Հեռուստատեսային նախագծեր, երեկոյան աշխատանք ու ընտանիք. Լայանայի գլխապտույտ առօրյան

Tert.am Life-ը բավականին բովանդակալից զրույց է ունեցել երգչուհի Լայանայի հետ:

Ի՞նչ նոր նախագծի է մասնակցելու երգչուհին, ինչպե՞ս է կարողանում համատեղել կարիերան և տնային տնտեսությունը, այս և մյուս հարցերի պատասխանները զրույցում:

-Վերջին ժամանակաշրջանում երգչուհի Լայանան լուռ է: Ինչո՞վ է պայմանավորված Ձեր լռությունը:

-Բոլորը հարցնում են, թե ինչու չկա նոր տեսահոլովակ, իսկ դրա բացակայությունը բացատրված է նրանով, որ ամբողջ ամառ նկարահանվել եմ հանրային հեռուստաընկերությամբ հեռարձակվող  «Ամենակարող երգիչ» նախագծում: Հեռուստատեսային այս հարթակում մրցում են ռեստորանային այն երգիչները, ում կատարումները սովորաբար ուղեկցում են բոլորիս ուրախ առիթների ընթացքում: «Ամենակարող երգիչ»-ը հնարավորություն կտա նոր հայացքով և այլ հարթության մեջ դիտարկել երգիչ-երգչուհիներին` նրանց ուժերը յուրաքանչյուր շաբաթ փորձելով ամենատարբեր ժանրերում և թեմատիկ երգերում` սկսած ժողովրդականից մինչև հայրենասիրական և միջազգային կատարումներ, շանսոնից մինչև երևանյան երգեր: Իսկ թե որքանով ենք մենք «ամենակարող», կգնահատեն ժյուրիի հիմնական անդամները և հեռուստադիտողը:

-Գիտենք, որ ժուրիի անդամներն են Արթուր Գրիգորյանը, Նադեժդա Սարգսյանը, Գրիգոր Նազարյանը և հրավիրյալ ժյուրիներ՝ հաղորդման թեմաներին համապատասխան: Դժվար չէ աշխատել նման խստապահանջ մարդկանց հետ:

-Պիտի ասեմ, որ իսկապես դժվար է, քանի որ նրանք իսկապես խստապահանջ են: Անհամեստ չթվա, բայց երևի այս նախագծում ամենահայտնիներից մեկը ես եմ և ժուրիի անդամների այդ աստիճան քննադատությունները վրաս ազդել էին: Այս ամենին էլ հուզմունքն էր գումարվել, բայց հետո անցավ ամեն ինչ: Հեռուստադիտողը ևս մասնակցելու է քվեարկությանը: Հուսամ ամեն ինչ լավ ավարտ կունենա: Ամբողջ ամառ ջանացել եմ և հուսամ հեռուստադիտողի կողմից կգնահատվի:

-Փաստորեն ամառային հանգստից զրկվե՞լ եք:

-Չնայած այն բանին, որ հանգիստը շատ եմ կարևորում, բայց չհասցրի այս տարի:  Աչքս մնաց ծովի ճանապարհին: Երևի հանգիստը կմնա մյուս տարի: Նախագիծն էլ, որ ավարտվի էլի չեմ կարողանա հանգստի գնալ, քանի որ երեկոյան ակումբում եմ աշխատում ու օրս գերծանրաբեռնված է անցնում:

-Հեռուստատեսային նախագծեր, երեկոյան աշխատանք ու ընտանիք: Հաջողվո՞ւմ է համատեղել:

-Ես իսկապես համատեղում եմ: Ինձ համար բացարձակ առաջնային է ընտանիքս: Երբ ունես երեխա ու զգում ես դրա քաղցրությունն ու կարևորությունը, ապա բոլոր գործերը դառնում են երկրորդային, բայց զուգահեռ ուժ ես ունենում ամեն ինչ մեկում անելու: Մշտական աշխատանքս երեկոյան է և ես մինչ ժամը 7-ը ժամանակս ամբողջությամբ նվիրում եմ աղջկաս: Բալիկս դայակ ունի, բայց փորձում եմ ամեն ինչ ես անել: Այսօր նույնիսկ տոլմա եմ պատրաստելու, քանի որ ինձ հյուր է գալու սիրելի սկեսուրս:

-Երգչուհի Լայանան, մինչ ամուսնական կյանքն էլ էր կարողանո՞ւմ կառավարել տնային տնտեսությունը:

-Այնպես էր ստացվել, որ մայրս հաճախ էր բացակայում ու ես ինքնաբերաբար դարձել էի ինքնուրույն: Փոքր ժամանակվանից էլ այդպիսին եմ եղել: Միշտ անելիքներս իմացել եմ: Համաձայն եմ, որ ամուսնանալուց հետո ավելի հմտացա կենցաղային հարցերում: Թխվածքներ թխելու գործում առանձնապես չեմ փայլում, բայց ճաշատեսակներ պատրաստել սիրում եմ: Տան մաքրության հարցում միշտ չի, որ ամեն ինչ հասցնում եմ: Երբեմն համապատասխան մարդ է գալիս ինձ տնային գործերում օգնելու համար, բայց մեծ մասամբ ամեն ինչ հասցնում եմ:

-Վերջին շրջանում նկատելիորեն փոխվել է ձեր արտաքինը: Ինչպես եք հասել այս դրական փոփոխությանը:

-Բալիկս արդեն մեկուկես տարեկան է ու պիտի ասեմ, որ ծննդաբերությունից հետո գրեթե 25 կիլոգրամ քաշս ավելացել էր: Մեկուկես տարվա ընթացքում 26 կիլոգրամ նիհարել եմ: Խիստ հետևում եմ սննդակարգիս և մարզասրահ եմ հաճախում: Սննդակարգիցս հանել եմ հացամթերքը, գազավորված ըմպելիքներն ու քաղցրը: Երբեմն լինում է, որ չեմ կարողանում ինձ զսպել և «երես եմ տալիս» ինքս ինձ, բայց մեծ մասամբ կարողանում եմ պահպանել սահմանածս կարգը: Մրգեր, հնդկաձավար ու վարսակի փաթիլներ ուտում եմ առավոտյան, փորձում եմ շատ սպիտակուցներ օգտագործել ու հնարավորինս ապրել ակտիվ կյանքով: Մոտավորապես երկու լիտրից ավել ջուր եմ խմում ամբողջ օրվա ընթացքում: Ուզում եմ ասել, որ այն մարդիկ ովքեր հակում ունեն գիրանալու՝ պետք է ուտեն մտածելով ու առանց չարաշահելու:

Հարցազրույցը՝ Անահիտ Կասամանյանի