«Ես շատ լավ ելույթ ունեցա». Իջինը «Դեպի Եվրատեսիլից» դուրս մնալու և իր ֆավորիտի մասին

«Դեպի Եվրատեսիլ» նախագիծը շարունակում է մնալ քննարկումների կիզակետում: Tert.am Life-ը զրուցել է նախագծի ամենաքննարկվող կերպարներից մեկի՝ Իջինի հետ, ով եզրափակչից դուրս մնաց:

-Իջին, այս շաբաթ դուրս մնացիք «Դեպի Եվրատեսիլի» եզրափակչից: Ձեզ համար սպասելի՞ էր այս արդյունքը:

-Ճիշտն ասած, այո: Առաջին կիսաեզրափակչում ժյուրիի գնահատականից և հեռուստադիտողների քվեարկության արդյունքից հասկացա, որ հաջորդը ես եմ դուրս մնալու:

-Այս անգամ միջազգային ժյուրին էր քվեարկում: Նրանց գնահատականներն էականորեն տարբերվում էին հայ երաժիշտներից բաղկացած ժյուրիի քվեարկությունից, սակայն Դուք 2 ժյուրիի կողմից էլ ցածր միավորներ ստացաք: Ինչո՞ւ:

-Ով գիտի: Միայն Աստված գիտի՝ ինչու:

Այնքան էլ կարևոր չէ՝ ես ինչ եմ ստացել: Ինձ համար կարևոր էր լավ ելույթ ունենալ, շոու ցույց տալ, որպեսզի իմ ֆանատներն ուրախ լինեին այն դիտելիս: Ես ամեն ինչ իրենց համար եմ արել: Երբ եկել եմ այս մրցույթին, չեմ մտածել՝ ինչպես անել, որ ժյուրիին կամ բոլորին դուր գամ: Ես հաճույք եմ ստացել իմ շոուներից, որոնց  գաղափարներն իմն են: Ես ելույթ եմ ունեցել իմ ու իմ ֆանատների համար: Շատ զգացված և ուրախ եմ, որ աջակցություն և սեր ստացա:

-Ըստ Ձեզ՝ Դուք լավ եք  ելույթ ունեցել, պարզապես ցածր միավորնե՞ր եք ստացել:

-Ես մտածում եմ, որ շատ լավ ելույթ ունեցա: Յուրահատուկ շոուներ ցույց տվեցի յուրաքանչյուր փուլի ժամանակ: Ժողովուրդն ինձ շատ է աջակցում,  շատերն են գրում, բողոքում, որ արդյունքը ճիշտ չէր, սակայն ստացվեց այնպես, ինչպես ստացվեց: Ես շատ ուրախ եմ, որ լավ ելույթ ունենալով դուրս մնացի շոուից:

-Ամեն դեպքում, ցավալի՞ էր դուրս մնալը: Ըստ Ձեզ՝ ավելի լա՞վ կներկայացնեիք Հայաստանը՝ «Եվրատեսիլ 2017»-ին:

-Ես շատ ուրախ եմ, որ կարողացա այսքան հեռու գնալ: Ամեն անգամ հոգեբանորեն պատրաստվում էինք, որ այսօր կարող ենք դուրս մնալ:

Չգիտեմ՝ ով ինչ կարող էր ցույց տալ, որովհետև մենք բոլորս շատ տաղանդավոր ենք և շատ տարբեր: Յուրաքանչյուրն իր ուժեղ կողմն ունի: Ես  հավատում եմ, որ ֆինալիստ աղջիկները շատ բարձր մակարդակով և արժանի կներկայացնեն Հայաստանը «Եվրատեսիլին»:

Ես շատ էներգետիկ շոու կներկայացնեի: Իմ ելույթներից կարելի է հասկանալ՝ իմ ուժը որտեղ էր:

-Ֆինալիստներից ո՞ւմ եք տեսնում «Եվրատեսիլի» բեմում:

-Բոլոր մասնակիցները շատ ուժեղ և արժանի էին՝ յուրահատուկ կերպարներ: Ես Արծվիկին եմ երկրպագում, սակայն Մարտան էլ է շատ լավ  մասնակից: Նա յուրահատուկ աղջիկ է՝ լավ ձայնով:

-Ձեր և արտերկրից եկած շատ մասնակիցների հասցեին քննադատություններ հնչեցին, որ ամբողջ կյանքում Հայաստանում չեք ապրել, սակայն երբ լինում է միջազգային մրցույթ, որը հայտնիություն ձեռք բերելու հնարավորություն է, գալիս եք Հայաստան և հավակնում ներկայացնել երկիրը միջազգային մրցույթում: Ինչպե՞ս եք վերաբերում այս քննադատություններին:

- Դա շատ սխալ է: Ես Հայաստանում եմ ծնվել և միշտ եկել եմ Հայաստան՝ տատիկ-պապիկիս մոտ: Ես մեղավոր չեմ, որ կյանքը մեզ ստիպել է գնալ Հայաստանից: Ամեն ծնող ուզում է, որ իր երեխան սոված չմնա, դրա համար էլ իմ ծնողները նման բան են արել:

Ես միշտ սրտով եղել եմ հայրենիքիս հետ ու որտեղ էլ եղել եմ՝ ԱՄՆ-ում, թե Ռուսաստանում, բոլոր հարցազրույցներում ասել եմ, որ հայուհի եմ և հպարտանում եմ դրանով:

Ես մտածում էի՝ այստեղ երգեր թողարկելու, կարիերա սկսելու մասին: Ես 7 տարի ԱՄՆ-ում եմ ապրել, հետո ծնողներս Ռուսաստան են տեղափոխվել, ես էլ՝ իրենց  հետ:

Ամեն հայ երգչուհու համար մեծ պատիվ է ներկայացնել Հայաստանը «Եվրատեսիլին»: Ես շատ հուզված էի, որ իմ հայրենիքում այդքան հեռու գնացի այս նախագծում: Յուրաքանչյուր երգիչ ուզում է իր երաժշտությունը հնչի աշխարհում:

-Ձեզ շատ են նմանեցնում Քիմ Քարդաշյանին: Ձեզ դո՞ւր գալիս է այդ նմանությունը:

-Ինձ թվում է՝ ամեն աստղի ուզում են նմանեցնել մեկին: Ինձ համար շատ հաճելի է, որ ինձ համաշխարհային մակարդակի աղջկա հետ են համեմատում: Երբեմն կատակում եմ, որ ես ավելի շատ Միստր Բինին եմ նման:)

Ես փոքր ժամանակվանից եղել եմ Իջինը՝ նիհար, երկար մազերով, սև, մեծ աչքերով, սևուկ աղջիկ: Ես մի քիչ բոյով եմ Քիմից: Երբ Քիմ Քարդաշյանը դարձավ հայտնի, բոլոր հայուհիները սկսեցին նմանվել իրեն:

-Ձեր հագուկապի ոճից տպավորություն է, որ Դուք էլ եք ձգտում նմանվել իրեն:

-Ոչ ոքի նման լինել չեմ ձգտում: Գեղեցկության իմ իդեալներն ուրիշ են՝ Մոնիկա Բելուչի, Սալմա Հայեկ: Բոլորի միջև կարելի է նմանություն գտնել: Կստացվի՝ յուրաքանչյուրս մեկին նմանակում ենք: Ես մանկուց այսպիսին եմ եղել:

-«Դեպի Եվրատեսիլը» հայտնիություն և երկրպագուներ ձեռք բերելու արագ հնարավորություն է, սակայն արտիստի լռության դեպքում հանդիսատեսն արագ է մոռանում նրան: Ի՞նչ նախագծեր ունեք առաջիկայի համար:

-Մի քիչ ուշքի գամ, Ամանորից հետո մի քանի երգ կթողարկեմ, տեսահոլովակներ կնկարահանեմ: Շատ եմ ուզում ուրախացնել իմ ֆանատներին: Ես գիտեմ, որ իրենք սպասում են: Ամանորից հետո նոր ծրագրով՝ համերգներով ու շոուներով կներկայանամ:

-Հայաստանո՞ւմ եք մնալու, թե՞ մեկնելու եք:

-Հիմա համերգներ ունեմ Հայաստանում: Դրանից հետո գնալու եմ Ռուսաստան, այնտեղ ևս մի քանի շոու ունեմ:

Հարցազրույցը՝ Լիլիթ Բոշյանի