Մարտան «Դեպի Եվրատեսիլում» առաջին հաղթանակի, մասնակիցների հետ հարաբերությունների և Արթուր Գրիգորիչի ազդեցության մասին

Շաբաթ օրը Առաջին ալիքի ուղիղ եթերում «Դեպի Եվրատեսիլի» մասնակիցներից  Լյուսին, Մարտան, Արծվիկը, Սյուզաննա Մելքոնյանը, Իջինը և Վահե Ալեքսանյանը պայքարում էին «Դեպի Եվրատեսիլի» երկրորդ կիսաեզրափակչի ուղեգիր ստանալու համար։ Հաջորդ փուլ անցան Մարտան, Արծվիկը, Սյուզաննա Մելքոնյանը և Իջինը: Թե´ հեռուստադիտողների, թե´ պրոֆեսիոնալ ժյուրիի առավելագույն ձայները ստացավ երգչուհի Մարտան` Անուշ Արշակյանի թիմից:

Tert.am Life-ը երգչուհու հետ խոսել է առաջին հաջողության, սպասելիքների և իր անձի շուրջ պտտվող ասեկոսեների մասին:

-Մարտա, սպասո՞ւմ էիք, որ թե´ ժյուրիի, թե´ հեռուստադիտողների առավելագույն ձայները Դուք կստանաք:

-Անկեղծ պիտի ասեմ՝ և´ սպասում էի, և´ ոչ: Բնականաբար, ունեի սպասելիքներ, քանի որ անում եմ աշխատանք, որը պիտի գնահատվի կա´մ լավ, կա´մ վատ: Սակայն չէի սպասում, որ երկկողմանի այսպիսի գնահատականի կարժանանամ: Անչափ հաճելի էր ու ոգևորող:

-Ի՞նչ էր դա նշանակում Ձեզ համար:

-Նշանակում էր, որ իմ արվեստն ու աշխատանքը սիրողներ և գնահատաողներ կան:)

- Առաջին արդյունքներով հաղթանակը բավականին մոտ է Ձեզ: Ի՞նչ սպասելիքներ ունեք հաջորդ փուլերից:

-Սպասելիքների մասին մտածելու ժամանակ չունեմ: Ամեն ինչ պետք է անեմ, որպեսզի  ինձ մոտ անկում չլինի և իմ հնարավորությունների առավելագույն սահմաններում լավ ներկայանամ, քանի որ շատ մարդ է հավատում ինձ և իմ ուժերին:

-Երբ առաջին արդյունքներով առաջտար եք, հաղթանակը շատ մոտ է թվում: Այդուհանդերձ ամեն ինչ կարող է անկանխատեսելի ելք ունենալ: Ձեզ հոգոբանորեն տրամադրո՞ւմ եք նաև հավանական այլ ելքի, թե՞ հիմա գնում եք դեպի հաղթանակ:

-Ես ընդամենը մեկ շանբաթ ժամանակ ունեմ մինչև իմ հաջորդ ելույթը և ժամանակ չունեմ մտածելու հաղթանակի կամ պարտության մասին:  Իմ առաջ դրված է խնդիր, որպեսզի ես հերթական փուլում հանդես գամ իմ հնարավորությունների առավելագույն չափով: Ես ամբողջությամբ ներգրավված եմ հենց այդ աշխատանքների մեջ: Ի սկզբանե ինձ չէի տրամադրել պարտության կամ հաղթանակի: Տրամադրվել էի երկար մնալ նախագծում, հետաքրքիր շոուներ և համարներ ներկայացնել: Արդյունքը կլինի այն, ինչ կլինի:)

- Որքան մոտ է հաղթանակը, այնքան թեժ է մրցակցությունը: Ի՞նչ հարաբերություններ ունեք մասնակիցների հետ:

-Ինձ մոտ ամեն ինչ շատ հանգիստ ու խաղաղ է: Կարծում եմ՝ մյուս մասնակիցների մոտ էլ: Ես բոլորի հանդեպ շատ դրական եմ տրամադրված: Եթե հասել ենք այս փուլին, ուրեմն ամեն մեկս մեր տեսակով արժանի ենք հաղթանակի:

-Թեև առավելագույն միավորներն եք հավաքել, համացանցում կարծիքները բևեռացված են: Ոմանք Ձեզ չեն տեսնում ֆավորիտի կարգավիճակում: Հետևո՞ւմ եք կարծիքներին: Ինչպե՞ս եք վերաբերում քննադատություններին:

-Շատ նորմալ և բնական է, որ համացանցում թեժ և բևեռացված քննարկումներ են: Ես շատ նորմալ և մարդկային եմ վերաբերվում այդ ամենին: Պարտադիր չէ, որ բոլորին դուր գա իմ արվեստը: Ուզում եմ ևս մեկ անգամ շնորհակալություն ասել բոլոր այն մարդկանց, ովքեր իմ կողքին են և գնահատում են իմ արվեստը:

 -Գաղտնիք չէ, որ վերջին տարիներին Արթուր Գրիգորիչը թույլ չի տալիս իր արտիստներին մտնել հեռուստատեսություն: Ինչպե՞ս արձագանքեց Ձեր որոշմանը՝ մասնակցել «Դեպի Եվրատեսիլին»:

-Արթուր Գրիգորիչն ինձ այնքան է վստահում, որ գիտի՝ եթե անգամ ես հեռուստատեսություն եմ մտնում, երբեք անորակ ոչինչ չեմ անի և իրեն չեմ ջղայնացնի:)

-Ի դեպ, շատերը Ձեր հաղթանակը կապում են Արթուր Գրիգորիչի գործոնի հետ: Ի՞նչ կասեք այդ մասին:

-Անիմաստ է ինչ-որ բան ասելը: Ինչ էլ ասեմ, միևնույն է, ամեն մեկը պիտի մտածի այն, ինչ ուզում է: Անկեղծ, ես շատ հեռու եմ շոուբիզնեսային նման քննարկումներից և ինտրիգային խառը իրավիճակներից: Ես ինտրիգային մարդ չեմ: Ինձ անհնար է ներգրավել նման բաների մեջ:) Ինձ բացարձակ չեն հետաքրքրում նմանատիպ խոսակցությունները:

-Միշտ նշել եք, որ չեք սիրում մրցույթներ, այդուհանդերձ որոշեցիք մասնակցել «Դեպի Եվրատեսիլին»: Ինչպե՞ս ստացվեց:

-Նաև նշել եմ, որ ինձ գրանցել են, ես ինքս չեմ արել դա: Անկախ նրանից՝ կշարունակե՞մ մնալ նախագծում, թե՝ ոչ, հիմա արդեն պիտի արդարացնեմ մարդկանց սպասումեները, քանի որ հասել եմ կիսաեզրափակիչ, այն էլ՝ այսպիսի արդյունքով:

-Հիմա երբ մրցութային թեժ պայքարում եք, միևնույն ժամանակ, առաջատար, ի՞նչ եք զգում: Վերանայե՞լ եք Ձեր կարծիքը:

-Անչափ հաճելի է: Մինչև հիմա էմոցիաներս այնքան շատ են, որ մի քանի ամիս հաստատ կապրեմ այդ հաճելի զգացումներով: Երբ ժողովուրդը գնահատում է քեզ, դա ամենահաճելին է:

 Պատկերացնո՞ւմ եք Ձեզ «Եվրատեսիլի» բեմում:

-Այո, պատկերացնում եմ, քանի որ ունեմ հրաշալի ընկերներ և թիմ, որոնք իմ կողքին են:  Միասին հաստատ կարող ենք Հայաստանը ներկայացնել ամենաբարձր որակով և պրոֆեսիոնալ կերպով: Հաջողություն եմ մաղթում բոլոր մասնակիցներին: Աստված բոլորիս հետ, որը բարին է, դա էլ կլինի:

-Ժամանակին ունեիք հայտնիություն, հետո դադար ունեցաք, որից հետո վերադարձը բումային չէր: Գործունեություն ծավալում էիք, սակայն ոչ լայն հասարակության համար: «Դեպի Եվրատեսիլը» անկախ իր ելքից Ձեզ կրկին հայտնիություն բերեց: Ի՞նչ եք պատրաստվում անել ապագայում, որպեսզի հանրությունը կրկին չմոռանա Ձեզ:

-Երբեք ինչ-որ բան անելուց առաջ չեմ մտածել հայտնի դառնալու մասին: Ինձ համար հայտնի լինելն ինքնանպատակ չէ: Ավելի կարևորում եմ կատարածս գործում ազնիվ լինելը: Երբ ունեմ ասելիք, փորձում եմ հնարավորինս բարձր որակով արտահայտել այն: Իհարկե, հաճելի է, երբ այն դառնում է մասսայական ու սիրվում հանրության լայն շերտերի կողմից, հետևաբար շարունակելու եմ աշխատել կատարելագործվել:

Հարցազրույցը՝ Ամալյա Հովհաննիսյանի