայքարը: «Այդ պայքարի շրջանակներում մասնակիցների շրջանական էլ չափազանց ուշագրավ է. դրանց մեջ կան սկսած շատ ավելի պրոէրդողանական ուժերից, վերջացրած շիայական իրանամետ ուժերով և այլ խմբերով: Այս պահին հրադադարի ռեժիմը չպահպանելով փորձ է արվում ավելի շատ նվաճումների հասնել: Այլ հարց է, թե ինչքանով դա կհաջողվի»,- ասաց նա:

Հայկական կողմի համար, նրա խոսքով, ավելի լավ կլինի, որ Ադրբեջանում ներքաղաքական կյանքի ապակայունացված վիճակը որքան հնարավոր է երկար տևի, որը կարող է բերել Ադրբեջանի վերաձևափոխմանը: «Ադրբեջանում տեղաբնիկ ժողովուրդներ կան, որոնք այլ պահանջներով են հանդես գալիս: Խոսքը վերաբերում է թալիշներին և լեզգիներին: Լավագույն սցենարը կլինի այս ներքաղաքական պայքարի արդյունքում պետության վերաձևակերպումը»,- ասաց նա:

Վարդան Ոսկանյանը նաև նկատեց, որ այս իրավիճակում վատթարագույնն սցենարը կարող է լինել, երբ այս օրերին Թուրքիայի ջանքերով Ադրբեջան բերված զինված ահաբեկչական խմբավորումները «հասնեն Բաքու» և այստեղ որոշում կայացնողների մակարդակում սկսեն հանդես գալ: «Այդ ռիսկն այս պահին շատ մեծ չէ, բայց դա բացառել էլ չի կարելի»,- ասաց նա:

Նրա նկատառմամբ` պետք է անպայման հաշվի առնել, որ այս պահի դրությամբ Ադրբեջանում չկան ուժեր, որոնք հակահայկական դիրքորոշում չունեն, նրանք կարծես թե միմյանց հետ մրցում են հակահայկականության առումով: «Հակահայկականությունը հիմնականում դարձել է այն խաղաքարտը, որը խաղարկվում է Ադրբեջանի ներսում իշխանության հասնելու համար»,- ասաց նա:

Մոսկվայում ձեռք բերված հրադադարի մասին պայմանավորվածությունը խախտելով, նրա խոսքով, Ադրբեջանը շատ լուրջ խաղ է խաղում: «Իմիջային շատ մեծ հարված է հասցվել Ադրբեջան հորջորջվող այդ արհեստածին կազմակերպությանը: Բաքվի բռնապետը փորձել է տարիներ շարունակ Ադրբեջանի համար ստեղծել «Եվրոպան Ասիայում», մահեդական աշխարհի աշխարհիկ պետության կերպարը, որտեղ զարգանում են եվրոպական երևույթները, բայց իրականության մեջ ահաբեկիչների ներկայությունը հօդս ցնդեցրեց այդ կեղծ պատկերը»,- ասաց նա:

Երկրորդ իմիջային հարվածը, ըստ նրա, հիմա է Ադրբեջանը ստանում` խախտելով Մոսկվայում տված իր խոստումը: «Միջազգային հարաբերություններում ուխտադրուժությունն անընդունելի է: Ռուսաստանն այս տարածաշրջանում կենսական նշանակություն ունեցող պետություն է, և այնտեղ ձեռքբերված պայմանավորվածությունը խախտելը ապտակ է Ռուսաստանի Դաշնությանը, որը որևէ պարագայում չպետք է ներվի: Ադրբեջանը խաթարեց Ռուսաստանի միջնորդական առաքելություն»,- ասաց նա:

Ըստ Վարդան Ոսկանյանի` հրադադար հաստատելու հարցում իրենց ջանքերն էին գործադրում նաև ԵԱՀԿ Մինսկի խումբը համանախագահող մնացած երկրները, հետևաբար միջազգային հանրությունն անտարբեր չի մնա նման վերաբերմունքի նկատմամբ:

Անդրադառնալով այս օրերին Ղարաբաղում տեղի ունեցող ռազմական գործողությունների վերաբերյալ հարևան Իրանում եղած տրամադրություններին` Վարդան Ոսկանյանը նշեց, որ այս երկրում իշխանական վերախաղը կազմված է մի քանի շերտերից, որոնք արտաքին աշխարհում չնայած հանդես են գալիս միասնական դիրքորոշումով, ներսում որոշակի տարակարծություններ ունենում են:

«Մի բան ակնհայտ է, որ Իրանում որոշում կայացնողների մի հատվածը, որն առաջնորդվում է երկրի շահերով` չտրվելով գաղափարախոսական պարտադրանքներին` Ադրբեջանը համարում է սպառնալիք: Հաշվի է առնվում Բաքվի այն ձգտումները, որոնք նա ունի Իրանի հյուսային թյուրքախոս նահանգների` հիմնականում Ատրպատականի նկատմամբ: Իրանը նաև շիայական գաղափարախոսության հիման վրա ստեղծված պետական համակարգ է, իսկ Ադրբեջանում գերակշռում են շիա դավանող բնակչությունը: Դրա համար էլ իրանցիներն այստեղ աշխատում են բավական նուրբ ձևով` հիմնականում պահելով բալանսավորված դիրքորոշում, բայց նաև նկատի ունենալով նույն Ադրբեջանում իշխանության համար հնարավոր պայքարը, որտեղ Իրանը կուզենար մասնակցություն ունենալ իր գործիչների` շիայական խմբերի տեսքով, որոնք Իլհամ Ալիևի համար բավականին հզոր ընդդիմություն են: Իրանցիները փորձում են դուռ բաց թողնել, որ հետագայում Ադրբեջանի ներքաղաքական այդ պայքարում իրենց մասնակցությունն ունենան»,- ասաց նա` հիշատակելով, որ այդ ուժերն են հանդես գալիս հակահայկական դիրքերից:


Հռիփսիմե Հովհաննիսյան