Եթե Քարդաշյանի ոճը զիջի իր դիրքերը Հայաստանում, ավելի լավ կլինի. Դիանա Շատվերյանը խորհուրդ է տալիս ինչպես հագնվել (ֆոտոշարք)

13:12 • 28.07.16

Ոճաբան, դիզայներ Դիանա Շատվերյանը վերջերս թողարկեց իր մոդելավորած հագուստների ամառային նոր հավաքածուն։ Դիզայների հետ խոսել ենք այս ամռան թրենդների և հակաթրենդների մասին, ինչպես նաև լուսանկարել նրան դստեր՝ փոքրիկ Վիվիենի հետ։

-Պատմեք նոր հավաքածուի մասին։

-Ստեղծել եմ հիմնականում անհամաչափ /ասիմետրիկ/ ձևվածքով զգեստներ` համադրելով երեք տարբեր գույներ, որոշ դեպքերում նաև` առաջին հայացքից անհամադրելի թվացող գործվածքներ, հավաքածուում օգտագործել եմ նաև վառ գույների տարբեր գործվածքներ, այդ թվում` ծոպեր, պլիսսեներ, որոնք 2017 թվականի համաշխարհային նորաձևության տենդենցներ են։ Նոր հավաքածուի ֆոտոշարքը ներկայացված է իմ Facebook-ի և Instagram-ի էջերում։

-Որո՞նք են այս սեզոնի գլխավոր թրենդները:

-Նրանք են, ինչ օգտագործել եմ իմ նոր հավաքածուում (ժպտում է)։ Ասիմետրիկ ձևվածք, ծոպեր, բոհո-շիկ, լայն տաբատներ, բարձր գոտկատեղով տաբատներ, լայն վերնաշապիկ-խալաթներ և այլն։

-Իսկ հակաթրենդնե՞րը։

-Չեմ հոգնի կրկնել, որ ամառային երկարաճիտ կոշիկները նորաձև չեն և չեն էլ եղել, եթե իհարկե դրանք չեն օգտագործվում հատուկ ընդգծված բեմական կամ եթերային ոճ ստանալու համար։ Դա ամենասարսափելի հակաթրենդն է Հայաստանում:

Հակաթրենդ է նաև ծաղիկներով գլխանոցը, եթե դա չի օգտագործվում հատուկ երեկոյին մասնակցելու համար։ Քայլում ես փողոցով և տեսնում՝ ինչ-որ մեկը ամենօրյա հագուստով և հսկայական ծաղիկներով գլխանոցով շրջում է։

-Հավաքածու ստեղծելիս ի՞նչն եք կարևորում՝ մտահղացո՞ւմը, թե՞ կոմերցիոն շահույթը:

-Իհարկե` մտահղացումը։ Ստեղծած սեփական ոճը հաճախորդին հրամցնելը կարևոր է։ Ինչպես ասել է Շանելը՝ նորաձևությունն անցնում է, իսկ ոճը մնում է միշտ։

-Ինչպե՞ս են հագնվում հայ երիտասարդներն ըստ Ձեզ։

-Հայ երիտասարդների ճաշակը օր-օրի զարգանում է։ Հետևում են համաշխարհային նորաձևության տենդեցներին, ձևավորում են սեփական ճաշակը։ Իհարկե, եթե շատերի կուռքը դարձած Քիմ Քարդաշյանի ոճը մի փոքր զիջի իր դիրքերը, ավելի լավ կլինի, քանի որ նորաձևությունը միայն իրենով չի սահմանափակվում։

-Ի՞նչ սկզբունքով եք առաջնորդվում մանկական հագուստ ստեղծելիս։

-Հիմա մեր երեխաներն ունեն իրենց սեփական ոճը և թելադրում են իրենց կարծիքները, որոնք հաշվի եմ առնում։ Երբեմն գեղեցիկ է, երբ հատուկ առիթների դեպքում մայր և դուստր ներկայանում են միանման զգեստներով։

-Ի՞նչ չպետք է հագնի կինը ժամադրության գնալիս։

-Շատ կարճ, համարձակ զգեստ։

-Իսկ տղամա՞րդը։

-Հայ տղամարդու դեպքում շատ դժվար է ասել, բայց մի բան հաստատ է՝ վերջին զանգի հագուստով պետք չէ գնալ ժամադրության (ժպտում է)։

-Ի՞նչ չպետք է հագնել աշխատանքի գնալիս։

-Սպորտային կամ շատ ազատ հագուստ։

-Ի՞նչ հագնել առաջին ժամադրության ժամանակ։

-Հագնվել հետաքրքիր և ոչ բաց։ Հաշվի առնելով տղամարդու ճաշակը` կարելի է լուքի որևէ հատված նրան նվիրել, բայց չմոռանալ սեփական ոճի և հարմարավետության մասին։