«Ֆուլ հաուսի» քեֆը նախագծի ավարտի առթիվ և հնարավոր վերադարձը

17:10 • 20.12.17

Ժամանց

«Ֆուլ հաուսի» անձնակազմն օրերս Երևանի ռեստորանային համալիրներից մեկում նշել է նախագծի ավարտն ու Ամանորին ընդառաջ հավաքույթ կազմակերպել։ Նախագծի պրոդյուսերը Արմեն Պետրոսյանը` Մենչը, Tert.am Life–ին է տրամադրել երեկույթի լուսանկարներն ու հայտնել, որ երեկույթն անցկացրել են ընկերական մթնոլորտում։

«Մեր անձնակազմից դուրս մարդ չկար։ Սա նախատոնական հավաքույթ էր, քանի որ Ամանորին ամբողջ կազմով չենք կարողանա հավաքվել։ Շատերը կլինեն արտերկրում»,– ասաց նա։

«Ֆուլ հաուսը» համարվում է հայկական հեռուստաեթերի ամենաբարձր ռեյթինգն ունեցող նախագծերից մեկը։ Ստեղծագործական թիմն արդեն ունի նոր գաղափարներ, որոնք կյանքի կկոչվեն ավելի ուշ։

«Հետագայի համար շատ մտքեր կան իրագործելու, սակայն նախապես չեմ ուզում խոսել այդ ամենի մասին։ Առայժմ բոլորս տևական հանգստի կարիք ունենք, ինչից հետո կմտածենք նոր անելիքների մասին։ Ամեն դեպքում հստակ կարող եմ ասել, որ մեր թիմը չի ցրվի»,– ասաց Մենչն ու հավելեց, որ ի դեմս «Ֆուլ հաուսի» հիմնական անձնակազմի` ձեռք է բերել հուսալի գործընկերներ, ինչ-որ առումով նաև ընկերներ։

Դիտարկմանը, որ պրոդյուսերին ձեռնտու է մի նախագծի ավարտից հետո, գոնե, մասնակի փոխել դերասանական կազմը, որպեսզի կրկնության խնդրի առաջ չկանգնի, Արմենն արձագանքեց, որ դերասանական կազմի հետ նոր համագործակցությունները կլինեն ըստ պահանջի։ Նա նշեց, որ բոլորի հետ է շարունակելու աշխատել, պարզապես դեռ պարզ չէ, թե ում հետ ինչ շրջանակում։

Միհրան Ծառուկյանի, Գոռ Հակոբյանի, Քրիստինա Եղոյանի, Արփի Գաբրիելյանի հետ Մենչը կշարունակի աշխատել երաժշտական բնագավառում։

Մենչը չի բացառում, որ որոշակի դադարից հետո «Ֆուլ հաուսը» կվերադառնա եթեր նոր իրավիճակներով, սակայն հստակ որևէ բան ասել չի ցանկանում։ Ամեն ինչ ավելի պարզ կլինի ամռանը, երբ նախապատրաստվեն նոր եթերաշրջանին։

«Ֆուլ հաուսի» վերջին սերիան կցուցադրվի դեկտեմբերի 31–ին, իսկ ավարտին Միհրան Ծառուկյանը, ավանդույթի համաձայն, նոր տեսահոլովակ կներկայացնի։ Այս անգամ տեսահոլովակը նկարահանվել է «Սիրահարվել եմ» երգի հիման վրա։