«Նայելով մարդու կոշիկին` կարող ես հստակ ասել, թե ինչ ճաշակ ունի». Մարտա Կիրակոսյանի աշնանային look–երը

13:18 • 02.11.17

Տարվա ցանկացած եղանակին ոճային լինելը յուրաքանչյուր աղջկա «պարտքն» է։ Աշունը, սակայն, ավելի լայն հնարավորություն է տալիս ոճային լինելու, հագուստները համադրելու։ Երգչուհի Մարտա Կիրակոսյանը հաճախ է աչքի ընկնում ոճային հետաքրքիր լուծումներով։ Tert.am Life–ը նրանից հետաքրքրվել է, թե ինչ կանոններ ունի հագուստ ընտրելիս։

Մարտան նշեց, որ իր համար առաջնայինը հարմարավետությունն է։ «Աշունն իմ ամենասիրելի եղանակն է։ Ի տարբերություն ձմռանը, կարողանում ես հագնվել հարմար և գեղեցիկ, հետաքրքիր համադրություններ անել»,– ասաց երգչուհին ու հավելեց, որ, սովորաբար, գիշերն է որոշում, թե ինչ է հագնելու առավոտյան, հակառակ դեպքում, ընտրությունը շատ երկար է տևում։ «Եթե որոշած չեմ լինում, թե հաջորդ օրն ինչ պետք է հագնեմ, կարող եմ 2 ժամ ուշանալ հանդիպումից»,– նշեց նա:

Արտաքին տեսքի ամենակարևոր մասը Մարտան համարում է կոշիկը։ Նա խնամքով է վերաբերում այս ընտրությանը, դիմացինի ճաշակի մասին կարծիք կազմելիս էլ առաջին հերթին կոշիկին է ուշադրություն դարձնում։ «Կոշիկն ամենակարևոր աքսեսուարն է։ Նայելով մարդու ընտրած կոշիկին` կարող ես հստակ ասել, թե նա ինչ ճաշակի տեր է»,– նկատեց երգչուհին։

Հագուստ ընտրելիս Մարտան չի կարևորում բրենդն ու գինը։ Երգչուհին ասում է, որ ինքը բրենդամոլ չէ, պարզապես, սիրում է գեղեցիկ հագնվել։ Թրենդային լինելու համար Մարտան ունի իր բանաձևը. «Հաստատ գիտեմ, որ ունեմ իմ ոճը, դա տարբերվող է, թրենդի մեջ, թե դուրս, ճաշակի հարց է։ Երբեք չեմ շարժվել թրենդներով, իհարկե, ժամանակ առ ժամանակ նայում եմ նորաձևության ցուցադրությունները, սակայն ոչ երբեք բրենդամոլությամբ չեմ տառապել»:

Գունավոր աղջկա սիրել ի գույնը սևն է. «Չնայած հրապարակածս վերջին նկարներում գունավոր եմ հագնված, ավելի մուգ գույներ եմ սիրում` սև, մոխրագույն կամ պաստելային գույներ»:

Առօրյայում Մարտան նախընտրում է սպորտային հագուստներ, մարզակոշիկներ։ Այն, ինչ կրում է երգչուհին տվյալ օրը փոխկապակցված է իր տրամադրության և եղանակի հետ։ «Լինում են օրեր, երբ դասական հագնվելու տրամադրություն եմ ունենում և չեմ ուզում սպորտային ոճում լինել, սակայն ավելի շատ լինում եմ սպորտային ոճում»,– նշեց նա։