«Դոմինո» սիթքոմում շրջադարձներ են սպասվում. լուսանկարներ նոր տաղավարից

Շուտով կմեկնարկի «Դոմինո» սիթքոմի երրորդ եթերաշրջանը, որում սպասվում են նոր հերոսուհիներ, որոշ սցենարային փոփոխություններ և արդեն սիրված հերոսների հետ կապված նոր զարգացումներ։

«Դոմինո»-ի նոր եթերաշրջանում կլինեն նաև սյուժետային ինտրիգային զարգացումները: Միկան, Նորիկը և Գարիկը կշարունակեն ընկերությունը։ Ստեղծագործական կազմը խոստանում է այս եթերաշրջանում սիթքոմն ավելի հետաքրքիր դարձնել կանանց համար, ավելանալու են աղջկական թեմաներ: Բարձր վարկանիշ ունեցող սիթքոմը եթերում կլինի հոկտեմբերի 11-ից:

«Միանշանակ շատ հետաքրքիր է լինելու, քանի որ նախորդ երկու եթերաշրջաններից տարբերվելու է: Տարբերությունը կնկատվի, թե՛ սցենարային իմաստով, թե՛ նրանով, որ նոր կերպարներ են մուտք գործելու «Դոմինո»: Կան գեղեցիկ ու գունեղ նոր դեմքեր: Բոլորիս կերպարները ենթարկվել են փոփոխության: Կերպարները հայտնվելու են շքեղ վիճակներում: Նոր խնդիրներ ևս լինելու են: Սպասվում են բավականին դինամիկ իրավիճակներ»-, ասաց Նորիկի կերպարը մարմնավորող Նարեկ Բավեյանը:

Դերասան Սոս Ջանիբեկյանի մարմնավորած կերպարում բեկումնային նորություններ են սպասվում:

«Դերասանն իր բնույթով պետք այնպիսին լինի, որ միշտ ցանկանա նոր գույներ ու դրսևորումներ բերել ամեն անգամ: Ինձ համար «Դոմինո»-ն շատ հետաքրքիր նախագիծ է, որտեղ ես ինձ շատ լավ եմ զգում: Կարոտել էի նկարահանումները, իսկ անձնակազմին էլ  շատ եմ սիրում: Ես Միկային ամբողջությամբ ընկալել եմ, ըմբռնել եմ ու ստեղծագործում եմ նրա մաշկի տակ»,- ասաց Սոս Ջանիբեկյանը:

Սոսը պատմեց նաև Միկայի կերպարային զարգացումների մասին՝ չբացելով փակագծերը:

«Կերպարային իմաստով գլոբալ շրջադարձ կա, որը հետաքրքիր է նաև դրամատուրգիայի իմաստով: Այս եթերաշրջանում ընկերներս փորձելու են ինձ ամուսնացնել: Միկայի անունով գրված կտակ կա, իսկ դա սիթքոմի բնակիչներին մեծ ոգևորություն է պատճառելու : Կարծում եմ, որ մեր տաղանդաշատ սցենարիստները՝ Նարեկ Ավագյանը, Սարգիս Կալպակյանը և Խորեն Թևանյանը շատ հետաքրքիր թեմա են ընտրել:

Վերջերս  բոլոր հաղորդումներում, սիթքոմերում, բարեկամներիս, ընկերներիս շրջանակում բոլորն ինձ շարունակ փորձում են ամուսնացնել: Տեսնենք, թե վերջում ինչ կստացվի»,- ամփոփեց Սոսը:

Գարիկի անձնական-ընտանեկան կյանքում էական փոփոխություններ են սպասվում, որոնց մասին մեզ հետ զրույցում կիսվեց կերպարը մարմնավորող դերասանը՝ Մհեր Խաչատրյանը:

«Գարիկի ընտանիքը համալրվելու է  ևս մեկ անդամով:  Հայրիկ եմ դառնալու: Գլխավոր հերոսների կյանքում սպիտակ փուլ է լինելու: Տղաները մեծ քայլ են անելու: Ըստ ստեղծված պայմանների կերպարները նոր զարգացումների մեջ են հայտնվելու: Կերպարս նոր հոբբի ու բիզնես է ունենալու»,- պատմեց Մհերը:

Սցենարական մասով փոփոխություններն էական են, իսկ մանրամասների մասին Tert.am Life-ին պատմեց սցենարի հեղինակներից մեկը՝ Սարգիս Կալպակյանը:

«Մոտավորապես 4-5 կերպար այլևս նոր եթերաշրջանում չեն լինի: Գլխավոր կերպարներից բացի, պահպանել ենք Սոնա Շահգելդյանի, Սաթիկ Ղազարյանի կերպարները: Անհրաժեշտ էր էական թարմություն և մենք դրան հասանք, իսկ այն կերպարները, որոնք չկան խնդիրը նրանց մեջ չէ, հակառակը՝ նրանք այն մարդիկ են, ովքեր պրոֆեսիոնալ են իրենց գործի մեջ: Պարզապես այդ կերպարներն արդեն սպառվել էին: Ավելանում է Արփինե Իսրայելյանի կերպարը, ով լինելու է Նորիկի՝ Նարեկ Բավեյանի քույրը: Հեռուստադիտողը Արփինեին էկրանին հաճախ տեսնելու հնարավորություն կունենա»,- եզրափակեց Սարգիս Կալպակյանը։

Անահիտ Կասամանյան