«Ամենակարող երգիչ»-ն առաջացրել է արվեստագետների զայրույթը. կարծիքներ

Լուսինե Բադալյանը, Վահան Արծրունին և Արամոն հայտնել են իրենց բացասական կարծիքը «Ամենակարող երգիչ» հաղորդման վերաբերյալ։

Առաջին ալիքն իր նոր եթերաշրջանը սկսել է երաժշտական նոր հաղորդումներով: Շարքը սկսել է «Ամենակարող երգիչ» նախագիծը, որը շատ արվեստագետների զայրույթի պատճառն է դարձել: Հեռուստատեսային այս հարթակում մրցում են ռեստորանային երգիչները, նրանք ներկայանում են  տարբեր երգերով՝ փորձելով ամենատարբեր ժանրերում սկսած ժողովրդականից մինչև հայրենասիրական և միջազգային կատարումներ, շանսոնից մինչև երևանյան երգեր: Իսկ թե որքանով են նրանք «ամենակարող», գնահատում են ժյուրիի հիմնական անդամներ Արթուր Գրիգորյանը, Նադեժդա Սարգսյանը, Գրիգոր Նազարյանը և հրավիրյալ ժյուրիներ՝ հաղորդման թեմաներին համապատասխան:

Թեմայի շուրջ զրուցեցինք երգահան Վահան Արծրունու, հաղորդավար Լուսինե Բադալյանի և երգիչ Արամոյի  հետ: Առաջին ալիքի հանրային կապերի բաժնից պատասխանեցին, որ շուտով պաշտոնական մեկնաբանություն կտարածվի թեմայի շուրջ:

«Ցավոք, այսօր Հայաստանում տեսանելի է մշակութային այն դաշտը, որը ներկայացված է պաշտոնական, պալատական ինստիտուտներով՝ վարձու կառույցներով ու արվեստագետներով. սա իրականություն է, որը սնվում է դրսից բերվող կաբալյեներով ու էլի այլ արտեֆակտներով: Մեր տան հեռուստացույցը անջատված է և ֆիզիկապես այդ հաղորդումը տեսնել չէի կարող: Հաղորդման մասին իմացել եմ իմ լավ ընկեր Հասմիկ Պապյանի գրառումից: Պետք է ասեմ, որ անգամ չզարմացա, քանի որ 25 տարվա մեր մշակութային քաղաքականությունը, ռաբիսների արժևորումը և մնացած ապազգային երևույթներն արդի ոլորտում այնպիսին է եղել, որ նման ձևաչափի հաղորդման հայտնվելը համարում եմ բնական և տրամաբանված»,- Tert.am Life-ի հետ զրույցում ասաց կոմպոզիտոր-երգիչ Վահան Արծրունին:  

Երգիչն այս հարցում պայքարի իր մեթոդներն ունի և գտնում է, որ որպես արվեստագետ իր հասանելիքն անում է, իսկ գլոբալ առումով լուծումները հետևյալում է տեսնում.-«Ակնհայտ է, որ նույն միջոցները պետք է ներդնել, որպեսզի պրոպագանդվի իրական արժեքավորը, իրական բովանդակային արվեստը  և վերափոխվի ազգային մշակութային բանաձևը: Պետք է հակադրել անճաշակությանը, անբովանդակայինը փոխարինել բովադակայինով: Ես արդեն ասել եմ, որ մարդիկ, ովքեր հնարավորություն ունեն իրենց ուշադրությունը այս խնդրին բևեռելու, ապա պետք է կազմեն ֆոնդ, ունենան սեփական հեռուստատեսությունն ու ռադիոն: Կարծում եմ, որ այս դեպքում մամուլի զգալի մասը կողմ կլինի այս ամենը լուսաբանելու և որոշ ժամանակ հետո այս  իրավիճակը կշտկվի, քանի որ մեր ազգի կորիզը  բովանդակային է:  Մեր ազգը ընդունակ է ոչ միայն սեփական մշակույթն ընկալելու, այլև միջազգային արժեքներն  ընկալելու ու ներկայացնելու և դրա փորձառությունը մենք անշուշտ ունենք, սակայն երբ ամբողջ պետական մեխանիզմը  բոլոր մակարդակներով աշխատում է այդ ձևաչափի դեմ, ապա մենք ստանում ենք հակառակ պատկերը,  որով մթնոլորտը ողողված է արդեն 25 տարի»:

Այս առթիվ իր զայրույթը չի թաքցրել աշխարհահռչակ օպերային երգչուհի Հասմիկ Պապյանը, որի մասին ասաց Արծրունին: Ստորև երգչուհու ֆեյսբուքյան գրառումը.

«Ոտքի՛ հայ ժողովուրդ: Սա երկար մտածված, լավ կազմակերպված և մեր մշակույթը վերջնականապես կացնահարելու հանցավոր գործողություն է: Անհրաժեշտ է այն անհապաղ դադարեցնելու միջոցներ ձեռք առնել»:

Tert.am Life-ը զրուցեց նաև հաղորդավարուհի Լուսինե Բադալյանի հետ, ով միշտ առանձնանում է իր համարձակ մեկնաբանություններով:

«Ես իմ հստակ կարծքին ունեմ «Ամենակարող երգիչ» հաղորդման կարողությունների մասին, բայց ուզում եմ խոսել առհասարակ ռաբիսի պրոպագանդման մասին: Ես մեկն եմ, ով առաջին օրերից պայքարում է ռաբիս երաժշտության պրոպագանդման դեմ, ինչի արդյունքում ձեռք եմ բերել բազմաթիվ թշնամիներ, գործնական առումով շատ խնդիրներ, բայց դա ինձ չի խանգարել, որ ես իմ կարծքին մնամ: Այն վայրկյանից, ինչ ռաբիսը մուտք է գործել հեռուստատեսություն, մեր հասարակության կրթության մակարդակը հստակ իջել է: Շատ ցավալի է, որ ավելի մեծ  լսարաններով հեռուստաընկերությունները արդեն պաշտոնապես պրոպագանդում են ռաբիսը: Այս ամենի ակունքները ավելի խորը տեղերում է պետք փնտրել: Ամեն ինչ արմատավորվեց այն ժամանակ, երբ Արմենչիկը ստացավ վաստակավոր արտիստի կոչում: Սրանից հետո զարմանալու ոչինչ  չկա»,-եզրափակեց Լուսինե Բադալյանը:

Չթերագնահատելով ռեստորանային երգիչներին, երգիչ Արամոն ցանկանում է, որ բոլորն  իրենց տեղում լինել ու գոնե Հանրային հեռուստաընկերությունը զերծ մնա «կլկլոց» հրամցնելուց:

«Շատերի մոտ կա թյուրըմբռնում, որ 6/8 երաժշտական չափը դա ռաբիսի ռիթմն է, պիտի ասեմ, որ Կոմիտասն էլ հրաշք ստեղծագործություններ ուներ ու դրանք գրված էին հենց 6/8-ով:  Հստակ տարբերելով ռաբիս երաժշտությունն  ու ռիթմերը ուզում եմ ասել, որ «Ամենակարող երգիչ» հաղորդումը  չափազանց վատն էր, չնայած մի պահ եմ նայել: Հազար անգամ կներեք արտահայտությանս համար, բայց  սարսափելի զզվելի էր, կլկլոցները անտանելի էին: Միգուցե այլ եթերներ այդպես չլինեն, բայց տեսածս դիտելու բան չէր: Այնպիսի տպավորություն էր, որ նույն երգը 6 հոգով երգում են, իսկ տեքստի մասին խոսք անգամ լինել չէր կարող: Ինձ թվում է  կա տենդենց, որ ով ինչքան բարձր է գոռում, ապա  այդքան ավելի շատ է էքստազի մեջ ընկնում: Հեղինակներին խորհուրդ կտամ վերանայել հաղորդումը: Փոխարենը Հանրայինն ունի «Երգ երգոց» երաժշտական թողարկումը, որը փայլուն է իր տեսակի մեջ»,- իր տեսակետն այսպես ձևակերպեց երգիչ Արամոն:

 Նյութը՝ Անահիտ Կասամանյանի