Հագուստը ճիշտ համադրելու 5 կանոն, որ պետք է իմանա յուրաքանչյուր աղջիկ

15:42 • 01.05.17

Տարածված կարծրատիպ կա, որ ոճային տեսք ունենալու համար պետք է մեծ զգեստապահարան ու շատ հագուստ ունենալ։

Despinis-ը գրում է, որ իրականում պետք է կարողանալ ճիշտ համադրել ձեր ունեցած հագուստը։ Դրա համար մի քանի կանոն կա, որոնք պետք է իմանա յուրաքանչյուր աղջիկ։

1. Ինչպե՞ս համադրել նախշեր ունեցող հագուստը։ Նախշերով հագուստը շատ դժվար է համադրել այլ հագուստի հետ, քանի որ անզգույշ լինելու պատճառով կարող եք անփույթ տեսք ունենալ։ Այդ պատճառով էլ այդպիսի հագուստը նախընտրելի է հագնել պարզ գույների հետ, օրինակ՝ սպիտակ, սև, մարմնագույն, կաթնագույն և այլն։ Եթե նախշերով տաբատ եք ընտրել, ապա միագույն շապիկի կամ վերնաշապիկի հետ համադրեք, իսկ եթե նման շապիկ եք ընտրել, նախապատվությունը տվեք սովորական ջինսերին կամ միագույն տաբատներին։

2. Ինչպե՞ս համադրել հագուստը՝ կախված դրա ձևից։ Հագուստի ճիշտ ձևի ընտրության շնորհիվ կարելի է հեշտությամբ ընդգծել մարմնի բոլոր առավելություններն ու թաքցնել թերությունները։ Եթե վերևի հատվածում լայն հագուստ եք հագնում, ներքևում նախապատվությունը տվեք նեղ ջինսերին կամ կիսաշրջազգեստներին։ Եթե լայն տաբատ եք ընտրել, ապա համադրեք այնպիսի շապիկի հետ, որը կընդգծի իրանի հատվածը։

3. Ինչպե՞ս համադրել հագուստը՝ կախված դրա երկարությունից։ Համամասնությունը պահելը շատ կարևոր է։ Բարձր գոտկատեղով տաբատներն ու կիսաշրջազգեստները տեսողական հասակ են ավելացնում, իսկ ցածր գոտկատեղով հագուստը ձեեզ ավելի կարճահասակ է դարձնում։

4. Ինչպե՞ս համադրել հագուստը՝ կախված դրա կտորի ձևից։ Եթե ցանկանում եք ներդաշնակ կերպար ստեղծել, այնպիսի հագուստ ընտրեք, որի կտորները նման կլինեն միմյանց։ Օրինակ՝ կտորից տաբատներին համապատասխանում են թեթև ու թափանցիկ վերնաշապիկները, իսկ ջինսերի հետ` ավելի կոշտ կտորից շապիկները։ Որքան ավելի նուրբ է ձեր հագուստի կտորն, այնքան ավելի նուրբ կտորից հագուստի հետ պետք է այն համադրեք։ Բացառություն են կազմում ամառային թեթև զգեստները, որոնք կարելի է համադրել կաշվե կամ ջինսե կոպիտ բաճկոնների հետ։

5. Ինչպե՞ս համադրել հագուստը՝ կախված գույնից։ Հագուստի գույնը շատ կարևոր է գեղեցիկ կերպար ստեղծելու գործում։ Աշխատեք, որ ձեր կերպարում երեքից ավելի գույն չլինի, այլապես կարող եք ծաղրածուի նմանվել։ Ոճային կերպարում պետք է մեկ վառ իր լինի և մի քանի պարզ։ Օրինակ՝ եթե վառ շապիկ եք ընտրել, ապա պետք է տաբատն ու աքսեսուարները պարզ լինեն։