Մարտան «Եվրատեսիլ» չգնալու պատճառների և Արծվիկի մասին

«Դեպի Եվրատեսիլ» նախագծի եզրափակիչ փուլում հայտնի դարձավ, որ «Եվրատեսիլ 2017»–ին Հայաստանը կներկայացնի Արծվիկը։ Վերջին արդյունքներն էականորեն տարբերվում էին նախորդներից։ Մարտան, ով երկու շաբաթ շարունակ ստանում էր հեռուստադիտողների առավելագույն ձայները, այս անգամ ստացավ ձայների միայն 10 տոկոսը՝ հնարավոր 50–ից։ Tert.am Life–ն այս մասին զրուցեց երգչուհու հետ։

-Մարտա, ըստ Ձեզ՝ ինչո՞ւ այս անգամ այսքան ցածր միավորներ ստացաք:

-Հարցրեք ժյուրիի անդամներին:)

-Նախորդ անգամ, երբ ստացաք միջազգային ժյուրիի ցածր միավորները, կարողացաք պատճառաբանել՝ ինչով կարող էին պայմանավորված լինել ժյուրիի ցածր միավորները: Այս անգամ պատճառը չե՞ք գտել:

-Նախորդ անգամ վերլուծել էի և հասկացել, որ ժյուրին դրսից էր, իսկ Ես Կոմիտաս էի երգել: Երկրորդ կատարումս էլ թերի էր: Այս անգամ չեմ կարողացել գտնել պատճառը: Հավանաբար, ժյուրին Արծվիկին ավելի շատ է հավանել:

Ես դուրս մնացի, որովհետև այդպես եղավ: Ինքս իմ ելույթներից շատ գոհ եմ՝ չհաշված որոշ թերություններ, որոնք կշտկվեն:

- Նախորդ 2 թողարկումների ժամանակ արժանացել եք հեռուստադիտողների առավելագույն ձայներին: Այս անգամ ստացաք ձայների միայն 10 տոկոսը: Սա բավականին քիչ էր: Ձեր կարծիքով՝ ինչո՞վ էր պայմանավորված այս արդյունքը:

- Չեմ կարող ասել: Ես շնորհակալ եմ իմ հանդիսատեսին յուրաքանչյուր հաղորդագրության համար:

Հավատացեք, ես ոչ մի րոպե չեմ մտածել՝ ինչու չհաղթեցի:  Ինձ հետաքրքիր չէ՝ ինչու ես չհաղթեցի: Հիմա ինձ հետաքրքիր է, որ հայ ազգը դառնա մի մարդ ու լինի մեր մասնակցի կողքին: Ինչպես նաև անիմաստ չքննադատի մյուս մասնակիցներին և չարախոսությամբ չզբաղվի:

- Ձեր երկրպագուներից շատերը սոցիալական ցանցերում մեկնաբանություններ էին գրում և կասկածի տակ առնում ընտրության արդարությունը: Նրանք կարծում են, որ ի սկզբանե որոշված էր, որ Արծվիկն է գնալու «Եվրատեսիլ»: Դուք ի՞նչ կարծիք ունեք այս մասին:

-Սա մրցույթ էր ու պիտի մեկը հաղթեր: Ով էլ հաղթեր, միևնույն է, մարդկանց մի մասը բողոքելու էր: Ի սկզբանե որոշված էր, թե ոչ՝ գիտեն միայն որոշողները, ես որտեղից իմանամ:)

Ես մասնակցել եմ մրցույթին և իմ հաճույքը ստացել եմ։ Իմ ժողովրդի, թիմի, ընկերների ու ժյուրիի շնորհիվ հասել եմ եզրափակիչ, ինչն էլ իմ նպատակն էր: Արծվիկը տաղանդավոր աղջիկ է ու արժանի էր հաղթանակի:

- Մինչ այս ասել էիք, որ մրցույթների մասնակցել չեք սիրում: Վերջնական արդյունքից հետո հիասթափեցնո՞ղ էր։ Այսուհետև կմասնակցե՞ք մրցույթների:

-Իհարկե, հիասթափություն չեմ ապրել: Ես նպատակային չեմ մասնակցել հաղթելու համար ու երբեք չեմ մտածել, որ պարտադիր պիտի հաղթեմ, որպեսզի չհաղթելու դեպքում հիասթափվեմ: Այդ իսկ պատճառով ամեն ինչ եղավ շատ գեղեցիկ ու հանգիստ:

- «Դեպի Եվրատեսիլից» դուրս մնացած շատ երգիչներ ասում են, որ հաջորդ տարի էլ են փորձելու գնալ Եվրատեսիլ: Դուք կփորձե՞ք:

-Չեմ կարող ասել:

-Ի՞նչ տվեց Ձեզ «Դեպի Եվրատեսիլը»:

-Ամենակարևորը՝ նոր հանդիսատես՝ մարդիկ, ովքեր սիրեցին իմ արվեստն ու ինձ:

Հարցազրույցը՝ Ամալյա Հովհաննիսյանի

Լուսանկարները՝ Մարտայի անձնական արխիվից