«Այդ մեկ օրն իմ կյանքում շատ բան փոխեց». Լիլիթ Հարոյան

Դերասանուհի Լիլիթ Հարոյանին շատերը կհիշեն «Ֆուլ հաուս» սիթքոմից, որում մարմնավորում էր Եվայի կերպարը: Լիլիթին արդեն երկար ժամանակ է, ինչ հեռուստաէկրաններին չենք տեսնում: Tert.am Youth-ի հետ զրույցում մասնագիտությամբ հոգեբան Լիլիթը պատմեց իր զբաղվածության և առաջիկա ծրագրերի մասին:

«Շուրջ 4 տարի զբաղվել եմ յոգայով, իսկ այժմ դասավանդում եմ: Իմ կյանքում շատ մեծ փոփոխություն տեղի ունեցավ, որը ես անվանում եմ «վերածնունդ»: Ինչ-որ հատուկ բան չի եղել, պարզապես, այդ մեկ օրն իմ կյանքում շատ բան փոխեց: Դրանից հետո սկսեցի զբաղվել յոգայով և ապրել առողջ ապրելակերպով: Ունեմ նոր առաջարկ` նկարահանվելու հումորային սիթքոմում: Ճիշտ է, ես դեռ չեմ հաստատել առաջարկը, բայց ամեն դեպքում դերասանական կարիերան անպայման շարունակելու եմ և առաջիկայում ինձ կտեսնեք հեռուստաէկրաններում»,-պատմեց Լիլիթը:

Նրա խոսքով` իր առաջին դերասանական մեծ փորձը «Ֆուլ հաուս»-ում է եղել. «Դերասանական վոլորտում իմ առաջին քայլերն արել եմ «Ֆուլ հաուս»-ում, որն ինձ համար մեծ փորձ էր: Ամենակարևորը ես հասկացա, որ տեսախցիկների հետ աշխատելն ինձ դուր է գալիս: Դերասանական կրթություն չունեմ: Ավարտել եմ Երգի պետական թատրոնը, որտեղ մեզ դասավանդում էին նաև դերասանական արվեստ»:

Հարցին` ըստ Ձեզ` առաջին քայլն ինչպե՞ս է ստացվել, Լիլիթը պատասխանեց. «Ճիշտն ասած, ինքս ինձ գնահատել այդքան էլ չեմ սիրում, բայց շատերից եմ լսել դրական կարծիքներ: Կարծում եմ, ժամանակի ընթացքում մարդ արարածն ինքնակատարելագործվում և զարգանում է: Լինելով այդ վոլորտում`դու օր օրի կարող ես նոր բան սովորել: Ճիշտ է, չեմ սիրում ինձ գնահատել, բայց նաև չեմ սիրում` ինքնաքննադատել: Մասնագիտությամբ հոգեբան եմ ու գիտեմ, եթե մարդը ինքն իրեն քննադատի, ապա իր մոտ կառաջանա մեղքի զգացում, որը կհանգեցնի հոգեբանական խնդիրների»:

Լիլիթը խոսելով Եվայի կերպարի մասին` ասաց, որ նրանք ընդանուր նմանություն չունեն:

«Այն մարդիկ, որոնք չեն ճանաչում ինձ մտածում են, որ ես այդպիսին եմ: Բայց ասեմ, որ կերպարիս հետ ոչ մի նմանություն չկա»:

Նշենք, որ Լիլիթը նախքան «Ֆուլ հաուս» սիթքոմում նկարահանվելը մի քանի ամիս Armenia TV-ում վարել է «Բարի լույս» ծրագիրը:

«Աշխատանքը կիսատ թողնելով` մեկնել եմ ԱՄՆ և՛ գործնական, և՛ անձնական նկատառումներով: Այնտեղ շատ հարազատներ ունեմ: Երբեմն իմ հանգիստը այնտեղ եմ անցկացնում: Իսկ, թե հետագայում այնտեղ կբնակվեմ, թե՞ ոչ, աշխատում եմ նախապես չպլանավորել  ոչինչ և ապրել այսօրվա օրով»,-եզրափակեց Լիլիթը:

Մելինե Տոնոյան