Ժան Նշանյանը, Գուժ Մանուկյանը, Շաքե Թուխմանյան, Հրաչյա Հարությունյանը և այլք Էվելինա Շահիրյանի հոբելյանական երեկոյին (լուսանկարներ)

Երևանի Հրաչյա Ղափլանյանի անվան պետական դրամատիկական թատրոնում ավագ սերնդի ներկայացուցիչների հետ կինոյի և թատրոնի սիրված դերասանուհի, ՀՀ վաստակավոր արտիստ Էվելինա Շահիրյանը տոնեց իր ծննդյան 75-րդ հոբելյանը: Հանդիպման վայրը պատահական չի ընտրված. 1969 թվականից սկսած Էվելինա Շահիրյանը հավատարմորեն ծառայել և իր գործունեությունը ծավալել է հենց այդ թատրոնում:

Երեկոյի ընթացքում ներկա էին ՀՀ առաջին տիկին Ռիտա Սարգսյանը, ՀՀ մշակույթի նախարար Արմեն Ամիրյան, Ժան Նշանյանը, Գուժ Մանուկյանը, Շաքե Թուխմանյան, Հրաչյա Հարությունյանը, Տիգրան Ներսիսյանը, Նելլի Խերանյանը, Արմեն Մարության, Ալլա Վարդանյան, Արթուր Ութմազյան, Ֆորշը և շատ ուրիշներ:

Նախքան բեմելը Էվելինան լրագրողների հետ խոսեց իր խաղացած դերերի և 75 տարիների ձեռքբերումների մասին:

«Այն դերերը, որոնք ինձ տրվել են, ես հաճույքով եմ խաղացել: Արտիստի համար ամենակարևորն այն է, որ պահանջված լինի բոլոր տարիներին, և ես դրա պակասը չեմ զգացել: 75 տարիները ինձ և՛ ուրախացնում է, և՛ տխրեցնում. այդ տարիները եղել են երջանիկ տարիներ, չնայած որ ունեցել եմ նաև տխրելու առիթներ: 75-ը այն թիվն է, երբ դու հասկանում ես, որ շատ կեսն անցել է, մնացել է արդեն քիչ կեսը: Եվ այդ փաստը տխրեցնում է»,- ասաց Էվելինան:

Տարբեր ժամանակների գեղեցկուհին բացահայտում է իր հմայքի գաղտնիքը. «Շատերն են ինձ այդ հարցը տվել՝ «ո՞րն է քո գեղեցկության գաղտնիքը», բայց ես իսկապես չգիտեմ, պարզապես կասեմ, որ հոգում ոչ մի վատ բան չպահել, ուրախանալ յուրաքանչյուր օրով, ընդունել այն ինչ տալիս է յուրաքանչյուր բացվող առավոտը, լինել բարի ու չարություն չունենալ սրտում»:

Ինչպես իր ընկերներն են բնութագրում՝ «Էվելինան երբեք կյանքում չի խաղում: Նա այնպիսին է, ինչպիսին, որ կա»:

Հոգատար կին, մայր և տատիկ. Արման Մարգարյանը մեզ հետ զրույցում պատմեց, թե ինչ խրատներ է տվել իրեն տատիկը և ինչ դեր է ունեցել իր կյանքում:

«Ֆանտաստիկ խոհարար, դիզայներ է նա: Լեգենդներ կան անգամ նրա մասին. երբ Էվելինայի տուն ես գալիս, կապ չունի ինչ-որ առիթ կա, թե ոչ, սեղանին նայում ես ու ափսոսում այդ ձևավորած սեղանը քանդել, բայց մեկ է քանդում ես, քանի որ գիտես՝ այն ամեն ինչը, որ կա շատ համով է: Մանկուց շատ եմ սիրել նրա պատրաստած յուրաքանչյուր ուտեստը: Իսկ իմ պրոֆեսիոնալ կարիերայի համար նա շատ կարևոր մարդ է: Նրա թոռը լինելը առաջին հերթին պարտավորեցնող է: Նա միշտ ինձ խորհուրդներ է տվել կապված հաղորդավարական գործի հետ: Էվելինայի մոտ ամեն ինչ հավասարակշռված է եղել, երբ պետք է եղել երես է տվել, պետք է եղել նախատել է»,- ասաց Արմանը:

Վերջինս նշեց, որ իր տատիկին մանկուց մինչ օրս մամա է անվանել:

«Տատիկիս միշտ մամա եմ անվանել, մի պարզ պատճառով. երբ 8 ամսական էի պապաիս տարան բանակ: Ես ու մայրս 2 տարի ապրեցինք տատիկիս ու պապիկիս տանը: Քեռիս ու մայրս, որ մամա էին ասում Էվելինային, ես էլ սկսեցի մամա ասել և մինչև հիմա այդպես էլ շարունակվում է»:

Սովորաբար տատիկներն իրենց թոռներին միշտ խրատներ են տալիս, եւ Էվելինան բացառություն չի եղել:

«Երբ երիտասարդ ժամանակ ռոքեր էի, սիրում էի մարդկանց երեսին ասել այն, ինչ մտածում եմ և կամ չունի նրանց նեղացնում եմ, թե՝ ոչ: Տատիկս միշտ ասում էր՝ «եթե վատ կարծիք ունես ինչ-որ մեկի նկատմամբ կամ երևույթի, մի արտահայտի դա, պարզապես լռի: Համ մարդուն մի նեղացրա, համ էլ գուցե հետո կարծիքդ փոխվի: Բոլորի հետ լավ եղիր և մի փչացրու հարաբերություններդ»: Իսկապես, այս տարիների ընթացքում հասկացել եմ, որ ինչ տալիս ես, այն՝ ստանում»,- եզրափակեց Արմանը:

Հոբելյանական միջոցառումը բեմից հետ հայացք գցեցին՝ հիշելով և վերհիշելով փաստեր ու ակնթարթներ դերասանուհու գործունեության վերաբերյալ, որոնք ջերմ են և սիրելի, հին և նոր միաժամանակ:

Հատկանշական է, որ միջոցառմանը Էվելինա Շահիրյանը թատերարվեստի ոլորտում նշանակալի ավանդի համար, ինչպես նաև ծննդյան 75-ամյակի կապակցությամբ ՀՀ մշակույթի նախարարի կողմից պարգևատրվեց «Գրիգոր Նարեկացի» հուշամեդալով և Երևանի քաղաքապետի որոշմամբ՝ «Երևանի քաղաքապետարանի ոսկե մեդալով»:

Նշենք, որ միջոցառման ընթացքում համերգային կատարումներով ելույթ ունեցան Ֆորշը, Հայկոն, Էմմա Պետրոսյանը, Արսեն Սաֆարյանը և այլ երգիչներ: Հոբելյանական միջոցառումը վարեցին էվելինա Շահիրյանի դուստրն ու թոռը` դերասանուհի Նաիրա Շահիրյանը և հաղորդավար Արման Մարգարյանը:

Նյութը՝ Մելինե Տոնոյանի

Լուսանկարները՝ Արշակ Ռոստոմյանի