«Ռոլանդը ներկա էր փոքրիկիս ծնունդին ու ինձանից շատ էր հուզվել». Գայանեն առաջին անգամ խոսում է դստեր մասին

«Ռեինկարնացիա» խմբի Ռոլանդը և նրա կինը՝ Գայանեն, օրերս են վերադարձել Միացյալ Նահանգներից: Երեկ՝ դեկտեմբերի 16-ին, Գայանեն իր ընկերների և հարազատների հետ նշել է 26-ամյակը: Պարուհու ամուսինն ու հարազատները իսկական տոնի են վերածել օրը: Tert.am Life-ի հետ զրույցում  Գայանեն պատմել է ոչ միայն տարեդարձի մասին, այլև առաջին անգամ նաև խոսել է առաջնեկի մասին:

-Ո՞վ առաջինը շնորհավորեց Ձեզ և ի՞նչ անակնկալ ստացաք:

-Ինչպես միշտ, Ռոլանդը. սովորության համաձայն 00:00-ին ծաղիկներով, փուչիկներով, տորթով տուն եկավ: Նույն պահին էլ մայրս հեռախոսով շնորհավորեց: Չնայած նոր ենք վերադարձել՝ Ռոլանդն ասաց, որ երեկոյան անպայման նշելու ենք օրը մեր ընկերների ու հարազատների:

-Ի՞նչ զգացողություններ ունեիք:

-Սկզբում շատ անհանգիստ էի: Ուզում էի օրս լավ անցներ: Վերջում՝ անմոռանալի էր: Շնորհակալ եմ Ռոլանդին և հարազատներիս, որ օրս տոն դարձրին: Բոլորին կարոտել էի ու չէի հասցնում ուզածիս պես շփվել ու կարոտս առնել:

- Նանեն ինչպե՞ս դրսևորեց իրեն:

-Շատ լավ, բոլորին ժպտում էր:) Երեկոյան եկավ, հյուրերին բարևեց ու շուտ գնաց: Երաժշտությունը շատ բարձր էր, չէի ուզում մնար:

-Ի՞նչ եք զգում, երբ թեկուզ մի քանի ժամով հեռու եք լինում փոքրիկից:

-Իհարկե, միշտ չէ, որ կարող եմ իրեն հետս տանել ինչ-որ տեղ: Դրա համար ստիպված թողնում եմ տանը, հետո կարոտած վազում տուն: Շատ կապված ենք իրար հետ: Նույն էլ Ռոլանդն է. չի համբերում, թե երբ պետք է տուն հասնի:

-Փոքրիկն ո՞ւմ է ավելի նման:

-Երբ ծնվեց, Ռոլանդին էր շատ նման, բայց օր օրի փոխվում է: Շատ տարբեր է. մեկ ինձ է նման, մեկ՝ Ռոլանդին:

-Ինչպե՞ս որոշեցիք փոքրիկ գեղեցկուհու անունը :)

-Պուճուրիս անունը վերջնական որոշվեց այն պահին, երբ պետք է անունը գրեինք :) Մինչ այդ որոշել էինք Զիոնա (դրախտ) դնել, բայց ուզում էինք հայկական անուն էլ ունենար: Ի վերջո, որոշեցինք դնել հայկական աստվածուհու անուն՝ Նանե: Նանե-Զիոնա: Զիոնա ենք ասում:

-Շատ կանայք մայրանալուց հետո փոխվում են: Ձեզ փոխե՞լ է փոքրիկ Զիոնան:

-Չգիտեմ: Ասում են՝ ավելի կանացի եմ դարձել: Իհարկե, կառուցվածքս նույն է :) Դստերս հետ ամեն պահը վայելում եմ: Ավելի ուշադիր եմ, ուզում եմ ամեն ինչ ճիշտ անել: Ամենակարևորն այն է, որ ամեն ինչ սիրով եմ անում:

-Հետաքրքիր է՝ Ռոլանդի արձագանքը, երբ առաջին անգամ տեսավ փոքրիկին:

-Ամուսինս ներկա էր երեխայի ծննդին ու ինձանից շատ էր հուզվել :) Աննկարագրելի ապրումներ էին:

-Ամանորն այստեղ եք դիմավորելու: Ինչպե՞ս եք պատրաստվում դիմավորել  2017-ը և ի՞նչ սպասելիքներ ունեք:

-Այս տարի ոչ մի տեղ չեմ ուզում գնալ: Փոքրիկիս ու ընտանիքիս հետ եմ ուզում լինել: Հիմա միտքս միայն Զիոնան է: Բայց չեմ մոռանում իմ մասին և շուտով կվերադառնամ իմ սիրելի մասնագիտությանը՝ պարին: Բեմն ու փորձերը շատ եմ կարոտել:

Նյութը՝ Մելինե Տոնոյանի

Լուսանկարները՝ Գայանեի անձնական արխիվից