Հյուսիսային Կորեան հրապարակել է նոր սահմանադրությունը, որտեղ ճանաչվում է երկու Կորեաների առկայությունը

Հյուսիսային Կորեան 2024 թվականի փոփոխություններից հետո առաջին անգամ «Նենարա» («Իմ երկիրը») պետական տեղեկատվական պորտալում հրապարակել է Սահմանադրության թարմացված տեքստը, որում Հարավային Կորեան ճանաչվում է որպես առանձին պետություն, որը հարավում սահմանակից է Հյուսիսային Կորեային, հետևում է փաստաթղթից, որին ծանոթացել է ՌԻԱ Նովոստի-ն:

«Կորեայի Ժողովրդադեմոկրատական Հանրապետության տարածքը ներառում է այն տարածքը, որը հյուսիսում սահմանակից է Չինաստանի Ժողովրդական Հանրապետությանը և Ռուսաստանի Դաշնությանը, իսկ հարավում՝ Կորեայի Հանրապետությանը, ինչպես նաև դրանց հիման վրա սահմանված տարածքային ջրերը և օդային տարածքը», - ասված է Սահմանադրության երկրորդ հոդվածում:

Ի տարբերություն Մայր օրենքի նախկին խմբագրության, որը դրույթներ էր պարունակում Կորեական թերակղզու միավորման մասին, Հյուսիսային Կորեայի թարմացված Սահմանադրությունը Կորեայի Հանրապետությունն ուղղակիորեն անվանում է հարևան պետություն: Ընդ որում, ցամաքային և ծովային սահմանների կոնկրետ գծերը փաստաթղթում սահմանված չեն:

Հրապարակված տեքստում բացակայում են Կորեական թերակղզու միավորման մասին նախկին դրույթները: Միևնույն ժամանակ, փաստաթղթում չկան ձևակերպումներ, որոնք Հարավային Կորեան ուղղակիորեն սահմանում են որպես «թիվ մեկ թշնամական պետություն» կամ «անփոփոխ գլխավոր թշնամի»:

Սահմանադրությունը նաև ամրագրում է Հյուսիսային Կորեայի պետական գործերի նախագահի լիազորությունները երկրի միջուկային ուժերը ղեկավարելու հարցում: 89-րդ հոդվածի համաձայն՝ նա զինված ուժերի գերագույն գլխավոր հրամանատարն է և կարող է միջուկային ուժերի կիրառման լիազորությունները պատվիրակել դրանց կառավարման պետական մարմնին:

56-րդ հոդվածում Հյուսիսային Կորեան սահմանվում է որպես միջուկային զենք ունեցող պատասխանատու պետություն, որը զարգացնում է միջուկային սպառազինությունները՝ իր գոյությունն ու զարգացումն ապահովելու, պատերազմը զսպելու և տարածաշրջանային ու միջազգային խաղաղությունն ու կայունությունը պաշտպանելու համար:

2023 թվականի վերջին Կիմ Չեն Ընը միջկորեական հարաբերությունները սահմանեց որպես պատերազմական վիճակում գտնվող երկու թշնամական պետությունների հարաբերություններ: 2024 թվականի հունվարին Գերագույն ժողովրդական ժողովի նստաշրջանում նա կարգադրեց Սահմանադրությունից հանել Կորեական թերակղզու միավորման հետ կապված դրույթները: Դրանից հետո՝ 2024 թվականի մարտին, «Նենարա» պորտալում Սահմանադրության բաժինը դարձավ անհասանելի դիտման համար: