«Ուզում եմ որդիս լավ մարդ դառնա». Նարեկ Բավեյանը հայր է դարձել

Երգիչ Նարեկ Բավեյանը՝  նույն ինքը «Դոմինո» սիթքոմի Նորիկը, հայր է դարձել: Որդին` Մարկը, ծնվել է երեկ երեկոյան: Tert.am Youth-ը զրուցել է Նարեկի հետ՝ ստեղծագործական նորությունների և անձնական կյանքի փոփոխությունների մասին։

-Ի՞նչ փոխեց Ձեր կյանքում «Դոմինո» սիթքոմը:

-Շատ բան փոխեց։ Մասնագիտական առումով դրական էր այնքանով, որ այն ավելի լայն ճանաչում տվեց ինձ: Բոլորի դեպքում էլ այդպես է, սիթքոմը հնարավորություն է տալիս, որ ավելի լայն զանգվածներում ճանաչելի լինես ու մի քիչ էլ սիրվես: Մի կողմ դնելով հայտնի լինելն ու սիթքոմի վարկանիշները ասեմ, որ աշխատանքս ավելի բազմազան է դարձել, միօրինակությունից դուրս:

-Ինչպիսի՞ հատկանիշներ նկատեցիք, որ նախկինում չէր դրսևորվել:
-Գուցե հումորիս զգացումն ավելի սրվեց…

-Արդյո՞ք սցենարը միշտ է, որ Ձեր սրտով է լինում:
-Միշտ չէ, որ սրտովս է, բայց դա իմ գործը չէ: Եթե առավել մասնագիտորեն այդ հարցին նայենք, ապա սցենարի վրա աշխատում է պրոֆեսիոնալ թիմ, որը վերահսկվում է պրոդյուսերների կողմից և մինչ սցենարը մեզ կհասնի այն արդեն բազմիցս աչքի անցկացված ու քննարկված է լինում: Սցենարիստների հետ անշուշտ հակասություններ եղել են, բայց ոչ ամբիցիաների սահմաններում: Սիթքոմի թիմը շատ լավն է, ընկերացել եմ բոլոր դերասանների հետ:

-Իսկ ի՞նչ նորություններ կան երգիչ Նարեկ Բավեյանի կյանքում:
-Նոր երգի վրա ենք աշխատում, խոսքերի հեղինակը Գայանե Ավետիսյանն է՝ «Դոմինո»-ում դոկտորի կինը, երաժշտության հեղինակը ես եմ, իսկ գործիքավորումն անում է Արա Թորոսյանը (Մուրզիկը): Երգի անունը դեռ չենք որոշել, որովհետև ես իմ տարբերակն ունեմ Գայուշն իրենը։ Համաձայնության չենք գալիս: Սպասում ենք գործիքավորմանը, որպեսզի ձայնագրվեմ: Իսկ վերջերս նոր տեսահոլովակիս շնորհանդեսը եղավ, որը համընկավ ապրիլյան պատերազմի օրերի հետ: Ես միանգամից դադարեցրի գովազդային արշավներն ու երգի շնորհանդեսը հեռուստատեսություններով: Ավելին ասեմ, շատ վատ եմ վերաբերվում, որ այդ օրերին  որոշ երգիչներ իրենց երգերի գովազդային արշավները չդադարեցրին:

-Ի՞նչ արժեք ունի Ձեզ համար բանակը, ծառայությունը և ինչպե՞ս եք վերաբերվում այն երիտասարդներն, ովքեր խուսափում են ծառայությունից:
-Բանակը մեր վահանն է, որը եթե չունես՝ խոցելի ես: Ծառայությունից խուսափելը նշանակում է տունդ խոցելի դարձնել: Չգիտեմ, թե ինչ պատճառներով են մարդիկ խուսափում ծառայությունից։ Ես իմ պարտքը կատարել եմ. ճիշտ է սահմանին չեմ ծառայել, թեև ցանկացած պահի կարող էին հրամայել, որ դիրքեր բարձրանայի: Եղել եմ շարքային զինվոր և որպես երգիչ չեմ ունեցել ոչ մի արտոնություն: Մենք ՝ հայերս այդքան էլ շատ չենք, որպեսզի ծառայությունն ըստ ցանկության լինի:

 -Ինչպիսի՞ն դարձրեց ամուսնությունը Ձեզ:
- Ամուսնությունը շատ բան փոխեց իմ կյանքում:  Ավելի պատասխանատու ու լուրջ դարձա իմ և ընտանիքիս առջև: Սկսեցի ճիշտ գնահատական տալ՝ աշխատանքին, շրջապատող մարդկանց, վաստակած գումարին: Սովորեցի կյանքում ամեն ինչը ճիշտ բաշխել ու դասավորել:

-Նարեկ, շնորհավորում ենք հայրանալու առթիվ: Առաջնեկիդ անունն արդեն որոշվա՞ծ է:
-Շատ շնորհակալ եմ: Որդիս երեկ է ծնվել: Կինս որոշել  է անունը՝ Մարկ: Ես անվան ամբողջական տարբերակին եմ կողմ՝ Մարկուս, բայց կարճ տարբերակն էլ վատը չէ:

-Հայր դառնալն ի՞նչ զգացումներ և մտքեր է առաջացրել Ձեզ մոտ:
-Պատասխանատվության զգացում և անգամ վախ, որովհետև ծնվել է նոր մի կյանք ում համար պատասխանատու ես: Մտքերով շատ եմ հեռու գնում, անգամ մտածում եմ ուսում, բանակ…հետո վախ է մոտս առաջանում, թե արդյո՞ք կկարողանամ որդուս դաստիարակել, մեծացնել որպես լավ մարդ: Քրիստինեի հետ, երբ այդ մասին խոսում էինք նա էլ ասաց, որ նույն մտավախություններն ունի: Ինձ շատ ուրախացնում է, որ ես և կինս նույնկերպ ենք մտածում ու երկուսս էլ շատ պատասխանատու ենք փոքրիկի համար: Երբ խոսքում ենք փոքրիկի մասին, ավելի շատ քննարկում ենք, ոչ թե այն թե ինչ կունենա նա, այլ ցանկանում ենք, որ լավ մարդ դառնա: Շատ բան եմ հասկանում, բայց նաև զգում եմ, որ դեռ շատ բան չեմ հասկանում: Կնոջս հղիության ընթացքում միշտ խոսել եմ փոքրիկի հետ:

-Կնոջդ` Քրիստինեի հղիության ընթացքում երգե՞լ եք նրա համար:
-Ոչ, բայց տղաս դեռ չծնված մշտապես դասական, բարձր երաժշտություն է լսել, քանի որ կինս մինչ հղիության 5-րդ ամիսը պարել է բալետում և միշտ դասական երաժշտության մեջ է եղել։

-Ո՞րն է երջանիկ ընտանիք ունենալու Ձեր բանաձևը:
-Իմ բանաձևը՝ սիրելն ու նվիրվելն է: Երջանկության բանաձևն այն է, երբ կգտնես այն մեկին հանուն որի կապրես: Արդեն ծնվեց գլխավոր մարդը, ում համար ես կապրեմ: Երբ ընտանիքիդ կարողանում ես երջանիկ դարձնել ու տեսնել նրանց երջանիկ, միթե՞ դա երջանկանալու առիթ չէ…