Սարոյի արցունքները, կնոջը նվիրված երգը, հայտնի հյուրերն ու մենահամերգի մյուս հետաքրքիր պահերը

Մարզահամերգային համալիրում երեկ կայացավ երգիչ Սարոյի մենահամերգը։ Սա երգչի առաջին մենահամերգն էր Երևանում։ Համերգից հետո կարելի է փաստել, որ այն շատ սպասված էր հանդիսատեսի կողմից, քանի որ համալիրի մեծ դահլիճը լեփ–լեցուն էր, իսկ պարահրապարակում շարժվելու տեղ չկար։ Համերգը սկսվեց 19։50, 19։00–ի փոխարեն, քանի որ համերգից մարդկանց` մեկ ժամ առաջ սկսված հոսքը չէր դադարում։

Հանդիսատեսը երգեց Սարոյի հետ, հուզվեց նրա զգացմունքներից, պարեց նրա կատարումների ներքո։ Tert.am Life–ը ներկա է եղել միջոցառմանն ու ներկայացնում է մենահամերգի հետաքրքիր և հուզիչ պահերը։

Համերգը մեկնարկեց «Սրտիս համար համար 1» երգով։ Սարոն շնորհակալություն հայտնեց իր հանդիսատեսին` նշելով, որ շատ երջանիկ է` այսպիսի հանդիսատես ունենալու համար։ Այնուհետև երգիչը կատարեց «Իմ արև», «Քանի», «Իմ աղջիկ», «Մի գնա», «Խոստանում եմ», «Էս աղջիկը գիժ ա» և այլ հիթեր։

Երեկոյի ամենահուզիչ պահերից մեկը «Կյանք ու կռիվ» ֆիլմի սաունդթրեքի կատարումն էր։ Այս երգը կատարել են թե՛ Արթուր Գրիգորյանը, թե՛ Ռազմիկ Ամյանը։ Սարոն այն ներկայացրեց իր մոտեցմամբ, կատարման ընթացքում նրան միացավ երգի հեղինակը` Արթուր Գրիգորյանը։ Սա թերևս ամենազգացմունքային կատարումն էր։ Սարոն ինքն էլ չկարողացավ զսպել հուզմունքն ու արցունքները, ինչը երևում է մեր լուսանկարչի ֆիքսած կադրերում։

Երգը կատարելուց հետո նա շնորհակալություն հայտնեց իր ուսուցչին` Արթուր Գրիգորյանին։ «Նա իմ ուսուցիչն է, իմ կնքահայրը։ Իմ առաջին քայլերից կողքիս է եղել մինչև օրս։ Շնորհակալ եմ»,– ասաց երգիչը։

«Դու իմ միակն ես» երգը կատարելիս Սարոն նշեց, որ իսկական երջանկություն է գտնել քո միակին ու մաղթեց, որպեսզի բոլորը գտնեն իրենց երկրորդ կեսին։ Երգիչն իր միակին` սիրելի կնոջը նվիրված ևս մի երգ կատարեց։ «Սրտիս անուն» երգում խաղարկված էր սիրելիի` Տաթևի անունը, որը Սարոն արտաբերում էր հատուկ շեշտադրությամբ «Թող իմ սերն ու կյանքը քեզ Տա Թև»։

Այս երգը Սարոն կատարեց դաշնամուր նվագելով, իսկ ավարտին խոսքն ուղղեց Տաթևին. «Շնորհակալ եմ քեզ Տաթև, որ ինձ պարգևել ես իմ կյանքի ամենամեծ հաղթանակին` Վիկտորյային»։ Ի դեպ, Սարոն դստերը նվիրված երգ էլ կատարեց։ «Իմ աղջիկը» հասցեագրված է իր Վիկտորյային, սակայն երգիչն այն նվիրեց աշխարհի բոլոր աղջիկ բալիկներին։

Սարոն զուգերգով ներկայացավ նաև երգչուհի Քրիստինե Պեպելյանի հետ։ «Ես, իսկապես, շատ հպարտ եմ ու շոյված, որ մեր երգարվեստի ամենաքնքուշ, ամենասիրուն երգչուհին ինձ հետ է, կողքիս և նույնպես շատ հուզված։ Նա ինձ պես հուզված է»,– ասաց երգիչը։ Քրիստինեն էլ հավելեց, որ շատ է սիրում Սարոյին և ուրախ է, որ երգիչն իր կողքին այսպիսի հանդիսատես ունի։

Մենահամերգի ժամանակ Սարոյի հետ ելույթ ունեցան պարային խմբեր։ Երգչի թիմն առանձնահատուկ ուշադրություն էր դարձրել լուսային էֆեկտներին։ 

Երեկոյի ավարտին Սարոն հատուկ շնորհակալություն հայտնեց Ավետ Բարսեղյանին, որը հեղինակել է իր երգերի զգալի մասի խոսքերը, իր երաժիշտներին, որոնց կենդանի նվագակցությամբ ելույթ ունեցավ և ստեղծագործական թիմին։ 

 Լուսանկարները` Շուշան Անտոնյանի