Քրիստինա Կարապետյանը սիրելիի հետ բիզնես է սկսել :)

Մի շարք հեռուստասերիալներից հայտնի դերասանուհի Քրիստինա Կարապետյանն ամանորյա ֆոտոշարք ունի, որն առաջինը տրամադրել է Tert.am Life-ին: Դերասանուհու հետ խոսել ենք ոչ միայն այս տարվա հաջողությունների և հաջորդ տարվանից սպասելիքների, այլև սիրելիի՝ ռեժիսոր Կարո Նաղդալյանի հետ համատեղ բիզնես սկսելու ու հարաբերություններն օրինականացնելու հեռանկարի մասին:

-Քրիստինա, մի՞շտ ես դեկտեմբերի սկզբին արդեն Ամանորյա տրամադրություն ունենում: Դեռ 1 ամիս կա Ամանորին, բայց դու և ընկերդ արդեն թեմատիկ ֆոտոշարք ունեք:

-Իրականում սա անսպասելի ֆոտոշարք էր, քանի որ չէի պատրաստվել: Ես և ընկերս բացել ենք մեր «Pavilion» ֆոտոստուդիան: Ամեն ինչ միասին ենք արել: Տաղավարի պատրաստման հարցում շատ եմ օգնել իրեն, մի շարք դեկորներ ինքս եմ սարքել: Վերջնական արդյունքում ստացանք ամանորյա տրամադրությամբ տաղավար: Որոշել էինք ավելի ուշ անել մեր ֆոտոշարքը, սակայն այնքան սիրուն էր, որ չդիմացանք:)

-Ասում են՝ համատեղ աշխատանքը խանգարում է անձնական հարաբերություններին, իսկ դուք համատեղ բիզնես եք սկսել: Դժվար չէ՞:

-Մենք շատ ենք խոսել այդ մասին: Թե´ ներկայացման շրջանակներում միասին աշխատելիս, թե´ այլ աշխատանքներ անելիս լինում են հակասություններ, սակայն հաղթահարում ենք: Ամենադժվարն այն ժամանակ էր, երբ առաջին անգամ էինք աշխատում իրար հետ: Կարոն բեմադրում էր մանկական ներկայացում և ինձ տվեց գլխավոր կերպարներից մեկը՝ Կատվի դերը: Սկզբում դժվար էր, բայց մենք  հասկանում ենք, որ գործը գործ է, մեր անձնական հարաբերությունները դրա հետ կապ չունեն: Երբ գնում եմ փորձի, ես իր ընկերուհին չեմ, բոլորի պես դերասան եմ, ում հետ կարող են լինել նաև խնդիրներ:

-Մի բան է խոսել ճիշտ մոդելի մասին, այլ բան է՝ կիրառել դա: Իսկապես ստացվո՞ւմ է այդպես ապրել և աշխատել:

-Իրականում շատ բարդ է: Երբ առաջին անգամ սկսեցինք աշխատել իրար հետ, շատ դժվարությունների միջով անցանք: Երկուսիս համար էլ շատ դժվար էր, սակայն հաղթահարեցինք: Հասկացանք, որ կարողանում ենք աշխատել իրար հետ, կարելի է նաև համատեղ բիզնես հիմնել:

-Մասնագիտական բախումներ ունենո՞ւմ եք:

-Իհարկե: Ճիշտ է, մենք ճաշակով ու մտածելակերպով շատ նման ենք, սակայն հակասություններ միշտ լինում են: Առանց դրա անհնար է, որովհետև 2 անհատականություն ենք: Ինչքան էլ նույն կերպ մտածենք, հակասություններ լինում են:

-Արդեն որոշե՞լ ես՝ որտեղ ես դիմավորելու Նոր տարին և ում հետ:

-Սիրում եմ Նոր տարին ընտանիքիս հետ դիմավորել: Կեսգիշերին անպայման պետք է տանը լինեմ: Այնուհետև սիրելիիս, ընկերներիս, քույրիկներիս հետ հավաքվում ենք ու լավ ժամանակ անցկացնում:

Լինում են նաև դեպքեր, որ բոլոր բարեկամներով հանաքվում ենք ու միասին նշում: Ինձ համար ամենակարևորն այն է, որ ընտանեկան մթնոլորտում նշեմ Նոր տարին:

-Ինչպիսի՞ տարի էր 2016-ը քեզ համար:

- Շատ հաջողակ: Մի շարք ձեռքբերումներ եմ ունեցել աշխատանքի և ուսման մեջ: Շատ բաներ եմ սովորել, մասնագիտական աճն եմ համարում լուրջ ձեռքբերում: Ամենակարևորն այն էր, որ սիրելիս բանակից զորացրվեց:

-Ի՞նչ սպասելիքներ ունես 2017-ից: Հնարավո՞ր է հաջորդ տարի դու և Կարոն օրինականացնեք ձեր հարաբերությունները:

-Դա շատ լուրջ հարց է: Իհարկե, տրամաբանորեն դա է լինելու մեր հաջորդ քայլը,սակայն այս պահին նման ծրագրեր չունենք:

Հաջորդ տարվանից լավ սպասելիքներ ունեմ: Պետք է էլի աշխատեմ, կատարելագործվեմ: Շատ եմ ցանկանում նկարահանվել գեղարվեստական ֆիլմում:

-Ինչո՞ւ մինչ օրս չես նկարահանվել: Առաջարկներ չկա՞ն:

-Առաջարկներ կան, սակայն հիմնականում հրաժարվել եմ համբույրի տեսարանների համար: Շատ եմ ուզում նկարահանվել գեղարվեստական մի ֆիլմում, որտեղ շեշտը դրա վրա դրված չի լինի:

-Շատ ռեժիսորներ նշում են, որ դերասանների կողմից պրոֆեսիոնալ չէ նման տեսարաններից հրաժարվելը: Դու դա պրոֆեսիոնալ տեսանկյունի՞ց չես ընդունում, թե՞ պարզապես չես ուզում անձնականդ տուժի:

-Իմ անձնական հարաբերությունները դրա հետ կապ չունեն: Եթե անգամ ընկեր չունենայի, միևնույն է, չէի նկարահանվի համբույրի տեսարանում: Ինձ համար դա  կապ ունի պրոֆեսիոնալիզմի հետ: Դա որպես դերասան քո մտածելակերպն է, քո տեսանկյունն ուն  մոտեցումը: Կան հայտնի և պրոֆեսիոնալ դերասաններ, ովքեր  հրաժարվում են համբույրի տեսարաններում նկարահանվելուց: Ի վերջո, համբույրի տեսարաններում նկարահանվելը դեռ չի նշանակում, որ պրոֆեսիոնալ են: Դա անձնական մոտեցում է: Պրոֆեսիոնալ մարդ կա, համբուրվում է, պրոֆեսիոնալ մարդ կա, չի համբուրվում և հակառակը:

-Տևական դադարից հետո նկարահանվում էիր «Աբելի քույրը» սերիալում, որն ավարտվեց: Նոր նախագծերի առաջարկներ կա՞ն:

-Ես վերադարձել եմ Հանրային հեռուստաընկերություն, որտեղ տարիներ առաջ արել եմ առաջին քայլերս: Ինձ նորից հրավիրեցին Հանրային՝ աշխատելու «Կյանքը շարունակվում է» հոգեբանական սքեթչերում, ինչի համար շատ ուրախ եմ: Արդեն նկարահանվել եմ մի քանի սերիայում, շուտով եթերում կլինեն:

Ինձ համար շատ ուրախալի էր Հանրային վերադառնալը, որտեղ ջերմ ու հարազատ մթնոլորտ է:

Հարցազրույցը՝ Լիլիթ Բոշյանի