«Իմ երեխան մեծանում է ճիշտ, հզոր, գեղեցիկ». Լիանա Զուրաբյան

«Կասկածելի երեկո» հաղորդման վերջին թողարկման հյուրերից մեկն ասմունքող, հանդիսավար Լիանա Զուրաբյանն էր։ Ինչպես Լիանայի մասնակցությամբ, գրեթե, յուրաքանչյուր հաղորդում, այս մեկը ևս զերծ չմնաց քննարկումներից։

Tert.am Life–ի հետ զրույցում, անդրադառնալով եթերին, Լիանան  ասաց. «Ես, ընդհանրապես, ինձ պահում եմ այնպես, ինչպես տեղն է պահանջում։ Եթե դա հումորային ծրագիր է, պետք է քեզ պահես ազատ ու անկեղծ։ Ես տեսակով անկեղծ եմ, շինծու ոչինչ չունեմ»։

Դիտարկմանը, որ հաճախ հումորը կառուցվում է իր շուրջ, իր հետ կապված ամեն ինչ դառնում է հասարակական լայն քննարկման առարկա, Լիանան արձագանքեց, որ բոլորովին չի սրտնեղում։ «Եթե ես դրանով մարդկանց զբաղմունք եմ տալիս այս անգործ երկրում, նրանք էներգիա են ստանում, թող ստանան։ Ինձ ոչինչ չի լինում։ Երևի բոլորը տեսել են «Էլիզա» մուլտֆիլմը, երբ խորթ մայրը գորտեր է դնում, բայց վարդեր են բացվում։ Ով ինչ անում է, իրեն է անում։ Ես իմ թշնամիներին էլ, վատաբանողներին էլ սիրում եմ, հարգում։ Որքան իրենք ինձ վատաբանում են, այնքան ինձ մոտ ամեն ինչ հիանալի է լինում»,– ասաց նա։

Լիանան վստահ է, որ իր մասին բացասական կարծիքներ գրողների զգալի մասը կեղծ օգտատերեր են։ «Օնլայն ցանցերում  մեծ մասը ֆեյքեր են։ Վատ գրառումներ անողները հիմնականում իմ չուզողներն ու ֆեյքեր են։ Անկեղծ մարդը շատ չուզողներ է ունենում։ Ասում են, եթե մարդն իմանա, իր մասին ինչ են խոսում,ա նընդհատ կռիվ կլինի, իսկ ես անկեղծ մարդ եմю իմ խոսքն անկեղծ հնչում է յուրաքանչյուր վայրում, յուրաքանչյուր մարդու ճակատին, և մարդը սկսում է թշնամանալ իմ հանդեպ, լիքը ֆեյքեր է բացում։ Ես դրան բանի տեղ չեմ դնում։ Ով ինչ անում է, իրեն է անում։ Ինձ վրա ոչինչ չի անդրադառնում։ Շնորհակալ եմ, բոլորին, թող շարունակեն զբաղվել իմ PR–ով»,– նշեց Լիանան։

Ըստ նրա` այս քննարկումներից իր գործունեությունը չի տուժում. «Պոեզիա լսող, իմ խորը աշխարհը հասկացող մարդիկ գալիս են լսում, խորանում, ջերմանում։ Վերջերս ես երեկո ունեցա, սրահը լեփ–լեցուն էր»։

Լիանան մանկահասակ երեխա ունի։ Հարցին, արդյոք հետագայում փորձելու է հեռու պահել նրան հասարակական քննարկումներից` այդպիսով պաշտպանելով երեխային, Լիանան պատասանեց. «Իմ երեխան մեծանում է ճիշտ, հզոր, գեղեցիկ, գիտի` ում հետ ինչպես։ 1 տարեկան, 2 ամսական է, սակայն այնքան խելք ունի, որ, երևի թե, այդ մասին չպետք չէ հիմա խոսել, այդ մասին դեռ կլսեք։ Իմ երեխան հասկացող է հենց այս տարիքից»։