Երգիչ Հայկոն պարգևատրվել է «Երախտագիտության» մեդալով

13:15 • 21.09.16

Երգիչ Հայկոն պարգևատրվել է «Երախտագիտության» մեդալով՝ Արցախի նախագահ Բակո Սահակյանի կողմից։

Tert.am Life-ի հետ զրույցում երգիչ Հայկոն կիսվեց իր տպավորություններով և խոսեց Անկախության տոնի մասին։

«Սեպտեմբերի 20-ին Արցախի Հանրապետության նախագահականում մեծ ընդունելություն էր կազմակերպվել մի շարք հայտնի արտիստների և տարբեր բնագավառների մարդկանց համար։ Նախագահ Բակո Սահակյանը «Երախտագիտության» մեդալ շնորհեց ներկաներին, որն ինձ համար շատ կարևոր պարգևատրում էր»,- ասաց Հայկոն։

Նշենք, որ այս մեդալը հատկանշական է Հայկոյի համար, քանի որ նա առաջին անգամ է Արցախում պարգևատրվում։

«Ապրիլյան դեպքերի ժամանակ, որպես արվեստագետ ես շատ ակտիվ էի և կանգնած էի բանակի կողքին։ Այս մեդալն Արցախի կողմից ինձ շնորհակալությունն էր։ Անկեղծ ասած ես դրան չէի սպասում։ Ես պատրաստակամ եմ, միշտ մեր բանակի կողքին եմ։ Ինձ համար սա նշանակալից էր, քանի որ առաջին անգամ Արցախում ստացա պետական պարգև»,- հավելեց երգիչը։

Անկախության 25-ամյակի առթիվ Հայկոն շնորհավորեց բոլոր հայերին. «Շնորհավորում եմ ՀՀ Անկախության 25-ամյակը։ Շատ եմ ուզում, որ մեր երկիրը լինի հզոր, բանակը լինի ամենաուժեղը, քանի որ դա մեր խաղաղության գրավականն է։ Շատ եմ ուզում, որ հայերը լինեն երջանիկ ու ապրեն խաղաղ, անկախ երկրում»։

Մեզ հետ զրույցում Հայկոն շտապում էր Երևան, որպեսզի մասնակցի երեկոյան կազմակերպված տոնական համերգին։

Մենք նաև երգչից հետաքրքրվեցինք՝ ինչո՞վ է զբաղվել նա այս ընթացքում և ի՞նչ նոր աշխատանքներ է պատրաստվում ներկայացնել։

«Ունեմ մի քանի կատարումներ, որոնք իմ երկրպագուներին կներկայացնեմ տեսահոլովակով։ Որոշներն արդեն պատրաստ են, բայց դեռ աշխատանքներ են տարվում»,-ասաց նա։

Չնայած Հայկոն չի սիրում իր կատարած աշխատանքների մասին շատ խոսել, բայց մենք գիտենք, որ երգիչը խնդրանք նամակ է ուղարկել «Ատեկ» միջազգային ընկերությանը, որպեսզի հայ երեխաներն էլ մասնակցեն ճամբարին և ահա 28 երեխա վաղը կվերադառնա այնտեղից։

Լիլիթ Բոշյան