«Թե՛ ես, թե՛ Գոհարը շատ գոհ ենք իմ ելույթից». Լիլի Սարգսյանը` «Միսս Աշխարհի» եզրափակիչ չանցնելու մասին

14:16 • 20.11.17

Հայաստանն այս տարի առաջին անգամ պետք է մասնակցեր «Միսս Աշխարհ» գեղեցկության մրցույթին, Լիլի Սարգսյանը մեկնել էր Չինաստան` մասնակցելու մրցույթին, սակայն նա չի անցել մրցույթի եզրափակիչ փուլ և չի մասնակցել երեկ կայացած մրցույթին։ «Միսս Արմենիա» տիտղոսակիրը քիչ առաջ ժամանել է Երևան։ Հայաստան վերադառնալուց հետո Tert.am Life–ն առաջինն է խոսել 17–ամյա աղջկա հետ «Միսս Աշխարհին» մասնակցության և նախընտրական փուլը չհաղթահարելու մասին։

Ավելի վաղ, Tert.am Life–ին տված հարցազրույցում Լիլին ասել էր, որ նոյեմբերի 18–ին հանդիսատեսը կհամոզվի, որ ինքն ինքնավստահության պակաս և հուզմունք չունի, կոմպլեքսավորվածությունը հաղթահարված է։ Նոյեմբերի 18–ին, սակայն, նա ելույթ չունեցավ։

«120 աղջիկ կար, որոնցից 80–ը չանցան։ Նրանցից մեկն էլ ես էի։ Նեղվածությունս քիչ էր, քանի որ կարևորը մասնակցությունն է։ Առաջին տարին է, որ Հայաստանը ներկայանում էր «Միսս Աշխարհ» մրցույթին, և ես էի ներկայացուցիչը։ Դա ինձ համար շատ մեծ հպարտություն էր։ Ճիշտ է, հուզմունք կար, բայց դա բնական է։ Բոլոր մասնակիցների, նույնիսկ, հաղթողի մոտ հուզմունք կար»,– ասաց Լիլին։

«Միսս Արմենիա» տիտղոսակրից հետաքրքրվեցինք, թե ինչպես է գնահատում իր ելույթը մրցույթում։ «Եթե ելույթս դիտել եք, թե՛ պարի, թե՛ մյուս առումներով կոմպլեքսներ չկային։ Ես գոհ եմ իմ ելույթից։ 120 մասնակցից միայն 40–ը պետք է ընտրվեին։ Կոնկրետ չեմ կարող ասել` ինչն ինձ խանգարեց։ Չեմ նկատել ինչ–որ հանգամանք, որն ինձ խանգարել է։ Փորձել եմ ներկայանալ շատ լավ»,– նշեց նա։

Արդյունքների ամփոփումից հետո Լիլին խոսել է «Միսս Արմենիա» հիմնադրամի նախագահ Գոհար Հարությունյանի հետ, որն ի սկզբանե վստահում էր 17–ամյա աղջկան։ «Երբ Գոհարն իմացավ, որ չեմ անցել, ասաց, որ չմտահոգվեմ ոչնչի համար։ Ամեն ինչ լավ էր, ես լավ ներկայացա։ Թե՛ ես, թե՛ Գոհարը շատ գոհ ենք իմ ելույթից»,– պատմեց Լիլին։

Խոսելով այն մասին, թե իրեն ինչ տվեց «Միսս աշխարհը», Լիլին պատասխանեց, որ այս մրցույթի շնորհիվ ձեռք է բերել նոր ծանոթություններ։ «Շատ լավ տպավորություններով եմ վերադարձել։ «Միսս աշխարհը» ինձ ավելի պրոֆեսիոնալ լինելու հնարավորություն տվեց»,– եզրափակեց նա։