Կարևորը նա լավ մարդ լինի և ուժեղ. Մարտա Սարգսյանը ԱՄՆ-ում հաղթահարած դժվարությունների և անձնական կյանքի մտորումների մասին

Մարտա Սարգսյանը Հայաստանում գործունեություն ծավալող լավագույն մոդելների տասնյակում էր, բայց մի օր նա ամեն ինչ թողնում և մեկնում Միացյալ Նահանգներ։ Մարտան շուրջ 6 տարի է ինչ բնակվում է ԱՄՆ-ում։

Tert.am Life-ի հետ զրույցում նա պատմեց հեռանալու պատճառների և ներկա զբաղվածության մասին։

«Հայաստանում ինձ համար միապաղաղ էր ամեն ինչ, դա ինձ ձանձրացնում էր։ Դրա համար փորձեցի ռիսկի դիմել և նոր կյանք սկսել ԱՄՆ-ում։ Հիմա զբաղվում եմ հյուրանոցային և ռեստորանային բիզնեսով։ ԱՄՆ-ն ինձ համար հնարավորությունների երկիր է, որտեղ մարդկանց իրավունքները չի ոտնահարվում։ Եթե աշխատասեր ես ու ունես նպատակ հաստատ կհասնես բարձունքների։ ԱՄՆ-ն ինձ նոր շունչ ու փորձ պարգևեց»,-ասաց Մարտան։

Վերջինս խոսեց իր մոդելային կարիերայի մասին։

«Երբեք չեմ մտածել մոդելային կարիերան դարձնել հիմնական մասնագիտություն։ Ի վերջո, ցանկացած մոդել ցանկանում է ուսում ստանալ և զբաղվել հիմնական եկամուտ բերող մի ուրիշ գործով, որովհետև մոդելային գործը ժամանակավոր բնույթ է կրում։ Իսկ գիտելիքներով շատ բարձունքների կարող ես հասնել»,- նշեց Մարտան։

Հարցին՝ ի՞նչ դժվարությունների միջով եք անցել, նա պատասխանեց. «Ոչ մի բան հեշտ չի տրվում։ Հատկապես, երբ գալիս ես բոլորովին քեզ անծանոթ երկիր և զրոյից ես սկսում աշխատել ու սովորել։ Այլ մշակույթ, այլ մտածելակերպ... Նահանգներում սկսել եմ ամենացածր աշխատանքից և այս 6 տարվա ընթացքում ոչ մի րոպե չեմ նահանջել՝ հաղթահարելով տարբեր դժվարություններ, որոնց ամեն պահ առնչվում էի։ Կարևորն ընկնելուց կարողանաս նորից վեր բարձրանալ ու շարժվել առաջ։ Դա ուժեղ մարդու հատկանիշներից մեկն է։ Միշտ առաջ շարժվել և բարձրանալով դեպի վեր՝ չկանգնել, եթե բարձունքն անգամ վախ առաջացնի։ Վերջիվերջո սկսում ես դրան էլ հարմարվել ու հաղթանակի համը սկսում է ավելի քաղցր թվալ։ Հատկապես, երբ ինքդ քո ուժերով ես վաստակում այն»։

Կարող ենք ենթադրել, որ Մարտան Երևան վերադառնալու մտադրություն չունի։ Նրա խոսքով. «Այս տարի այցելեցի Երևան. իմ հարազատ մարդկանց տեսնելու համար, բայց միայն այդքանը»։

Զրույցի ընթացքում նաև հետաքրքրվեցինք մոդելի անձնական կյանքով։

«Երբ հանդիպեմ համապատասխան թեկնածուի միանգամից կմտածեմ ամուսնության մասին։ Տղամարդու իդեալ որպես այդպիսին չունեմ։ Ինձ համար կարևորը լավ մարդ լինի ու բնավորությամբ ուժեղ, որ ինձ դիմանա (ծիծաղում է)»,- ասաց Մարտան։

Իսկ առաջիկա ծրագրերի մասին մոդելը չցանկացավ մանրամասնել. «Ներկա պահին շարժվում եմ առաջ, իսկ դա ամենակարևորն է»։

Մելինե Տոնոյան