Ո՞վ կդառնա Սոս Ջանիբեկյանի հարսնացուն. մասնակիցների կարծիքները  (լուսանկարներ)

Գեղեցկուհիների պայքարը «Արմենիա պրեմիում» հեռուստաալիքի եթերում շարունակվում է: «Ցանկալի փեսացուն» reality show-ի 12 մասնակիցներից արդեն մեկը լքել է նախագիծը: Թե ինչ զարգացումներ կլինեն հետագայում և ով կլքի նախագիծը հաջորդը, կարող եք դիտել ուրբաթ ժամը՝ 21:00-ին:

Tert.am Life-ը մասնակիցներից մի քանիսի հետ զրուցել է նախագծի և իրենց կանխատեսումների մասին: Յուրաքանչյուրը ներկայացրեցին, թե ինչու պետք է Սոսը հենց իրենց ընտրի:

-Ալեքսանդրա Սամուելենկո

-Շատ ուրախ եմ, որ մասնակցում եմ այս նախագծին: Իմ կյանքն ամբողջությամբ փոխվել է: Շատ հաճելի է, որ ծանոթացել եմ աղջիկների հետ ու կարծում եմ՝ մեր շփումն ու ընկերությունը կշարունակվի նախագծից հետո: Սոսին դեռ լիովին չեմ բացահայտել, բայց միևնույն է արդեն ունեցել ենք հուզումնալից պահեր, արցունքներ: Սկզբում դժվար էր իհարկե, բայց հետո սովորեցինք, որ մեր ամեն մի խոսքը ամեն մի հանդիպումը նկարահանվում է և ցույց տվեցինք մեզ ինչպես որ կանք: Կարծում եմ Սոսն ինձ կընտրի, քանի որ խորը մարդ եմ:

-Էվելինա Օրդյան

-Նմանատիպ նախագծում երբեք ինձ չէի պատկերացնի, բայց շատ ուրախ եմ և չեմ փոշմանել, որ մասնակցում եմ, քանի որ ոչ միայն Սոսին եմ սկսում ճանաչել, այլ նաև լավ ընկերներ եմ ձեռք բերել, որոնց հետ նախագծից հետո էլ կշարունակեմ շփվել: Այս նախագիծն ինձ համար շատ կարևոր է դարձել, քանի որ սկզբում մտածում էի, որ սա պարզապես շոու է, բայց հետո հասկացա, թե ինչ աստիճան իրական է ամեն ինչ: Նախագծից առաջ Սոսին համակրում էի որպես դերասան, իսկ նախագծի ընթացքում առաջացան ավելի ուժեղ զգացմունքներ, որոնք ստիպում են էլ ավելի ուժեղ պայքարել: Կարծում եմ Սոսը ինձ կընտրի, քանի որ ես առանձնանում եմ իմ անկեղծությամբ, իսկ Սոսը դա շատ է գնահատում:

-Աննա Շախկյան

-Կարծում եմ Սոսը ինձ կընտրի, քանի որ իմ ու իրա մեջ կան և՛ նմանություններ, և՛ տարբերություններ: Որքանով, որ բացահայտել եմ Սոսին նա էլ ինձ նման հանգիստ է սիրում, իսկ մնացած նախասիրություններս էլ հուսամ կհամընկնի, իսկ եթե չհամընկնի, ապա ավելի հետաքրքիր կլինի ինձ բացահայտել:

- Մերի Մովսիսյան 

-Կարծում եմ Սոսը ինձ կընտրի, քանի որ երկուսս էլ նույն ոլորտից ենք՝ երկուսս էլ դերասան ենք: Չնայած նրան, որ տարիքային տարբերությունը շատ է, բայց նա դրա վրա ուշադրություն չի դարձնում, քանի որ նա ավելի շատ գնահատում է մարդկային արժեքները:

-Սերինե Խոդիկյան

-Սկզբում այս նախագծին վերաբերվում էի որպես շոու, բայց հետո հասկացա, թե ինչքան խորն է այն: Սա պարզապես նախագիծ չէ, որը տարբեր զգացմունքներ է առաջացնում մեր մեջ: Սա մի կյանք է, մի շրջան, որով մենք ապրում ենք, որը մեր միջով անցնում է: Բոլոր մասնակիցներն էլ շատ տարբեր են իրարից և Սոսի համար իսկապես դժվար կլինի ընտրելություն կայացնել: Բայց անկախ նրանից ում էլ, որ նա ընտրի, ուրախ կլինեմ: Չեմ բացառում, որ Սոսը վերջում ընտրի իր իսկական կողակցին: Իսկ թե ինչու ինձ պետք է ընտրի, կասեմ, որ ես հետաքրքիր եմ իմ զանազանությամբ: Իսկ Սոսը սիրում է ամեն պահ բացահայտել կնոջը:

Նյութը՝ Մելինե Տոնոյանի

Լուսանկարները՝ Կարեն Գալստյանի