Լուսինե Թովմասյանը դստեր և ամուսնու հետ 2017-ը կդիմավորի ԱՄՆ-ում (լուսանկարներ)

«Միսս Հայաստան 2003», «Վիցե միսս Եվրոպա 2005» Լուսինե Թովմասյանը պատրաստվում է ամուսնու ու դստեր հետ 2017 թվականը դիմավորել ԱՄՆ-ում: Նա նշել է, որ մեծ խանդավառությամբ ու հեքիաթային մթնոլորտում է անցկացնելու Ամանորը: Tert.am Life-ը ֆոտոշարք է իրականացրել և զրուցել գեղեցկուհի մայրիկի հետ:

-Լուսինե, 2016-ը Ձեզ համար...

-Ընտանիքիս հետ կապված հուզական տարի էր: Բալիկս սկսեց իր առաջին քայլերն անել՝ քայլել, խոսել: Այս տարին ակնթարթային անցավ Արիանայի հետ: Չեմ հասցրել աշխատանքում ինչ-որ բան անել: Զբաղվել եմ միայն դստերս խնամքով: Շատ աշխույժ է, ինչպես արդեն նկատեցիք՝ ֆոտոշարքն իրականացնելիս: Նրա հետ օրս սկսում եմ ծիծաղով: Շատ նման է ինձ: Երբ նայում եմ աղջկաս, իմ մանկությունն եմ հիշում: Ի տարբերություն Արիանայի, ես մի փոքր խելոք էի:

-2016-ին բացթողումներ եղե՞լ են:

-Այո, գրեթե չեմ աշխատել: Բայց գալիք տարում այդ բացթողումը պետք է լրացնեմ և էլ ավելի շատ աշխատեմ:

-3-րդ տարին է՝ Ամանորը դիմավորում եք Արիանայի հետ: Ինչպե՞ս են անցել նախորդ տարիները և ինչպե՞ս եք պատրաստվում դիմավորել այս տարի փոքրիկի հետ:

-Աղջիկս ծնվել է 2014-ի դեկտեմբերի 27-ին: 2015-ից բան չենք հասկացել, կարելի է ասել, որ սա երկրորդ տարին է: Ամուսնուս և փոքրիկիս հետ 2017-ը դիմավորելու ենք  ԱՄՆ-ում: Արիանան արդեն մեծ է և կարող ենք օդանավով երկար ճանապարհ գնալ: Միացյալ Նահահանգներում են ապրում ամուսնուս մայրն ու եղբայրը: Այս տարի նրանք չկարողացան գալ, այդ իսկ պատճառով մենք ենք գնալու: Ընտանեկան տոնը միասին ենք դիմավորելու:

-Շատերի համար Նոր տարին հոգսաշատ տոն է, իսկ Ձե՞զ համար:

-Ես շատ եմ սիրում Ամանորը: Այս տարիքում անգամ երեխայի նման անհամբեր սպասում եմ Նոր տարվան: Ինձ համար Ամանորը հեքիաթային տոն է, իսկ կախարդական գիշերը երազանք պահելը՝ պարտադիր:

-Ամենահիշարժան Ամանորը...

-Յուրաքանչյուր Նոր տարի ինձ համար հիշարժան է: Կդժվարանամ ինչ-որ մեկն առանձնացնել: Սովորաբար սիրում եմ Նոր տարին դրսում դիմավորել և նախքան ամուսնանալը շատ քիչ եմ Հայաստանում նշել, իսկ ամուսնանալուց հետո վերջին 3 տարին այստեղ ենք տոնել, քանի որ Արիանան փոքր էր:

-Արիանան հասկանո՞ւմ է, որ շուտով Նոր Տարի է և Ձմեռ պապից պետք է նվեր ստանա:

-Դեռ չի հասկանում, որ պետք է նվեր ուզի, բայց կրկնում է այն, ինչ  մենք ենք ասում: Երբ Արիանային ասում ենք՝ Ձմեռ պապիկը Նոր տարվա գիշերը գալիս է և նվերներ բերում, նա ասում է՝ այո, ու նշում ընտանիքի բոլոր անդամների անունները: Հավասարություն է սիրում:)

-Տոնական սեղանի ուտեստները Դո՞ւք եք պատրաստում:

-Ոչ բոլորը, բայց պատրաստում եմ: Սովորաբար, մայրս է օգնում կամ խանութից գնում: Այնպես չի եղել, որ ամբողջությամբ ես եմ պատրաստել:

-Ի՞նչ սպասելիքներ ունեք 2017-ից:

-Ամեն տարի, ամիս, շաբաթ ու հաջորդող օր ունեմ սպասելիքներ: 2017-ին ցանկանում եմ աշխատանքային բուռն գործունեությամբ զբաղվեմ, քանի որ Արիանան մեծացել է:

-Նոր համալրում չեք ցանկանո՞ւմ ընտանիքում:

-2017-ին չեմ ուզում մտածել այդ մասին, քանի որ դեռ շուտ է: Արիանան մի քիչ էլ մեծանա, նոր կմտածենք այդ մասին:)

Նյութը՝ Մելինե Տոնոյանի

Լուսանկարները՝ Կարեն Հովհաննիսյանի