«Եթե «Միսս աշխարհն» արդար կայանա, լավ սպասելիքներ ունեմ». 17-ամյա Լիլի Սարգսյանը` «Միսս Արմենիայում» հաղթելու մասին

Երեկ կայացավ «Միսս Արմենիա» գեղեցկության մրցույթը, որի հաղթող ճանաչվեց 17-ամյա Լիլի Սարգսյանը։ Նա ներկայացնում է Երևանը։ Լիլին սովորում է Երևանի մշակույթի քոլեջում, մասնագիտությամբ ապագա դիզայներ է։

Լիլիին թագարդրեցին 2 մլն դրամ արժողությամբ թագով, որը պատրաստված է արծաթից և թանկարժեք քարերից։ «Միսս Արմենիայի» հասակը 1.72 սմ է։ Իր գեղեցկության գլխավոր գրավականը Լիլին համարում է աչքերը։ Tert.am Life–ը ներկայացնում է 17-ամյա աղջկա հարցազրույցը` «Միսս Արմենիա» թագին արժանանալուց հետո։ Լիլին խոսում էր առանց ավելորդ հուզմունքի։

Լիլին ասում է` հաղթելու նպատակով էի մասնակցում մրցույթին, սակայն եղել են նաև հուսահատության պահեր։ Նա դժվարացավ տարանջատել` «Միսս Արմենիա» թագին արժանանալն իր համար երազա՞նք էր, թե՞ նպատակ։

«Երազանքս, կարելի է ասել, նպատակ էր, որ այսօր հայտնվեմ այստեղ և նմանատիպ այլ  բեմերում։ Հաջորդ երազանքս է` ամեն ինչ անել «Միսս աշխարհում» Հայաստանի պատիվը բարձր պահելու համար։ Այս պահին իմ երազանքները կապված են կարիերայիս հետ»,– նկատեց նա։

Լիլիի խոսքով` առաջիկայում բոլոր ուժերը կենտրոնացնելու է  «Միսս Աշխարհ» հեղինակավոր մրցույթին պատրաստվելու և հավուր պատշաճի մասնակցելու համար։ «Միսս Աշխարհը» բավականին պատասխանատու մրցույթ է։ Tert.am Life–ի հարցին` ինչպե՞ս է գնահատում իր հնարավորությունները «Միսս Աշխարհում», Լիլին պատասխանեց. «Պետք է շատ աշխատեմ և ժամանակս տրամադրեմ միայն դրան։ Եթե արդար կայանա, լավ սպասելիքներ ունեմ»։

Խոսելով մինչև այս իր անցած ճանապարհին մասին` Լիլին ասաց, որ մի քանի ամիս է, ինչ մոդելային ասպարեզում է։ «Մինչև այս բարձր բեմեր չէի բարձրացել։ Սա առաջինն էր»,– ասաց հաղթանակած աղջիկը։

Ինչ վերաբերում է մյուս 23 աղջիկներից իր ֆավորիտների ցանկին և գլխավոր մրցակիցներին` Լիլին դիվանագիտական պատասխան տվեց` խուսափելով նշել որևէ մեկի անունը. «Բոլոր աղջիկները շատ գեղեցիկ են։ Անուններ նշել չեմ ուզում»։

Հայկական ընտանիքները հաճախ վերապահումով են մոտենում աղջիկների մոդելային կարիերային։ Լիլին նշեց, որ ծնողներն իրեն միայն ոգեշնչել են այս ընթացքում։

Աղջիկը կարևորում է, որ տարիների ընդմիջումից հետո Հայաստանում վերականգնվել է գեղեցկության ազգային մրցույթը։ Ինքը շատ էր ոգևորվել, երբ իմացել էր, որ Հայաստանում կրկին անցկացվելու է ազգային մրցույթ։ «Շատ ուրախ եմ, որ այս  տարի կրկին կայացավ մրցույթը։ Բոլորիս համար շատ ուրախ եմ սա հաղթանակ էր, բոլորի համար»,– ասաց նա։

Աղջիկները մրցույթին ներկայացել են 3 կերպարով` ազգային տարազով, լողագեստով և երեկոյան զգեստով։ Ներկայացնում ենք Լիլիի կերպարները։

Լուսանկարները՝ Գև Խուրշուդյանի