Ինչպես Մերի Հակոբյանը փոխեց որոշումն ու նկարահանվեց բաց տեսարաններում

UCOM ցանցում գործող «Արմենիա պրեմիում» հեռուստաալիքի եթերում հունիսի 26–ից կցուցադրվի ռեժիսոր Ելենա Արշակյանի «Դեպի վայրէջք» 25 մասանոց հեռուստանովելը։ Այն արդեն լայն քննարկումների տեղիք է տվել, քանի որ անոնսում կան բաց տեսարաններ։ Ելենան էլ մեզ տված հարցազրույցում ասել էր, որ իր ֆիլմում որևէ իմիտացիա չկա, համբույրի և բաց տեսարաններն իրական են։

Ֆիլմում բաց տեսարաններ ունի նաև դերասանուհի Մերի Հակոբյանը, ով ավելի վաղ հայտարարել էր, որ հեռուստադիտողը երբեք իրեն չի տեսնի բաց տեսարաններում։ Tert.am Life–ի հետ զրույցում Մերին խոսեց իր կերպարի և որոշումը փոխելու պատճառների մասին։

«Մարմնավորում եմ գլխավոր հերոսուհիներից մեկին։ Սոնայի կյանքում ամեն ինչ փոխվում է, երբ սիրահարվում է։ Նա ընտրում է այն մարդուն, որը թրաֆիքինգի է ենթարկել իր քրոջը։ Ֆիլմը հիմնված է մաքուր սիրո վրա։ Իրականում, դու չես ճանաչում մարդուն, երբ  նրան սիրում ես, իսկ երբ բացահայտում ես, որ նա հրեշ է, չես կարողանում թողնել, որովհետև այդ մարդը քո ներսում է։ Սերը, ընտանիքը, քույրը... ամեն բան բախվում են և խախտվում է կերպարիս ներքին ներդաշնակությունը»,– պատմեց Մերին ու հավելեց, որ հեռուստադիտողներն այս կերպարով  իրեն նորովի ճանաչելու, իր հմտությունները բացահայտելու հնարավորություն կունենան։

«Ես միշտ ցանկացել եմ խաղալ բարդ կերպար, քանի որ հեռուստադիտողը չի տեսել իմ այն հնարավորությունները, որոնք կարող է գնահատել։  Կարծում եմ` այս նախագծում հեռուստադիտողը կտեսնի հնարավորություններիս որոշ մասը։ Մինչև այս ունեցել եմ դրվագներ, որտեղ շատ ռեժիսորների և հեռուստադիտողների ապացուցել եմ, որ ես կարողանում եմ տեսարանը լիարժեք հասցնել լսարանին, իրենք ինձ համարում են ուժեղ դերասանուհի, սակայն այս նախագծում այդ տեսարանները շատ են։ Եթե ես մինչև այս ուղղակի սիրված կերպար էի, այս նախագծից հետո կսիրվեմ որպես դերասանուհի, իսկ դա կարևոր փաստ է»,– նկատեց Մերին։

Մերի Հակոբյան–Ալեքսանդր Բաբասյան դերասանական զույգն առաջին անգամ է հանդես գալիս միասին։ Նրան տեսարանները միանգամից չեն ստացվել, քանի որ ծանոթությունը կայացել է նկարահանման հրապարակում, իսկ իրենք պետք է խաղային սիրահարված զույգի։ «Ալեքսանդրը դերասանական կրթություն չունի, սակայն հետաքրքիր երանգներ ունի։ Նա պրոֆեսիոնալ դերասաններից շատ ավելի մեծ ձգտումով և իր կերպարին լուրջ վերաբերող մարդ է, որն ինձ օգնում է։ Այն, որ ինքը պրոֆեսիոնալ դերասան չէ, ինձ չի փակում նկարահանման հրապարակում»,– ասաց երիտասարդ դերասանուհին։

Խոսելով բաց տեսարանների մասին` Մերին հիշեց, որ ավելի վաղ հանդես էր եկել կտրուկ հայտարարությամբ, թե երբեք չի նկարահանվի բաց տեսարանում։ Այսօր որոշումը փոխելու խնդիր է ունեցել։ «Շատ համարձակ ու մեծ հայտարարություններով էի հանդես եկել, բայց ոչ մեկս չգիտենք` վաղվա օրը ինչպիսին կլինի` ում հետ կաշխատենք և ինչ կանենք  հանուն մեր  մասնագիտության։ Սխալ էր մտածել, որ կարող եմ պահել այդ սանդղակը։ Լինում են դեպքեր, երբ համաձայնում ես հետ կանգնել քո հայտարարություններից։ Մինչև այս ինձ ուրիշ կերպար էր  առաջարկված, որի մասնակցությամբ կային բաց տեսարաններ,  և ես կասկածում էի, որ  համարձակություն կգտնեմ այդ կերպարի համար։ Հետո Ելենան ինձ առաջարկեց  Սոնայի կերպարը։ Այս կերպարում կա մեծ սեր, սցենարային առումով ես տարվել էի այլ բաներով և մոռացել էի, որ այստեղ էլ կան բաց տեսարաններ։ Երբ նկարահանման հրապարակում Ելենան ասաց` հիմա պետք է լինի համբույրի տեսարան, ես պատրաստ չէի։ Շնորհակալ եմ իրեն, այդ տեսարանը կարողացանք նկարահանել առանց համբույրի, հետո տրամադրվեցի և խաղացի նաև համբույրի և բաց տեսարան։ Միշտ մտածել եմ, որ դերասանը չպետք է գնա հատուկ տեսարանների, որ լինի  հետաքրքիր կամ սիրվի։ Սակայն ես չէի կարող խուսափել այս տեսարանից»,– պատմեց Մերին։

Նա նշեց, որ հեռուստասերիալի նկարահանումներից հետո պատրաստվում է հանգստանալ, քանի որ տևական ժամանակ առանց դադարի աշխատել է։ Մերիի խոսքով` նախագիծն իրենից շատ էներգիա է խլել, քանի որ զգացմունքային տեսարանները խաղացել է ոչ թե տեխնիկապես, այլ ներդնելով իր ապրումները։