Նոր ֆիլմաշար` Սոսի, Խորենի, Միշոյի, Արամ MP3–ի, Իվետայի և այլ հայտնի մարդկանց մասնակցությամբ

Դեկտեմբերի 19-ից մեծ էկրան կբարձրանա «Մեր երազանքի ճանապարհ» նոր ֆիլմը, որը բաղկացած է 7 նովելից։ «Շարմ Հոլդինգ»-ը ֆիլմի առաջին մանրամասները տրամադրել է Tert.am Life–ին և հայտնել, որ յուրաքանչյուր նովել նկարահանել է մի ռեժիսոր։ 7 ռեժիսորներն են`Արամ Շահբազյանը, Արկա Մանուկյանը, Արեն Մալաքյանը, Էդգար Բաղդասարյանը,  Հրաչ Քեշիշյանը, Արշալույս Հարությունյանը և Մհեր Մկրտչյանը:

Ֆիլմերում խաղացել են Սոս Ջանիբեկյանը, Խորեն Լևոնյանը, Միշոն, Արամ MP3-ը, Շանթ Հովհաննիսյանը, Իրինա Հարությունյանը, Արմեն Էլբակյանը, Անի Պետրոսյանը, Իվետա Մուկուչյանը, Բաբկեն Չոբանյանը, Ժան Նշանյանը, Շաքե Թուխմանյանը, Եգոր Գլումովը, Արման Մարգարյանը և այլք։

««Շարմ Հոլլդինգը», Հայաստանի հանրային հեռուստաընկերութունը և DMH studio-ն  համատեղ նախաձեռնել են մի նախագիծ, որն իրենից ներկայացնում է 7  նովելից բաղկացած «Մեր երազանքի ճանապարհ» գեղարվեստական ֆիլմ: Յուրաքանչյուր նովելի հիմքում ընկած է մի պատմություն, սակայն բոլորն էլ առնչվում են  Հայաստանի անցած ճանապարհին ու հիմնված են Հայաստանի հանդեպ սիրո վրա: Յոթ  նովելից բաղկացած ֆիլմի հերոսները մեր կողքին ապրող մարդիկ են, մեր անկախության 25-ամյա ճանապարհն անցած  տարբեր ճակատագրեր: Յոթ պատմություն, որոնցում կա պայքար, սեր, նվիրվածություն, հիասթափություն, կորստի ցավ, սեր ու երազանքներ… Ֆիլմը հանդիսատեսին պատմում է ամենապարզ ճշմարտությունների,  մարդկային կարևորագույն արժեքների՝ նվիրվածության ու միմյանց աջակից լինելու, արյան կանչի, սիրո ու ջերմության, նոր ընտանիքի ստեղծման և պայծառ երազանքների մասին»,– հայտնում են ընկերության հասարակայնության հետ կապերի բաժնից։

7 նովելներն են՝

1.    Բարև, սիրելիս

Սցենարը՝ Հարություն Հարությունյանի

Ռեժիսոր՝ Արամ Շահբազյան

Օպերատոր՝ Արմեն Ահարոնյան

1992 թվական: Նա, ով անցել է պատերազմի ճանապարհով, երբե՛ք չի մոռանա այն:  Բայց գուցե չմոռանա, որովհետև առաջնագծում՝ վտանգի, փոշու ու կարոտի մեջ  գրված երազանքի մի նամակ է հիշում, որը նույնիսկ օտարների ձեռքում  հնչում է ինչպես մայրենի ու դառնում անձնական: 12 մարտիկներ առաջնագծում ձեռքից ձեռք են փոխանցում ու արտագրում մի նամակ, որ գրել է իրենցից մեկը: Ճակատագրով՝ պատերազմը վերապրում է միայն նամակը:

2.    «Ֆա»

Սցենարը՝ Էդուարդ Այանյանի

Ռեժիսոր՝ Արկա Մանուկյան

Օպերատոր՝ Վարդգես Մանուկյան

1993 թվական: «Կորած»  նոտա, որը  կարող է ճակատագրական դառնալ մի  ամբողջ հանրապետության համար, բայց թաքնված է երկրի խորքերում: Ընդամենը նոտայի ձայն՝ բարձրացող երկինք, որ այնուհետ տարածվո՜ւմ է ու դառնում հանրապետության գլխավոր ժամացույցի մեղեդին: Մի՞թե այն  հնչեցնելը մնալու է  իբրև երազանք… Նոտա, որը գտնելու ճանապարհին խենթերը կզանգեն հազար ու մի եկեղեցիների զանգերը:

3.    Ձյուն 

Սցենարի հեղինակ և ռեժիսոր՝ Արեն Մալաքյան

Օպերատոր՝ Ֆելիքս Շախտոյան

2005 թվական: Կարծում եք հազվադե՞պ է ապրիլին ձյուն տեղում: Ձյունը կգա՛, եթե ուժգին ցանկանաս ու հավատաս: Հատկապես, եթե այն իր ճերմակ սավանով Ցեղասպանության ճանապարհին թաքցրել ու փրկել է հորդ պապին, ֆաշիստներից՝ քո պապին, արցախյան պատերազմում՝ հորդ…Դա երազանք չէ, այլ՝ իրական, հույսով լցված  պատկեր, որ փաթիլ-փաթիլ թափվում է երկնքից:

4.    Սիմոնի ճամփան

Բորիս Հայրապետյանի «Պարզ պատմություն» պատմվածքի մոտիվներով

Ռեժիսոր՝ Էդգար Բաղդասարյան

Օպերատոր՝ Մկրտիչ Բարոյան

2010 թվական:  Ընդամենը մի կարճ տարածություն, որ բաժանում է ոչ միայն երբևէ իրար կորցրած  մարդկանց ու նրանց երազանքները, այլև ազգերի կենսագրություն, պատմություն: Եղածը մի փոքր ձորակ է, սակայն շրջանցելու համար անցնում ես հազարավոր կիլոմետրեր ու այդ ճանապարհին ինքդ քեզ հարց տալիս՝ թե ո՞վ ես ու ի՞նչ ես  ցանկանում իրականում: 

5.    Հայրը

Սցենարը՝ Հարություն Կբեյանի

Ռեժիսոր՝ Հրաչ Քեշիշյան

Օպերատոր՝ Սուրեն Թադևոսյան

 2013 թվական: Հմայիչ, հաջողակ գործարար, երազանքներ իրականացնող  տղամարդ, ով  իր կյանքում հասել է բարձունքների և վստահ է, որ ամեն ճանապարհ բաց է իր առաջ: Բայց…կան իրողություններ, որոնք վեր են ամեն ինչից և պարուրված են մի սիրով, որի անունն է ծնող: Չես կարող լինել լիարժեք, եթե չես գրկում (թեկուզ մտքով) նրան, ով բոլորից շատ է սիրում քեզ: 

6.    Մեղրամիս   

Սցենարը՝ Նարեկ Մարգարյանի

Ռեժիսոր՝ Արշալույս Հարությունյան

Օպերատոր՝ Սուրեն Թադևոսյան

2015 թվական: Հանուն սիրո՜. այս արտահայտությամբ են կատարվում ամենաանհավանական խենթությունները և միայն  սիրո բուրմունքից արբելով է հնարավոր Էյֆելյան աշտարակը բերել Երևան կամ  ընտրությունների մասնակցել՝ հենց հարսանիքիդ օրը: Նորաստեղծ ընտանիք, որ կհասնի գիշերային կտուր՝  շամպայնի բաժակներ բարձրացնելու համար:  Գլխապտույտ երազանքներ և ամեն ինչ՝ սիրո ճանապարհին:

8.    Սեր, երազանքներ

Սցենարի հեղինակ և ռեժիսոր՝ Մհեր Մկրտչյան

Օպերատոր՝ Ռուբեն Գասպարյան

2016 թվական: Կյանքը մի հիանալի արկած է  նրանց համար, ովքեր ցանկանում են վերապրել խենթ հիշողություններ կամ վերագտնել կորցրած նոտաներ, թեկուզ արդեն ճերմակած ու հազարավոր կիլոմետրեր իրարից հեռու…Բայց անհրաժեշտ է հանդիպե՛լ,  կրկի՛ն  ու ջերմորեն գրկել միմյանց… և գուցե հենց Ամանորի՞ն,  երբ երազանքների ճանապարհները  կարո՛ղ են  խաչվել: