Զարուհի Բաբայանը, Անդրեն, Հայկոն, Անահիտ Սիմոնյանը և այլք «Սաֆ» ակումբի բացմանը (լուսանկարներ)

Հոկտեմբերի 30-ին երգիչ Արսեն Սաֆարյանն իր ակումբում հյուրընկալել էր իր ընկերներին ու հարազատներին՝ տոնելու «Սաֆ» ակումբի պաշտոնական բացումը:

Հյուրերի ցանկում էին՝ Զարուհի Բաբայանը, Արսեն Գրիգորյանը, Անդրեն, Հայկոն, Անահիտ Սիմոնյանը, Սոֆի Դևոյանը, Գրիգոր Դանիելյանը, Լուիզա Ներսիսյանը, Մաշա Մնջոյանը, Արթուր Գրիգորիչը, Հրաչյա Քեշիշյանը և այլք:

Tert.am Life-ի հետ զրույցում Արսենը պատմեց ակումբի մասին:

«Ընկերներիս՝ Արմենի և Հասմիկի, միտքն էր ակումբ ունենալը: Բարին ակնկալելով ՝ սկսել ենք աշխատել և 2  տարվա ընթացքում ստացել ենք այն, ինչ կա: Ակումբն ունի երկու սրահ՝ մեկը շոու ծրագրերի, միջին և փոքր տոնական օրերի համար է, իսկ հաջորդը՝ կենդանի կատարումների համար է, որտեղ ես ինքս ունենալու եմ փոքր մենահամերգ՝ շաբաթը մեկ անգամ: Շաբաթվա մնացած օրերին ելույթ կունենան երիտասարդ, տաղանդավոր երգիչ-երգչուհիներ: «Սաֆ» ակումբում կերգեն այն մարդիկ, որոնք իրենց ձայնով մեծ տպավորություն կթողնեն, իսկ ներկաները ոչ թե կասեն ՝ «ո՞վ է նա» , այլ՝ «ինչ լավ է երգում»: Այս սկզբունքով եմ ընտրություն կատարել: 20 տարի առաջ ես էլ էի նոր, և այն ժամանակ էլ ինձ էին տարբեր հայացքներով նայում: Իսկ հիմա մենք պետք է օգնենք տաղանդավոր երիտասարդների՝ իրենց ուղին հարթելու»,- ասաց երգիչը:

Երգչի խոսքով՝ «Սաֆ» ակումբում հեղինակային երեկոներ կունենան նաև մի շարք հայտնի արտիստներ:

«Ինչ-որ հատուկ օր, մեծ սիրով, մենահամերգ կտամ այստեղ, իսկ Արսենին կասեմ՝ «պատրաստվի գալու եմ գրպաններդ դատարկել» (ծիծաղում է): Սա այն վայրն է, որտեղ կարող ես վայելել  կենդանի նվագակցությամբ կատարումներ: Կարծում եմ, Արսենը պետք է այստեղ բերի այն հանդիսատեսին, որ ժամանակին մեկ օրվա համար համալիրի տոմսեր էին գնում և գնում լսելու նրան»,- ասաց Անդրեն:

Երգչուհի Զարուհի Բաբայանն էլ ցանկություն հայտնեց՝  «Սաֆ» ակումբում հեղինակային երեկո ունենալու:  

«Սա շատ սպասված օր էր Արսենի կյանքում: Շատ ուրախ եմ, որ այս հրաշք վայրը քաղաքում բացվեց: Վստահ եմ, որ այս ակումբը գործելու է երկար տարիներ և ունենալու է լեցուն դահլիճներ: Ես ինքս ել եմ ուզում այստեղ ելույթ ունենալ, ինչի մասին արդեն խոսել եմ Արսենի հետ: Ուզում եմ, որ այստեղ լինեն մարդիկ, որոնք հավատարիմ են և սիրում են լավ երաժշտություն, իսկ Արսենի ելույթներն ամենաառաջին կանչող հանգամանքը կլինի»,- նշեց Զարուհին՝ եզրափակելով. ««Սաֆ» ակումբը լավագույն երաժշտական ժամանցային վայրերից մեկն է լինելու: Սա տարբերվում է մյուս ակումբներից նրանով, որ զգում ես Արսենի ներկայությունը: Նա դիմավորում է, ճանապարհում, այսինքն` փորձում է յուրաքանչյուրին անհատական մոտեցում ցուցաբերել»:

Նյութը՝ Մելինե Տոնոյանի

Լուսանկարները՝ Հարութ Մալխասյանի