«Ռուսները միայն այդ լեզուն են հասկանում». Լեհաստանում կոչ են արել Ռուսաստանի հետ սկսել խոսել պատերազմի լեզվով

Լեհաստանի Սեյմի (խորհրդարան) միջազգային հարցերի հանձնաժողովի փոխնախագահ Արկադիուշ Մուլյարչիկը Interia հրատարակության հետ զրույցում հայտարարել է, որ «Ռուսաստանը փորձում է Լեհաստանի ամրությունը»: Այս մասին գրում է «ՌԻԱ Նովոստի» գործակալությունը:

Այսպես նա մեկնաբանել է անցանկալի կազմակերպության գործունեությանը մասնակցության հոդվածով քրեական գործով «Բաց Ռուսաստան» կազմակերպության նախկին ղեկավար Անդրեյ Պիվովարովի կալանավորումը:

Նրա կարծիքով՝ Մոսկվան ձգտում է սրել հակամարտությունը Վարշավայի հետ: Ի պատասխան՝ լեհերը կարող են անել միայն մեկ բան՝ երկիրը պատշաճ կերպով պատրաստել ռազմական ոլորտում, ասել է քաղաքական գործիչը:

«Մենք պետք է արձագանքենք, զինվենք, աճեցնենք բանակի հնարավորությունները: Սա է գլխավորը: Ռուսները, ճիշտն ասած, միայն այդ լեզուն են հասկանում»,-ասել է Մուլյարչիկը:

Նա հավելել է, որ Լեհաստանը չպետք է ամբողջովին ապավինի իր արևմտյան դաշնակիցներին: Նա ուշադրություն է հրավիրել Գերմանիայի «հակասական» քաղաքականության վրա, որն աջակցում է ռուսական «Հյուսիսային հոսք 2» գազատարի կառուցմանը:

Ինչպես ավելի վաղ տեղեկացրել էր Tert.am-ը, «Բաց Ռուսաստան» ընդդիմադիր միավորման նախկին տնօրեն Անդրեյ Պիվովարովը բերման է ենթարկվել Սանկտ Պետերբուրգի «Պուլկովո» օդանավակայանից: Նրան ձերբակալելու համար իրավապահները կանգնեցրել են ինքնաթիռը, որը պատրաստվում էր թռիչքի: Ավելի ուշ հայտնի է դարձել, որ  Պիվովարովը հետախուզվում է: Նրան բերման են ենթարկել Սանկտ Պետերբուրգի քննչական կոմիտեի գլխավոր քննչական վարչություն: Նա ձերբակալվել է ՌԴ քրեական օրենսգրքի 284.1. հոդվածի մեղադրանքով (Անցանկալի կազմակերպության գործունեություն իրականացնելը):