Առաջին լուսանկարները շվեդ հայտնի երգիչ Բոսսոնի և Էդգարի երևանյան տեսահոլովակի նկարահանումներից

Շվեդ հայտնի երգիչ Բոսսոնն ու ռուսաստանաբնակ հայ երգիչ Էդգարը զուգերգ ունեն, որի հիման վրա տեսահոլովակը նկարահանել են Հայաստանում։ Տեսահոլովակի ռեժիսորը Սերժ Գաբյանն է։ Tert.am Life–ը ներկա է եղել նկարահանումներին և իր ընթերցողներին է ներկայացնում բեքսթեյջ լուսանկարներ ու մանրամասներ։

Տեսահոլովակը տաղավարային պայմաններում է նկարահանվել։ Այն կարելի էր նկարահանել նաև Ռուսաստանում, սակայն Էդգարն ու իր թիմը որոշել են օգտագործել առիթն ու Բոսսոնին ցույց տալ Հայաստանը։ «Մենք կարող էինք սա անել Մոսկվայում` նույնիսկ  ավելի մատչելի տարբերակով, քանի որ այստեղ վճարում ենք թռիչքների, ապրելու տեղի համար,  սակայն ես և իմ պրոդյուսեր Տարոն Պողոսյանն ուզում էինք, որ Բոսսոնը տեսնի Երևանը, Երևանը` Բոսսոնին»,– պատմեց Էդգարը։

Բոսսոնն ու Էդգարը ծանոթացել են «Տաշի շոուի» շրջանակում։ «Համերգից հետո մեր թիմի հետ գնացել ենք  ռեստորան։ Ես նաև ստեղծագործում եմ։ Բոսսոնը հետաքրքրվեց` կա՞ն երգեր, որոնք գրել եմ, սակայն չեմ կատարել։ Ես իրեն ցույց տվեցի երգերից մեկը, որը լսելուց հետո ասաց, որ ուզում է կատարել այդ երգն ինձ հետ զուգերգով։ Ինձ համար դա շատ հաճելի էր։ Ի սկզբանե երգը լիրիկական էր, այն մի քիչ փոփոխեցինք և ավելի ռիթմիկ դարձրեցինք»,– պատմեց Էդգարը, ապա հավելեց, որ իրենց կոնտակտը միանգամից է ստացվել։ Որպես արտիստներ` ի սկզբանե համակրել են իրար։

Թեև երգիչը նշում է, որ ծանոթության պահից ընկերական հարաբերություններ են ձևավորվել, Բոսսոնը ռուսերեն չի խոսում, Էդգարը` անգլերեն։ Նրանց շփումը միջնորդավորված է լինում, ինչը բարդություններ է առաջացնում։

«Բոսսոնի հետ աշխատելը դժվար է, որովհետև կան իրավիճակներ, երբ լեզվական խնդիրները բարդացնում է ամեն ինչ։ Չես կարողանում ամբողջ ասելիքդ ներկայացնել։ Բացի այդ, մենք տարբեր երկրներում ենք աշխատում և տարբեր աշխատելաոճեր ունենք։ Եվրոպացի արտիստները ձայնագրությունն այլ կերպ են անում, մենք ` այլ։ Երբեմն, փոքրիկ բախումներ ենք  ունենում, ամեն մեկս մեր կարծիքն ենք ասում,– ասաց նա, իսկ հարցին, թե ում կարծիքն է հաղթում, պատասխանեց,– արդյունքում հաղթում է ընկերությունը։ Մշտական «հաղթող» չունենք, իրար լսում ենք, հասկանում` ով է ավելի ճիշտ և, ըստ այդմ, որոշում կայացնում։ Երկուսս էլ գնում ենք զիջումների, քանի որ երկուսս էլ ուզում ենք լավ արդյունք ունենալ»։

Էդգարից հետաքրքրվեցինք` իր կարծիքով` այս երգն իրեն ավելի մեծ ճանաչելիություն կբերի՞։ «Չենք մտածում` սա հիթ կդառնա և ինձ ավելի հանրահայտ կդարձնի՞ , թե՞ ոչ։  Մենք այնպես ենք անում, որ որակյալ աշխատանք ներկայացնենք»,– ասաց Էդգարը։

Տեսահոլովակի նկարահանման պայմանները լավագույնը չէին արտերկրից ժամանած երգչի համար. փոքրիկ տաղավար ու դիմահարդարման սենյակ, շոգ պայմաններ։ Բոսսոնից հետաքրքրվեցինք` որքանով է իր համար բարդ աշխատել այսպիսի պայմաններում։

«Ես 11-12 վիդեոֆիլմ եմ նկարահանել Գերմանիայում, Շվեդիայում, Լոս Անջելեսում, Սանկտ Պետերբուրգում։ Բյուջեն, երբեմն, քիչ է եղել, երբեմն` շատ։ Դրանցից մեկը 450 հազար եվրո է արժեցել, սակայն շատ գումարը նշանակություն չունի։ Եթե շատ գումար ես ծախսում, չի նշանակում, որ  պետք է լավ տեսահոլովակ ունենաս։ Կարող ես շատ ավելի մատչելի գնով ավելի լավ տեսանյութ ունենալ։ Հնարավոր է` 300 մլն դոլարի ծախս պահանջվի, սակայն մտահղացումդ, իսկապես, արժենա այդքան, հնարավոր է նաև շատ մեծ գումարներ ծախսես, բայց  իզուր։ Կարծում եմ` ռեժիսորի դերը շատ կարևոր է։ Տեղի ռեժիսորը խելացի մարդ է։ Ակնկալում եմ, որ ժամանակակից տեսահոլովակ կստացվի»,– ասաց նա ու հավելեց, որ իր տեսահոլովակներից շատերի մոնտաժով հենց ինքն  է զբաղվել, այս անգամ ներգրավված չէ մոնտաժային աշխատանքներում և անհամբերությամբ սպասում է վերջնական արդյունքին։