Արտյոմ Հակոբյանը մեկնաբանում է Հայաստանից մեկնելու իր դրդապատճառները

11:32 • 01.07.16

Ռեժիսոր, պրոդյուսեր Արտյոմ Հակոբյանը պատրաստվում է իր ընտանիքի հետ հեռանալ Հայաստանից և բնակվել Ամերիկայի Միացյալ Նահանգներում: Այս մասին մենք տեղեկանում ենք Արտյոմի ֆեյսբուքյան էջից, որտեղ նա գրառում էր հրապարակել:

Tert.am Life-ի հետ զրույցում ռեժիսորը խոսեց այն դրդապատճառների մասին, որոնք ստիպում են հեռանալ հայրենիքից:

«Պատճառը մեկը չի, երկուսը չի: Պատճառն այն է, որ տարիներ շարունակ այն շարունակվում է և գնալով էլ ավելի վատանում: Անգամ ապրիլյան իրադարձությունները ոչ մի եզրակացության առիթ չդարձան այն մարդկանց համար, որոնք կարող են կարգավիճակը փոփոխել:

Ինձ անհանգստացնում է, որ մեր երկրում քաղաքական գործիչները, ոչ թե մտահոգված են մեր երկրի վիճակի բարելավմամբ, այլ միայն սեփական շահերին համապատասխան օրենքներ մշակելով, օրենքներ ընդունելով և այլն: Մտահոգված եմ նրանով, որ նույն քաղաքական գործիչների մեծամասնությունը ինտելեկտուալ ցածր մակարդակի վրա են գտնվում, որոնք այսօր իշխում են և կարծում եմ, որ դեռ երկար տարիներ կշարունակեն իշխել` իրենց վայրագությունների, իրենց ուժի, գումարների հաշվին:

Նրանք հաշվի չեն նստում այլ բնագավառի մարդկանց հետ: Եթե մենք ցանակում ենք ինչ-որ բան ասել, միգուցե, տեսնում են, կարդում են, բայց համոզված եմ, որ ցինիկ կերպով քմծիծաղ են տալիս և շարունակում են իրենց գործերը»,- ասաց Արտյոմը:

Ռեժիսորը մտահոգված է նաև կրթական համակարգից: Նրա կարծիքով. «Իմ երեխաները կրթություն են ստանում թերի, քանի որ այսօր Հայաստանում կրթությունը շատ ցածր մակարդակի վրա է, եթե կան լավ կենտրոներ, ապա դրանք հասանելի չեն բոլորին»:

Պրոդյուսերը նաև դժգոհեց իր բնագավառից. «Իմ բնագավառում 20 տարի շարունակ աշխատել եմ. ամեն ինչ գնում է դեգրադացիայի: Այսօր երգարվեստը տեղափոխվել է ռեստորաններ: Իհարկե, կան լուսավոր բաներ, բայց այդ ամենն ինձ չի գոհացնում: Ես փորձել եմ պայքարել, բայց արդյունք չի տվել: Փորձել եմ անել որակյալ նախագիծ, բայց հեռուստատեսությունները չեն ունեցել դրա համար համապատասխան բյուջե: Հեռուստատեսությունը առաջարկում է բյուջե, որով միայն անորակ աշխատանք կորղ ես անել: Շատ արտիստների ենք առաջարկել լավ երգեր, բայց հետո հասկացել ենք, որ այդ երգերով երգիչը գումար չի աշխատի և ստիպված ենք եղել գրել երգեր, որոնք կբերի գումար: Շատ-շատ այդպիսի բաներ կան, որոնք ստիպում են ստիպված քայլերի գնալ»:

Արտյոմը իր ընտանիքի հետ պատրաստվում է մեկնել Միացյալ Նահանգներ: Նա անգամ իր տունն է վաճառում:

«Ես չեմ ցանկանում դառնալ իրականության զոհը և որոշեցի չմնալ Հայաստանում և մեկնել ԱՄՆ: Իհարկե, գիտակցում եմ, որ սկզբնական շրջանում դժվարությունների առջև կկանգնեմ, բայց ես չեմ վախենում դժվարություններից և պատրաստ եմ պայքարել: Աշխատող մարդու համար դժվարությունը հաղթահարելի է, եթե ունես ցանկություն և ձգտում: Ես ունեմ մեծ տուն, որն իմ բացակայության ընթացքում, պետք է ինչ-որ մեկը հետևի: Որեշել ենք այն վաճառել և դրա փոխարեն փոքր տուն գնել, որ այդ խնդրի առաջ չկանգնենք»,- եզրափակեց Արտյոմը:

Մելինե Տոնոյան