Արկածային շրջագայություններ և նոր գլխապտույտ աշխատանքներ. Արամեն իր առաջիկա ծրագրերի մասին

Տեսահոլովակների պրեմիերաներ, ԱՄՆ-ում մենահամերգ և Ռուսաստանի մի շարք քաղաքներում համերգային շրջագայություն. երգիչ Արամեն սեպտեմբերից իր երկրպագուներին կներկայանա մի շարք նոր աշխատաքներով:

Այս մասին Tert.am Life-ի հետ զրույցում ասաց Արամեն:

«Հիմա աշխատում ենք պարային, 6/8 ռիթմով «Համով-հոտով» երգի վրա, որը նվիրում ենք փոքրիկ երեխաներին: Երգի երաժշտության հեղինակը Կարեն Սևակն է, խոսքերինը` Ավետ Բարսեղյանը,  ռեժիսորը` Սյոմա Կոդաբաշյանը: Տեսահոլովակի նկարահանումները ընթացքի մեջ են: Առաջիկայում կան շատ շրջագայություններ,  համագործակցություններ Ռուսաստանի շոու-բիզնեսի ներկայացուցիչների հետ, որոնք կներկայացնենք սեպտեմբերին»,- ասաց Արամեն:

Երգիչը այս ընթացքում պատրաստվում է «10 տարի միասին» խորագրով համերգային շրջագայություններին և Միացյալ Նահանգներում իր մեծ մենահամերգին, որը կկայանա հոկտեմբերի 9-ին:

«Սեպտեմբերին Մոսկվայում տեսահոլովակի պրեմիերայից հետո կմեկնեմ Ամերիկա՝ պատրաստվելու Լոս Անջելեսի մենահամերգիս: Հետո հոկտեմբերի 12-ից կմեկնեմ Ռուսաստան, որտեղ տարբեր քաղաքներում հանդես կգամ համերգներով: ԱՄՆ-ում կայանալիք մեծ մենահամերգի ծրագիրը կկազմակերպենք նաև Ռուսատանում ու Հայաստանում, իսկ արդեն մյուս տարի համերգային շրջագայությամբ կներկայանամ Եվրոպայի հայաշատ երկրներում»:

Երգիչը խոսելով արտերկրում իր հանդիսատեսի մասին, և թե ինչպես են անցնում համերգները, ասաց. «Ես առհասարակ հանդիսատեսին չեմ սիրում առանցնացնել, քանի որ եթե հանդիսատեսը գալիս է քո համերգներին, ծափահարում է, գնահատական է տալիս, ապա դրանով ցույց է տալիս իր վերաբերմունքը: Փառք Աստծո, ես որտեղ գնում եմ ինձ լավ են դիմավորում, որի համար շատ երջանիկ եմ»:

Արամեն պատմեց մեզ նաև շրջագայության ընթացքում արկածների մասին: Նրա խոսքով` զավեշտալի դեպքեր շատ են լինում. «Պատկերացրեք 15-ից ավել համերգ, օրը մեկ քաղաքում կամ երկրում, զավեշտալի է (ժպտում է): Մեկ անգամ համերգային շրջագայության ժամանակ շփոթել էինք քաղաքը և այլ տեղ գնացել: Հոգնած ու տանջված մենք կորցրեցինք 4 ժամ և ստիպված հետ վերադարձանք: Հիմա ծիծաղելի է, բայց այդ պահին դաժան էր»:

Արամեն սիրում է ճանապարհորդել, սակայն նա ավելի շատ աշխատանքի բերումով է ճանապարհորդում, քան հանգստի: Վերջինս պասիվ հանգստի սիրահար է, նախընտրում է իր կնոջ հետ լինել ծովափնյա քաղաքներում:

«Առանց իմ կնոջ չեմ պատկերացնում հանգիստս: Նա միշտ ինձ հետ է: Այս տարի կփորձեմ համատեղել Ամերիկայի մենահամերգը և հանգիստը»,- ասաց նա:

Արամեն առաջիկայում կներկայացնի նաև իր և Աննայի զուգերգը. «Աննայի հետ արդեն ձայնագրել ենք երգը և սպասում ենք հարմար պահի, որպեսզի նկարահանենք տեսահոլովակ»:

Մելինե Տոնոյան