Սևակ Խանաղյանը «X Factor»-ում հաղթելու և «Եվրատեսիլ»-ում Հայաստանը ներկայացնելու մասին

Հայազգի Սևակ Խանաղյանին, որը մոտ 16 տարի է բնակվում է Մոսկվայում, շատերը կճանաչեն ուկրաինական «X Factor» նախագծից, որտեղ նա իր կատարումներով շարունակում է գերել թե՛ ժյուրիի կազմին, թե՛ հանդիսատեսին:

29-ամյա տաղանդավոր երիտասարդի յուրաքանչյուր կատարում մեծ տարածում է գտնում համացանցում, ինչն էլ փաստում է, որ Սևակը հասցրել է արդեն իսկ ձեռք բերել երկրպագուների մեծ բանակ:

Tert.am Life-ի հետ զրույցում երգիչը պատմել է ստեղծագործական կյանքի, մրցույթներում մասնակցելու և մյուս տարի «Եվրատեսիլ»-ում Հայաստանը ներկայացնելու ցանկության մասին:

«Երգել սկսել եմ մանկուց: Վերջերս եմ սկսել ստեղծագործել: Սովորաբար երաժշտությունը գրում եմ երգի բառերի հիման վրա, որովհետև ցանկացած տեքստ ունի իր մեղեդայնությունը, և ես այն կարդում եմ մեղեդու միջոցով: Ես աշխատում եմ հենց այս սկզբունքով, քանի որ դա ինձ մոտ հեշտ է ստացվում»,- ասաց Սևակը:

Նշենք, որ նախքան «X Factor» երաժշտական մրցույթը, նա մասնակցել է ռուսական «Главная сцена», «Голос» նախագծերին: Նրա կարծիքով՝ նմանատիպ նախագծերը ևս մեկ քայլով մոտեցնում են իրեն լսարանին:

«Նախագծերը հնարավորություն են տալիս մոտ լինել իմ լսարանին, որը ձեռք եմ բերել հենց այս ծրագրերի արդյունքում: Բացի այդ, դա մեծ հնարավորություն է՝ ստեղծագործական ներուժդ ցույց տալու և այն բոլորին լսելի դարձնելու համար: Կարծում եմ նման մրցույթներում գլխավորը հաղթանակը չէ, այլ արժանավայել կատարումը: Դրանով դու ազնիվ կլինես նախ ինքդ քո հանդեպ, հետո՝ հանդիսատեսի: Պետք է միշտ հավատալ ինքդ քեզ, իսկ հավատի մեջ կա հնարավորություն»,- նշեց Սևակը:

29-ամյա երգիչը հայ հանդիսատեսին առաջին անգամ ներկայացել է իր և Varda-ի համատեղ աշխատանքով՝ «Когда Мы С Тобой» երգով, որի հիման վրա նկարահանել են տեսահոլովակ: Սևակը նշեց, որ առաջիկայում հնարավոր է կրկին համագործակցի նրա հետ: Բայց մինչ այդ, մի շարք ծրագրեր ունի պլանավորած:

«Շատ նպատակներ և ծրագրեր ունեմ պլանավորած: Նախ` հաղթել «X Factor»-ում, հետո՝ մի քանի տեսահոլովակի հիման վրա թողարկել նոր ալբոմ, մեկնել համերգային շրջագայության և մյուս տարի մասնակցել «Եվրատեսիլ» մրցույթին՝ ներկայացնելով Հայաստանը Եվրոպայում»,- ներկայացրեց երգիչը:

Հարցին՝ հնարավո՞ր է վերադառնաք Հայաստան, բնակվեք և ստեղծագործեք այստեղ, Սևակը պատասխանեց. «Դեռ չգիտեմ, բայց չեմ բացառում»:

Նշենք, որ վերջերս համացանցում լայն տարածում գտան երգչի ընտանեկան լուսանկարները, սակայն Սևակը չցանկացավ խոսել 4-ամյա որդու և կնոջ մասին:

Նյութը՝ Մելինե Տոնոյանի