5 երկիր, որ աղմուկով հրաժարվել են մասնակցել «Եվրատեսիլին»

«Եվրատեսիլ» երգի  միջազգային մրցույթը կրկին սկանդալի կենտրոնում է հայտնվել։ Այս անգամ խոսքը վերաբերվում է Ռուսաստանի ներկայացուցիչ Յուլյա Սամոյլովային։ Յուլյան  չի կարողանա մասնակցել մրցույթին, քանի որ Ուկրաինան արգելել է նրա մուտքը երկիր։ Այս քննարկումները վերջնականապես հաստատվել են, Ռուսաստանն էլ հրաժարվել է հեռարձակել երգի միջազգային մրցույթը։ Արգելքը պայմանավորված է այն հանգամանքով, որ Յուլյան Ղրիմում համերգ տալու մեկնել է անմիջապես Մոսկվայից` առանց Ուկրաինա այցելելու:

Ի դեպ, սա առաջին դեպքը չէ, երբ մրցույթը քաղաքականացվում է ու նման հետևանքներ է ունենում։

2009 թվականին Վրաստանը ևս չի մասնակցել մրցույթին։ 2008-ին Հարավային Օսիայի հետ ունեցած խնդրից հետո Վրաստանը մրցույթին ներկայացրել էր We Don't Wanna Put In կոչվող երգը, որը թարգմանաբար նշանակում է «Մենք չենք ցանկանում դնել», սակայն հնչում է որպես We Don't Wanna Putin՝ «Մենք չենք ցանկանում Պուտին»։ Ռուսաստանի ներկայացուցիչ Դիմա Բիլանի պրոդյուսեր Յանա Ռուդկովսկայան բողոքել ու նշել էր, որ երգը վիրավորում է իր երկիրն ու նախագահին։  Ի վերջո, «Եվրատեսիլի»  ներկայացուցիչները խնդրել էին փոխել երգի բառերը, քանի որ նշել էին, որ երգը խախտում է մրցույթի կանոնները, սակայն Վրաստանը հրաժարվել էր և չէր մասնակցել մրցույթին։

Հայաստանը ևս նման սկանդալի մեջ է հայտնվել։ 2012 թվականին մրցույթն անցնում էր Բաքվում։ Հայաստանը հրաժարվել էր մասնակցությունից` պատճառաբանելով  ադրբեջանցիների վերաբերմունքը հայերի նկատմամբ։ Կամզակերպիչները պարտադրել էին վճարել մասնակցության համար ծախսված ամբողջ գումարը, ինչպես նաև գումարի 50%-ի չափով տույժ վճարել, քանի որ հրաժարվելու ժամկետն արդեն ավարտվել էր։

2012 թվականին «Եվրատեսիլից» հետո Թուրքիան հայտարարել է, որ այլևս չի մասնակցելու մրցույթին, քանի որ այն անարդարություններով լի է։ Թուրքիային դուր չէր եկել, որ Մեծ հնգյակի (Մեծ Բրիտանիա, Ֆրանսիա, Գերմանիա, Իսպանիա, Իտալիա) ներկայացուցիչներն մեխանիկորեն անցնում են եզրափակիչ փուլ, քանի որ համարվում են մրցույթի հիմնադիրները։ 2016-ին Թուրքիան հայտարարել է, որ վերադառնում է, սակայն որոշ ժամանակ անց կրկին հայտնել է, որ չի մասնակցելու մրցույթին։

2015 թվականին Ուկրաինան հրաժարվել է մասնակցել «Եվրատեսիլին»՝ երկրում ոչ կայուն իրավիճակի պատճառով։ «Մենք հասկանում ենք, որ այս մրցույթը իմիջային է, այն հեղինակություն է բերում, սակայն մենք ստիպված ենք հրաժարվել մասնակցությունից։ Մենք չենք կարող վատ պատրաստվել, իսկ լավ պատրաստվելու համար պարզապես գումար չունենք։ Եթե ինչ-որ մեկը ցանկանում է մեզ օգնել, մենք դեմ չենք, սակայն միայնակ այսպիսի մրցույթի ծախսերը հոգալ չենք կարող»,- ասել է Ուկրաինայի գլխավոր հեռուստաալիքի տնօրեն Զուրաբ Ալասանիան։