Երբ դասախոսը դառնում է ամուսին. ArmComedy-ի Նարեկի «աշխատանքային սիրավեպը»

Tert.am Youth-ի զրուցակիցն այս անգամ ArmComedy քաղաքական-երգիծական հաղորդման հաղորդավար,  հումորիստ Նարեկ Մարգարյանի գեղեցկուհի կողակից՝ Մաշա Գասպարյանն է: Գեղեցիկ սիրո պատմության, Նարեկի հոգատար ամուսին լինելու, ապագա բալիկի և այլ  հարցերի պատասխանները՝ զրույցում:

Ինչպե՞ս դասախոսը վերածվեց ասպետի:)

-Ամեն ինչ շատ աստիճանաբար է եղել մեզ մոտ: Սեր առաջին հայացքից չի եղել և առհասարակ չեմ էլ հավատում, որ մարդուն կարելի է սիրել առանց ճանաչելու նրա տեսակը: Սկզբում  ֆեյսբուքով հարցեր էի տալիս դիպլոմային աշխատանքիս վերաբերյալ, իսկ ավարտելուց հետո աստիճանաբար ուրիշ բնույթ սկսեցին կրել այդ նամակները: Սկսեցինք կիսվել սիրելի երգերով, ֆիլմերով՝ մինչև  հասկացանք, որ ժամանակն է հանդիպել արդեն ոչ որպես նախկին ուսանող և դասախոս:

Ասում են, որ ամուսնական կյանքի ընթացքում զույգերը նորովի են ճանաչում  իրար: Ինչպիսի՞նն է Նարեկը ամուսնու կարգավիճակում:

-Համամիտ եմ այդ մտքի հետ: Թեև մենք 4 տարի ընկերություն ենք արել ու թվում էր ամեն մանրուք գիտենք միմյանց մասին, բայց ամուսնությունից հետո բոլորովին այլ աշխարհ բացվեց մեր առջև: Սկսեցինք հարմարվել իրար, երբեմն թեթև վիճել, բայց այդ փուլն էլ շատ արագ անցավ: Ինձ նույնիսկ թվում է, որ ամուսնությունից հետո շատ հարցերում նմանվել ենք իրար: Ամուսնու կարգավիճակում Նարեկը շատ հոգատար է: Իրականում կարող եմ ժամերով խոսել ու պատմել ամուսնուս մասին, բայց միայն կասեմ՝ շատ երջանիկ եմ, որ Նարեկի կինն եմ:

Ինչպե՞ս հայտնեցիք հղիության մասին լուրը և ինչպե՞ս արձագանքեց ապագա հայրիկը:

-Հղիության մասին լուրը իրականում կուզենայի ավելի օրիգինալ հայտնել, բայց քանի որ բնավորությամբ շատ էմոցիոնալ եմ…(ժպտում է) լուրն իմացա ու  ամբողջ ուժով  բղավեցի: Այնքան բարձր, որ Նարեկին քնից արթնացրի:

Տղա է, թե՞ աղջիկ

-Տղա երեխայի ենք սպասում: Բայց անպայման ուզում եմ աղջիկ էլ ունենանք: Կարծում եմ, որ կինը տարբեր սեռի երեխայի հետ յուրովի է վայելում մայրությունը: Երջանիկ կլինեմ, որ և՛աղջկա և՛ տղայի մայր լինեմ։

Ի՞նչ տեսակ օրիգինալ վերաբերմունք է ցուցաբերում  Նարեկը հիմա: Ինչ-որ հատուկ քայլեր անում է՞, որպեսզի ընդգծի Ձեր կարգավիճակը:

-Ամուսինս միշտ շատ ուշադիր է եղել, բայց հիմա առավել ուշադիր է: Նարեկ Մարգարյանն  ամուսնու կերպարում  իսկական հրաշք է: Հատկապես, երբ հիմա հղիության վերջին ամսում եմ ու ամեն պահի սպասման մեջ ենք: Կողքիցս չի ուզում բացակայել, որ մենակ չլինեմ այդ պահին: Հիմա նույնիսկ նկարահանումների  ժամանակ հեռախոսը չի անջատում, որ անհասանելի չլինի, երբ ժամանակը գա:

Վերջերս երեխայի ծննդյանն ընդառաջ  խնջույք  էիք  կազմակերպել: Ո՞ւմ  գաղափարն  էր և կողմ է ապագա հայրիկը նման խնջույքներին:

-Այո, գաղափարը  իմն էր: Կազմակերպել էի ամերիկյան «baby shower» կոչվող խնջույքը: Հայաստանում այն դեռ տարածված չէ, բայց վստահ եմ, որ ժամանակի հետ տարածված կդառնա, քանի որ շատ հաճելի երևույթ է, իսկ ապագա մայրիկին դրական էմոցիաները երբեք չեն խանգարում: Հավաքվել էինք միայն աղջիկներով ու նշում էինք ապագա բալիկիս ծնունդը: Նաև շատ օգտակար և հաճելի նվերներ ստացավ տղաս: Ամուսինս միշտ աջակցում է ինձ, երբ ես օրիգինալ մտքեր եմ ունենում:

Ի՞նչ անուն է կրելու Ձեր բալիկը:

-Անվան հարցում դեռ չենք կողմնորոշվել: Ընտրել ենք մի քանի անուն, երբ տղաս ծնվի կարծում եմ միանգամից կհասկանանք, որ անունն է ավելի շատ սազում նրան:

Ինչպիսի՞ հայրիկ կլինի Նարեկը:

- Վստահ եմ, որ շատ լավ հայրիկ կլինի: Առհասարակ բոլոր երեխաները սիրում են Նարեկին, որովհետև նա ժամերով կարող է խաղալ երեխաների հետ: Շատ համբերատար է:

Ունե՞ք դաստիարակության Ձեր մոդելը:

- Դաստիարակության և առհասարակ ընտանիքի մոդելը, ինձ համար միշտ եղել է իմ ընտանիքը: Մեծացել եմ մի ընտանիքում որտեղ մայրիկը և հայրիկը սիրում են իրար, իսկ երեխաները մեծանում են այդ սիրո մեջ: 27 տարվա ամուսիններ են, բայց կարծես նորապսակներ լինեն: Երազում եմ, որ իմ ընտանիքում էլ այդպես լինի: Կցանկանայի, որ տարիներ անց էլ մնանք այսպես՝ սիրահարված: Առողջ, լիարժեք և սիրով լի ընտանիքում, միշտ երջանիկ երեխաներ են մեծանում, իսկ դա ինձ համար ամենակարևորն է:

Անահիտ Կասամանյան