Փողն ու ճանաչումը երբեք չեն կարող փոխել ինձ. Գոռ Հակոբյան

«Ֆուլ հաուս» սիթքոմի 4-րդ եթերաշրջանն ավարտվել է: Դերասաններից ոմանք վայելում են իրենց հանգիստը, ոմանք աշխատում: Դերասան Գոռ Հակոբյանը շուտով կներկայացնի իր նոր տեսահոկովակը, որը կոչվում է «Կյանքս կերել է»:

Tert.am Life-ի հետ զրույցում դերասանը խոսեց երգարվեստ մուտք գործելու, նոր աշխատանքների և կիսատ թողած գործերի մասին:

-Գոռ, ժամանակին ռեփ ժանրի տեսահոլովակներ էիք թողարկում: Ինչո՞ւ երկարատև դադարից հետո որոշեցիք կրկին մուտք գործել երգարվեստ, բայց արդեն փոփ ժանրով:

-Երգն ինձ համար որպես հոբբի է: Ազատ ժամանակ սիրում եմ նվագել, ստեղծագործել: Երբ գրեցի այս երգը հասկացա, որ սա ինձ համար է, և խորհրդակցելով Արմեն Պետրոսյանի հետ, աշխատեցինք դրա վրա: Չգիտեմ, հանդիսատեսի կողմից ինչպես կընդունվի, բայց ակնկալիքներս մեծ են: Իհարկե, կցանկանայի ռեփը շարունակել, բայց Հայաստանում դրանով չես կարող ինչ-որ մեկի զարմացնել: Եվ այդ իսկ պատճառով որոշեցի այլ ոճում փորձել ինձ: Բայց հաստատ 6-8 չեմ երգելու (ժպտում է): Այս երգը փոփ ժանրում է լինելու, աշխատել ենք հնարավորինս զերծ մնալ արևելյան երգեցողությունից:

-Երգը կոչվում է «Կյանքս կերել է»: Իսկ ո՞վ է կերել Ձեր կյանքը:

-Այ, դա չեմ ասի (ծիծաղում է): Իրականում, պարտադիր չէ ինչ-որ մեկը կերած լինի իմ կյանքը: Դրանք պարզապես բառեր են:

-Ինչո՞վ է այդ երգը տարբերվելու:

-Գործիքավորումը կատարել է Էդգար Ալեքսանյանը, որին խնդրել էի գործիքավորման մեջ անի «ամենափախած» բաները: Նա շատ ուրախացավ, որ ես թույլ տվեցի անի այն ինչ ինքը կցանկանա: Ստացել ենք թեթև երգ: Տեսահոլովակն էլ տարբերվող է լինելու: Առաջիկայում կներկայացնենք:

-Գոռ, հարցազրույցներից մեկի ժամանակ նշել էիք, որ «Անտիվիրուս» հաղորդումը կրկին վերսկսելու  եք: Ե՞րբ եք պատրաստվում:

-«Անտիվիրուս»-ը հետագայում կլինի, քանի որ աշխատանքներս շատ են և այժմ չեմ հասցնում:

-Իսկ «Ֆուլ հաուս»-ի 5-րդ եթերաշրջանում, Ֆելոյի կերպարում նոր զարգացումներ կլինե՞ն:

-Ֆելոյի կերպարում հիմնական գծերը կպահպանվեն, բայց նոր հետաքրքիր զարգացումներ անպայման կլինեն: Եթե հիշում եք, առաջին եթերաշրջանում Ֆելոն միամիտ տղա էր, ով եկել էր գյուղից: Նա ամեն եթերաշրջանում «աճում» է, քանի որ Երևանը փոխում է մարդուն: Դա իրականում էլ է այդպես: Իմ և Ֆելոյի բնավորության գծերի մեջ ընդանուր բան չկա:

-Իսկ դուք փոխվե՞լ եք:

-Յուրաքանչյուր մարդ փոխվում է, բայց կարևորն այն է, որ մարդը պահի իր տեսակը: Ես հստակ չեմ կարող ասել փոխվել եմ թե ոչ, բայց եթե անգամ փոխված էլ լինեմ, ապա աշխատել եմ մարդկային իմ բնավորության գծերը պահել: Փողն ու ճանաչումը երբեք չեն կարող փոխել ինձ:

-Կյանքում ի՞նչ դժվարության միջով եք անցել:

-Դժվարություններ որպես այդպիսին չեն եղել: Դժվարությունն այս պահին զբաղվածությունն ու հոգնածությունն է: Քիչ եմ տեսնում երեխաներիս: Դա է ամենամեծ դժվարությունը:

-Երբ տանն եք լինում…

-Երբ տանն եմ լինում, երեխաներիս հետ եմ անցկացնում ժամանակս: Սիրում եմ նրանց հետ դուրս գալ ու զբոսանելու:

-Եթե ընտրության հնարավորություն ունենայիք, որը կընտրեիք` երգարվեստը թե՞ դերասանական կարիերա:

-Դերասանական կարիերա: Բայց ամեն դեպքում կշարունակեի ստեղծագործել և նվագել: Առանց երաժշտության ես ինձ չեմ պատկերացնում:  Երբ գերհոգնած եմ լինում դա ինձ լցքաթափում է:

-Հեշտ է Ձեզ ծիծաղեցնել:

-Հումորն ինձ համար կենսակերպ է: Ես կարող եմ լինել և՛ ուրախ, և՛ լուրջ: Եթե զրուցակիցս ինձ նման է, ապա նա կարող է հեշտությամբ ինձ ծիծաղեցնել:

-Ո՞ր դերասանն է Ձեր ֆավորիտը, ո՞ւմ եք փորձում նմանվել:

-Մհեր Մկրտչյանը: Բայց երբեք չեմ փորձել նմանվել կամ կրկնօրինակել նրան: Ես ո՞վ եմ, որ իրեն փորձեմ նմանվել:

Լրագրող` Մելինե Տոնոյան

Լուսանկարիչ` Կարեն Հովհաննիսյան