«30 տարվա ամենամեծ ձեռքբերումս ամուսինս է». Մերի Ներսիսյան

Հաղորդավարուհի Մերի Ներսիսյանն այսօր տոնում է իր 30-ամյակը: Հաղորդավարուհին Tert.am Life-ի հետ զրույցում պատմել է, թե ինչ անակնկալներ է ստացել և ինչ զգացողություններ ունի ծննդյան 30-րդ հոբելյանին:

«Տարեդարձս սկսվեց փոքրիկ աղջկաս քնեցնելով, իսկ Էվան չէր քնել, որ առաջինը շնորհավորի: Հետո զգացի, որ տանն ինչ-որ աժիոտաժ է: Եղբորս ընտանիքը փուչիկներով, տորթով եկել էին շնորհավորելու: Կեսգիշերից սկսած բազում շնորհավորական մաղթանքներ եմ ստացել և շարունակում եմ ստանալ»,- ասաց Մերին:

Վերջինս իր ընկերների և հարազատների հետ պատրաստվում է երեկոյան տոնել տարեդարձի խնջույքը, որի կազմակերպչական հարցերով Գոռն է զբաղվել:

«30-ամյակիս խնջույքը Գոռն է կազմակերպել: Մոտ մեկ ամիս է նա նախապատրաստական գործերով էր զբաղված: Հատուկ աքսեսուարներ, լուսանկարվելու համար հատուկ հարթակ. ամեն ինչ Գոռի մտահաղացումն է եղել: Երեկոյան կտեսնենք այդ բոլորը, իսկ թե ինչ անակնկալ է պատրաստել, դրա մասին դեռ չգիտեմ (ժպտում է)»,-նշեց հաղորդավարուհին:

Շատերի համար 30-ը շրջադարձային, առանձնահատուկ տարիք է, իսկ  Մերիի համար. «Ես չեմ զգում, որ 30 տարեկան եմ: 20 տարեկանում այլ կերպ էի պատկերացնում 30-ը, բայց հիմա էլ 40-ն եմ այդպես պատկերացնում:  Կարծում եմ մարդը երբեք իր տարիքը չի զգում: Անգամ 50 տարեկանում ես ինձ մեծ չեմ համարի: Այնուամենայնիվ յուրաքանչյուր տարիք իր հետաքրքրություն ունի: 30-ը մի փոքր վախեցնում է, քանի որ 20-ի մեջ երիտասարդության շունչ կա: Բայց բոլոր ընկերներս էլ համոզում են, որ 30-ի մեջ էլ այդ նույն զգացողությունը կա: Անկախ նրանից, որ մենք ամեն տարի մեծանում ենք միևնույն է ես ինձ զգում եմ 20 տարեկանի նման: Չգիտեմ ինչու, բայց այդ տարիքը տպավորվել է իմ մեջ»:

Հաղորդավարուհին նշեց, որ իր կյանքի ամենամեծ ձեռքբերումը Գոռն է:

«Ամենամեծ ձեռքբերումս ամուսինս է: Չեմ ասում բալիկներս, քանի որ կնոջ համար ամենաառաջինն ամուսինն է: Ամուսնու շնորհիվ է, որ ընտանիքը կայուն է, երեխաներն ապահով: Եթե վատ ամուսին ունենաս, ապա ընտանիքդ այն չի լինի: Ես երջանիկ եմ, ունեմ հիանալի ընտանիք և դրա համար ամուսնուս եմ շնորհակալ»,- հավելեց Մերին:

Վերջինս տարեդարձին սիրում է ստանալ օգտակար նվերներ:

«Սիրում եմ ստանալ օգտակար նվերներ, որոնք ես կօգտագործեմ: Չեմ սիրում, երբ հուշանվերներ են նվիրում: Շատ եմ գնահատում մարդկանց անկեղծությունը, որ ի սրտե շնորհավորում են: Առարկայական նվերները երկրորդային են»,-եզրափակեց Մերին:

Լիլիթ Բոշյան