Երգարվեստն ինձ համար անհասանելի է. Արմինկա

Օրերս երևանյան նորաձևության տներին միացավ ևս մեկը՝ Clothing Line By Arminka: Պարզվում է, որ նորաձևության տան հեղինակը երգչուհի Արմինկան է:

Tert.am Life-ի հետ զրույցում երգչուհին խոսեց, թե ինչո՞ւ է երգարվեստն անհասանելի իր համար և ինչպե՞ս սկսեց զբաղվել նոր բիզնեսով:

-Clothing Line By Arminka: Նոր անուն Հայաստանում: Ինչպե՞ս սկսվեց ամեն ինչ:

-Ինձ  միշտ ասում էին, թե ես ինչու նորաձևության տուն չեմ բացում, բայց ես էլ պատասխանում էի, որ ես դրան պատրաստ չեմ: Հիմա ամեն ինչ փոխվել է: Գաղտնիք չէ, որ հիմա բեմում գրեթե չկամ, բայց ստեղծագործելն ինձ համար մնում է անհրաժեշտություն: Մտածեցի, եթե երաժշտությունը ինձ համար անհասանելի է դարձել, ապա փորձեմ այս ոլորտը: Այստեղից ինձ մոտ գաղափար առաջացավ՝ ստեղծել սեփական հագուստների գիծ: Ցանկացա հագուստ առաջարկել մեր քաղաքի աղջիկներին:

-Ինչո՞վ էր պայմանավորված հագուստների 12 թիվը:

-Գուցե զարմանաք, բայց ես չեմ հաշվել, թե քանի հագուստ եմ մոդելավորել: Քանակի շեշտադրում չի եղել: Պարզապես փորձել եմ հնարավորի սահմաններում արտահայտել գաղափարներս:

-Որտե՞ղ կարող են մարդիկ գտնել  և պատվիրել ձեր մոդելավորած հագուստները:

-Արմինկա գեղեցկության սրահին կից  գործում է մեր փոքրիկ նորաձևության սրահը: Արդեն հասցրել ենք այցելուներ ու պատվիրատուներ ունենալ:

-Չի եղե՞լ, որ հաճախորդները ցանկություն հայտնեն պատվիրել Ձեր որևէ տեսահոլովակի հագուստներից:

-Այս ընթացքում ոչ, բայց ժամանակին գիտեք ինչքան շատ էին նման դեպքեր լինում: Մարդիկ խնդրում էին հենց իմ զգեստից, հենց իմ դիմահարդարումից և այլն: Փորձում էի մարդկանց բացատրել, որ Արմինկայի բեմական հագուստով ռեստորան գնալը այդքան էլ լավ չի նայվելու ու հաստատ ճանաչվելու է:

-Եթե առաջարկ լինի, ապա կհամագործակցե՞ք երգչուհիների հետ:

-Իհարկե: Ես էլ ունեմ նախընտրելի արտիստներ ու պարբերաբար իրենց կառաջարկեմ կրել իմ ստեղծած հագուստներից: Եթե ցանկություն ունեցողներ կլինեն, ապա մեծ սիրով:

-Պրոցեսը փորձենք հասկանալ: Երբ հաճախորդը գալիս է զգեստ պատվիրելու, ապա ի՞նչ գործառույթներ ունեք դուք այդ պրոցեսում:

-Միանշանակ ես սրահում եմ լինում: Ես եմ առաջարկում, թե ինչը կարող է սազել, որը տվյալ առիթին հարմար կլինի: Ներկա եմ լինում, երբ հաճախորդը գալիս է առաջին անգամ փորձելու հագուստը: Ինձ համար այս գործում ամեն դետալ կարևոր է:

-Հետաքրքիր է Ձեր կարծիքը բեմական կուլտուրայի վերաբերյալ:

-Չէի ասի, որ ակտիվ հետևում եմ ու շատ լավ տեղեկացված եմ, թե այսօր հեռուստատեսությամբ ինչ է ցուցադրվում, բայց ես մի բան հստակ կարող եմ ասել, որ ես անհատներ դեռևս չեմ տեսնում: Չկա անհատական ոճ ու ձեռագիր: Ցավալի է այն փաստը, որ քաղաքում գրեթե բոլոր աղջիկները փորձում են նմանվել իրար, հագնվել ու դիմահարդարվել մեկը մյուսի պես: Նույնն էլ տիրում է բեմում: Միօրինակություն է բեմում ու երգարվեստում:

-Սկզբում ասացիք, որ երգարվեստը հասանելի չէ Ձեզ համար: Ինչո՞ւ:

-Նախընտրում եմ այս մասին լռել:

-Այսինքն՝  երգարվեստը այլևս փակված է՞ջ է Ձեզ համար:

-Երգարվեստն այս պահին ինձ համար անհասանելի է: Չգիտեմ ասածս ինչպես կհասկանաք: Այլևս չեմ կարող փակագծերը բացել:

                                                                                                    Զրույցը՝ Անահիտ Կասամանյանի