Մեր հաջորդ մեծ թիրախը Գալուստ Սահակյանն է. «Արմքոմեդի»

Երեկ եթեր է հեռարձակվել «Արմքոմեդի» քաղաքական երգիծական հաղորդման 500-րդ հոբելյանական թողարկումը: Այս առիթով նախագծի հեղինակներ ու վարողներ Նարեկ Մարգարյանի և Սերգեյ Սարգսյանի հետ էր հանդիպել Հանրապետության Նախագահ Սերժ Սարգսյանը: Հանդիպման գաղափարի, իրագործման և տպավորությունների մասին փոքրիկ զրույց ունեցանք տղաների հետ:

-Տղաներ,ինչպե՞ս ծագեց այդ համարձակ գաղափարը:

-Նման միտք միշտ եղել է, քանի որ արևմտյան հաղորդումներից տեսել ենք, որ առաջին դեմքերը երբեմն գնում են հումորային հաղորդումներին հյուր: Օրինակ՝ ամեն սպորտային լրագրող ցանկանում է, որ իր լուսաբանման սյունակում ունենա Հենրիխ Մխիթարյանի հետ հարցազրույց, իսկ եթե քաղաքական ոլորտն է, ապա ամենաբարձր քաղաքական պաշտոնը Սերժ Սարգսյանի պաշտոնն է:

-Սերգեյ, ինչպե՞ս կապ հաստատեցիք և ինչպե՞ս արձագանքեցին Ձեր ցանկությանը:

-Գաղափարը ներկայացրինք հեռուստաընկերության ժողովի ժամանակ: Հավանեցին, սակայն հետագա պայմանավորվածությունների պրոցեսին մենք չենք մասնակցել:

-Հետաքրքիր է, թե ինչպե՞ս սկսվեց հանդիպումը տեսախիկից այն կողմ:

-Մենք ժամանեցինք մի քիչ ավելի շուտ ու տեղադրեցինք տեսախցիկները: Այդ ընթացքում ժամանակ ունեինք ու հնարավորինս ուսումնասիրեցինք տարածքը: Նախագահականում թանգարան տեսանք: Պարզվեց, որ բոլոր նվերները, որ ստանում է նախագահը, պահվում են այդ թանգարանում:

-Տղաներ, առաջին անգամ էի՞ք Նախագահին հանդիպում:

-Մի անգամ առիթ ունեցել էինք շփվելու: Այդ ժամանակ առաջարկեցինք ու Նախագահն ասաց, որ սկզբունքորեն դեմ չէ: Դա, իսկապես, մեզ շատ ոգեշնչեց: Համընկավ մեր 500-րդ թողարկումը և Նախագահն էլ չմերժեց:

-Սերգեյ, սպասում էի՞ք, որ Նախագահն է Ձեզ հարցեր տալու:

-Ամեն ինչ սպասում էինք ու հնարավորինս պատրաստվել էինք: Ենթադրում ենք, որ հաջողված զրույց էր:

-Նախագահի հետ կադրից դուրս խոսելու հնարավորություն ունեցա՞ք, Նարեկ:

-Շփվեցինք, բայց շատ քիչ: Մի քանի հանդիպումներ ուներ Նախագահը: Նախագահի ունեցած ժամանակը շատ սուղ էր:

-Նախագահի հետ «սելֆի» անելու ցանկություն չունեցա՞ք:

-Կուզեինք Նախագահի հետ «սելֆի» անել, բայց հեռախոսները վերցրել էին: Մենք նկարվեցինք հին ավանդական ձևով՝ լուսանկարչական ապարատով:

-Ինչպիսի՞ արձագանքներ եք լսում հարցազրույցը եթեր հեռարձակելուց հետո:

-Սկսել են բոլորն ինձ ասել, որ ինձ Դուք-ով են դիմելու: Ասում եմ չէ: (Նարեկ)

- Բոլորի մոտ վերջնականապես տպավորվեց, որ իմ ազգանունը Սարգսյան է: Այս առումով շատ օգտակար էր: Ավելի դիրքավորվեց իմ ազգանունը մեր շենքում: (Սերգեյ)

-Ինչ պարզվեց՞։

-Պարզվեց, որ Նախագահը նայել էր մեր հաղորդումները: Հետևել էր ում ենք անդրադառնում: Ճիշտ առանձնացրել էր բոլոր անունները:

-Սերգեյ, կարծես առանձնապես լարվածություն չկար, թե՞ այդպես երևում էր:

-Իսկապես լարվածություն չկար: Տարօրինակ է, բայց, իրոք, շատ հանգիստ էր ամեն ինչ: Ոչինչ չենք կոտրել այնտեղ, մեզ շատ խելոք ենք պահել: Շատ հետաքրքիր էր մթնոլորտը:

-600 կամ 1000-րդ թողարկմանը ո՞ւմ հետ պետք հարցազրույց անցկացնեք, որ համարժեք լինի 500-ին:

-Մեր հաջորդ մեծ թիրախը Գալուստ Սահակյանն է: Նա մեր մեծ հույսն ու մեծ ակնկալիքն է: Մոտավորապես 2-3 ամիսը մեկը փորձում ենք հանդիպել, բայց դեռ չի ստացվում:

-Պարոն Սահակյանը դեմ է՞ Ձեզ հանդիպելուն:

-Չէինք ասի, թե  կտրականապես դեմ է մեր հանդիպմանը, բայց չի ստացվում: Մենք էլի ենք փորձելու:

-Սերգեյ, զրույցի ընթացքում, չնայած Նախագահի հորդորներին, կրկին օգտագործեցիք «OK» բառը: Ես ճի՞շտ եմ լսել :)

-Մենք նման բառ չգիտենք: Երբևէ չենք լսել: Չենք էլ պատրաստվում օգտագործել:)

                                                                                                  Զրույցը՝ Անահիտ Կասամանյանի