Սիրուց ծնված սեր. Էմմա Ասատրյանը՝ Tert.am Life-ի ֆոտոշարքում

Tert.am Life-ի զրուցակիցը ջազ երգչուհի Էմմա Ասատրյանն է, ով ամիսներ առաջ լույս աշխարհ է բերել իր առաջնեկին: Երգչուհու հետ հանդիպեցինք Երևանի այգիներից մեկում: Tert.am Life-ի հետ ծանոթացավ նաև երգչուհու փոքրիկը՝ Անրին: 5 ամսական Անրին տղամարդուն վայել պահեց իրեն և ամբողջ զրույցի ու ֆոտոշարքի ընթացքում անհանգստություն չպատճառեց Էմմային: Ֆոտոշարքն ու զրույցը՝ ստորև:

-Բարձրախոսին ու նոտաներին եկան փոխարինելու տակդիրը և անքուն գիշերները: Զգացողություններն ինչպիսի՞ն են:

-Կյանքում ամեն ինչ ունի իր փուլերը: Սկսած օրինակ՝ հագուստից: Փոքր ժամանակ կրած հագուստը տարիներ հետո չես կարող հագնել: Այդպիսին է նաև ամբողջ մեր կյանքը: Գալիս է մի օր, երբ դու գտնում ես կյանքիդ կեսին և ցանկանում ես ամեն օրդ նրա հետ անցկացնել, իսկ դրան հաջորդում է «բալիկ ունենալու ցանկություն» փուլը: Աստված մեզ նվիրեց մի հրաշք: Ասում են, որ այդ ամենը երբեմն վերածվում է հոգսի, բայց ուզում եմ ասել, որ դա հոգս չէ, երբ դու սիրում ես, երբ դու ունես սիրուց ծնված սեր, ապա այդ ամենը անչափ հաճելի է: Այս ամենը նույնիսկ համեմատելի չէ մասնագիտական ամենաբարձր հաջողության հետ: Չկա ավելի վեր զգացում, քան տունն ու ընտանիքը: Այս ամենը ինձ համար բացառապես հաճույք է:

-Այսպե՞ս էիք պատկերացնում մայր դառնալը:

-Միշտ վստահ եմ եղել, որ ամեն ինչ անելու եմ, որ լավ կին ու լավ մայր լինեմ: Ինձ ու մայր լինելու երևույթը՝ հենց այսպիսին էլ պատկերացրել եմ: Փորձում եմ հնարավորինս լավ տան տիկին ու մայր լինել:

-Ձեր որդուն անվանակոչել եք Անրի: Անվան ընտրությունը նախապատմություն ո՞ւնի:

-Սկզբում տատանվում էինք Դավիթ, Ալեքսանդր, թե՞ Անրի...հետո մանկությունից եկած տաք զգացողություն կար Անրի անվան հետ: Իմ ամենասիրելի ֆիլմերից մեկը Անրի Վերնոյի «Մայրիկ»  ֆիլմն է, որը միշտ տատիկիս հետ էինք նայում ու միշտ ասում էր, որ հեղինակը Անրին է: Մի տեսակ բոլորը միասին գումարվեց ու որոշումը կայացվեց: Հետո էլ մի Ալեքսանդր կամ Դավիթ կունենանք:

-Մինչ ընտանիք կազմելը տիրապետո՞ւմ էիք կենցաղային խնդիրներին:

-Այնպես է ստացվել, որ ես փոքր տարիքից սկսած եղել եմ կենցաղային հարցերում: Շատ հաճախ խոհանոցում եմ եղել, տարբեր ուտեստներ պատրաստել: Ընկերներիս մոտ լավ խոհարարի անուն ունեմ: Ասում են համեղ եմ պատրաստում ու փաստորեն ստացվում է, որ մինչ ամուսնությունը տիրապետել եմ կենցաղային խնդիրներին ու ընտանեկան «հոգսը» հոգս չդարձավ ինձ համար: Սիրուց ստեղծված ընտանիքում բոլոր խնդիրները լուծելի են:

-Երաժիշտների ընտանիքում ծնված  բալիկի  ձայները որքանո՞վ են երաժշտական:

-«Աղուների» երաժշտականության վրա դեռ չենք կենտրոնացել: Չենք էլ փորձելու տրամադրել, որ երաժիշտ դառնա: Շատ երաժշտություն լսել է դեռևս կրծքիս տակ: Տղաս շատ բնավորությունով է երևում և բավականին լուրջ ձայներ է արձակում:

-Անրին, այն քիչ բալիկներից է՝ ում օրորոցայինը երգչուհի է երգում: Ի՞նչ երգեր եք երգում քնեցնելիս:

-Հավանաբար չկա մի հայ բալիկ ում մայրիկը «Մութն ընկել է» երգը չի երգել իր բալիկի համար: Շատ սիրում է Արթուր Գրիգորյանի մանկական մյուզիքլի «Ծլինգ-ծլինգ» օրորոցայինը: Ընդգծված կերպով դասական երաժշտություն է սիրում: Երբեմն փորձում եմ ջազ կամ փոփ միացնել, բայց 2-3 րոպե անց նեղանում է ու ստիպում, որ իր սիրած մեղեդիները միացնեմ:

-Ի՞նչ տեսակ մայրիկ է Էմմա Ասատրյանը:

-Հավանաբար ես չասեմ, թե ինչ տեսակ մայրիկ եմ: Պարզապես մի բան գիտեմ, որ անչափ սիրում եմ բալիսկիս հետ ժամերով շփվել: Հեքիաթ եմ պատմում, խոսում տարբեր լեզուներով, բայց հավատացեք միմիկաներով ու աղուներով արձագանքում է: Խիստ եմ, երբ անհրաժեշտ է, բայց կարող եմ նաև անսահման երես տալ: Փորձում եմ մեծացնել այնպես, ինչպես ժամանակին ինձ են մեծացրել:

-Քանի՞ քույր ու եղբայր է ունենալու Անրին:

-Չփորձեմ գուշակություններ անել: Շատ կցանկանայինք ունենալ ևս մեկ տղա, բայց առաջ Աստված:

- Ի՞նչ մասնագիտություն կցանկանաք ընտրի Անրին: Ինչպիսի՞ն եք պատկերացնում նրան 20 տարի հետո:

-Մի անգամ փոքր եղբորս հարցեր էինք տալիս, թե ինչ մասնագիտություն կցանկանա ստանալ: Երկար մտածեց ու ասաց, որ լավ մարդ է ուզում դառնալ: Այ դա եմ ուզում որդուս համար: Չգիտեմ ինչու, բայց վստահ եմ, որ տղաս լավ մարդ է լինելու, դա նրա բնավորությունից երևում է: Թող առողջ ու երջանիկ լինի, իսկ մնացածը ժամանակի հետ կլինի:

Հարցազրույցը՝ Անահիտ Կասամանյանի

Լուսանկարները՝ Կարեն Հովհաննիսյանի