Հայտնիները` Տիգրան Նալչաջյանի «Արթնացիր» ֆիլմի պրեմիերային

Մոսկվա կինոթատրոնում երեկ կայացավ Տիգրան Նալչաջյանի «Արթնացիր» ֆիլմի պրեմիերան, որին ներկա էին մի շարք հայտնի մարդիկ։ Tert.am Life–ը ներկայացնում է պրեմիերայի հետաքրքիր պահերն ու զրույցը սցենարի հեղինակ, ռեժիսոր և գլխավոր դերակատար Տիգրան Նալչաջյանի հետ։

Ֆիլմի բեմադրող օպերատորը Պետիկ Ավետիսյանն է։ Այստեղ նկարահանվել են նաև Օֆելյա Հարությունյանը, Միլենա Ավանեսյանը, Մարգարիտա Հունանյանը, Ադամ Կարապետյանը և այլք։ Որպես ֆիլմի սաունդթրեք` ընտրվել է «Նեմրա» խմբի գեղեցիկ ստեղծագործություններից մեկը` Daisy–ն։

Եթե ֆիլմի սցենարական ու ռեժիսորական աշխատանքները լրացնում են իրար, ռեժիսորական ֆիլմում որպես դերասան ներկայանալը փոքր–ինչ բարդացնում է աշխատանքը, քանի որ սեփական խաղին երրորդ աչքով նայելու խնդիր է առաջանում։ Տիգրանը նշեց, որ այս առումով իրեն շատ է օգնել  ֆիլմի երկրորդ ռեժիսորը` Լուսնթագ Պարույրյանը, որը հետևել է իր խաղին։ 

«Կարծում եմ` այլ ռեժիսորի հետ աշխատելու դեպքում նույն կերպ կխաղայի։ Մտադիր եմ հետագայում անել  ֆիլմեր,  որոնցում ինքս չեմ խաղա կամ փոքր դերեր կխաղամ։ Ինձ համար ինքնանպատակ չէ իմ ֆիլմերում երևալը, սակայն Հայաստանում նկարահանվելու հնարավորություններն այդքան շատ չեն, օգտվում եմ նաև այդ առիթից ու նկարահանվում իմ ֆիլմերում»,– ասաց նա։

Նրանից հետաքրքրվեցինք, թե որքանո՞վ կհետաքրքրեր իրեն ֆիլմը, եթե իր աշխատանքը չլիներ։ Իր արած աշխատանքին երրորդ աչքով նայել ռեժիսորը դժվարացավ, քանի որ անմիջական մասնակցություն է ունեցել ստեղծման բոլոր օղակներում` սկսած սցենարի ստեղծումից։ 

«Իմ մասնակցությունը մի փոքր խանգարում է օբյեկտիվ պատասխանել, թե որքանով է ֆիլմը հաջողված, սակայն ես միանշանակ կգայի սա նայելու` որպես հայկական ֆիլմ։ Կարծում եմ` գրավիչ սյուժե ունի, շրջադարձեր, էմոցիոնալ պահեր ու լուսավոր ավարտ, որը մարդուն հնարավորություն է տալիս վայելել կինոն։ Ես ինքնաքննադատ լինելու կողմնակից եմ։ Կարծում եմ` այս ֆիլմը բավականին առաջ էր նախորդ` «Չներվածները» ֆիլմի համեմատ, սակայն իմ հաջորդ ֆիլմը կլինի ավելի լավը, քան  սա էր։ Յուրաքանչյուր հաջորդ ֆիլմում պետք է լինի զարգացում։ Այստեղ ես տեսա իմ առաջընթացը։ Կարևոր էր նաև դերասանների հետ աշխատանքը` հաշվի առնելով, որ դերասանական կազմում կային կինոյում քիչ փորձ ունեցող և ընդհանրապես փորձ չունեցող մարդիկ»,– ասաց նա։

Լուսանկարները` Շաքե Հովհաննիսյանի