Հայտնի են «Արտավազդ» մրցանակաբաշխության հաղթողները

Թատրոնի միջազգային օրը՝ մարտի 27-ին, ոչ միայն շնորհավորանքներ լսեցին, այլև կատարված աշխատանքի համար շնորհակալություն ստացան թատերարվեստի մի շարք ներկայացուցիչներ: Սունդուկյանի անվան ազգային ակադեմիական թատրոնում երեկ կայացավ «Արտավազդ» ամենամյա մրցանակաբաշխությունը, որին ներկա էին երևանյան և մարզային թատրոնների դերասաններ, դրամատուրգներ, բեմանկարիչներ, թատերական ասպարեզին այս կամ այն կերպ առնչվող մարդիկ:

Tert.am Life-ը ներկա է գտնվել միջոցառմանն, ֆիքսել հետաքրքիր պահերն ու բոլոր մրցանակակիրներին:

Այս տարի մրցանակաբաշխությունը նվիրված էր ՀՀ ժողովրդական արտիստ Ալեքսանդր Գրիգորյանի հիշատակին: Մրցանակաբաշխության սկզբում մեծ էկրանին ցուցադրվեց Ալեքսանդր Գրիգորյանի մտորումների մասին պատմող տեսաֆիլմ: Մրցանակաբաշխության հաղորդավարները Լուիզա Ներսիսյանն ու Վիգեն Ստեփանյանն էին:

Մրցանակաբաշխությանը ներկա էր ՀՀ Մշակույթի նախարար Արմեն Ամիրյանը, որը, ողջունելով թատերարվեստի ներկայացուցիչներին, շնորհավորեց նրանց՝ ստեղծագործական նորանոր հաջողություններ մաղթելով. «Իհարկե, կուզեի, որ այսօր շատ ավելի տոնական լիներ, դահլիճում նստած մարդիկ  լինեին առնվազն փողկապով, բայց կարծում եմ` յուրաքանչյուր տարի մենք կարձանագրենք շատ ավելի բարձր տրամադրություն, և այդ լավ տրամադրությունը մեզ կբերի նաև տոնական մթնոլորտ: Կարծում եմ` համամիտ եք ինձ հետ, որ թատրոնի բեմն այն վայրն է, որտեղ ծնվում են գաղափարներ, մտքեր, որոնք հանրությանն առաջնորդում են երազի երկիր, երազի հայրենիք: Թատրոնի բեմն այն վայրն է, որտեղ ծնված գաղափարները ազնվացնում, ջերմացնում են մեզ»,-ասաց Ամիրյանը:

Հայաստանի թատերական գործիչների միության նախագահ Հակոբ Ղազանչյանն իր ելությում նշեց, որ այսօրվա թատրոնն ունի տաղանդավոր, երիտասարդ  ստեղծագործողներ. «Մեր թատերական երիտասարդությունը փայլուն հանդես եկավ վերջին տարիներին: Մենք ունեցանք հետաքրքիր աշխատանքներ` թե՛ բեմադրություններ, թե՛ դերակատարումներ, թե՛ ձևավորումներ, ինչի համար շատ ուրախ եմ։ Արդեն իրենց հաստատած երիտասարդներից հետո գալիս է նոր սերունդ, գալիս են հետաքրքիր մտածողություն ունեցող մարդիկ, և հանգիստ կարելի է ասել, որ թատրոնի վաղվա օրը առավել, քան տեսանելի է»:

«Լավագույն դերասանուհի» անվանակարգում մրցանակին արժանացավ Տաթև Ղազարյանը «Սովորական օր» ներկայացման մեջ Ջուլիայի դերակատարման համար: Tert.am Life-ի հետ զրույցում Տաթևն ասաց, որ ինքը տարիներ շարունակ ներկայացված է  եղել «Արտավազդ»-ի տարբեր անվանակարգերում, այս առումով ռեկորդակիր է:

«Մի քանի անգամ որպես երիտասարդ դերասանուհի եմ ներկայացվել, մի անգամ ստացել եմ «Երիտասարդ դերասանուհի» մրցանակը, հետո «Երկրորդ պլանի լավագույն դերակատար», հիմա արդեն «Լավագույն դերասանուհի», ինչի համար շատ ուրախ եմ: Շնորհակալ եմ ժյուրիի կազմին, շնորհակալ եմ իմ ռեժիսորին, իմ թատրոնին, որ միշտ իմ կողքին է, և ավելի պարտավորված այսուհետև պիտի բեմ բարձրանամ»,-ասաց Տաթևը:

«Լավագույն դերասան» անվանակարգում մրցանակը հանձնվեց միանգամից երկու դերասանների` Ավո Խալաթյանին «Ռևիզոր» ներկայացման համար և  Միքայել Վաթինյանին «Ո՞վ է վախենում Վերջինիա Վուլֆից» բեմադրության մեջ մարմնավորած կերպարի համար:

«Լավագույն երիտասարդ  դերասանուհի» ճանաչվեց Ջեմմա Աղամյանը` «Երկնագույն շան աչքերը» ներկայացման համար: Գյումրու Վ.Աճեմյանի անվան պետական դրամատիկական թատրոնի երիտասարդ դերասանուհին Tert.am Life-ի հետ զրույցում անկեղծացավ, որ իր համար,  իսկապես, անակնկալ էր իր համար մրցանակը ու առաջինն էր իր ստեղծագործական կյանքում:

«Պարտավորեցնող է, նաև շատ ոգևորող, որովհետև մենք ապրում ենք մի հասարակության մեջ,  որտեղ ոգևորող բաներ շատ քիչ կան: Թե՛ հասարակությունը, թե՛  շրջապատող աշխարհը քիչ է ոգևորում մարդուն, և անընդհատ  փորձում ենք ոգեշնչման աղբյուր վերցնել ինչ-որ տեղից»,-ասաց նա: Տարվա լավագույն երիտասարդ դերասանուհին ցանկություն չունի մշտական բնակության տեղափոխվել մայրաքաղաք և այստեղ ծավալել մասնագիտական գործունեություն: «Հետաքրքիր  նախագծերին մասնակցելու համար, ժամանակ առ ժամանակ, գալիս եմ, բայց Գյումրին արվեստների մայրաքաղաք է, ու ես ինձ ավելի լավ եմ զգում արվեստի, քան ՀՀ մայրաքաղաքում»,- նկատեց նա:

«Լավագույն երիտասարդ  դերասան» անվանակարգում  հաղթող ճանաչվեց Նարեկ Բաղդասարյանը` «Համլետ Machine» բեմադրության մեջ մարմնավորած դերի համար:

Մրցանակաբաշխության ընթացքում հանձնվեց նաև ՀՀ ժողովրդական արտիստ Ալեքսանդր Գրիգորյանի անվան հատուկ «Արտավազդ» մրցանակ, որը հանձնեցին Ալեքսանդր Գրիգորյանի դուստրն ու որդին: Այն  տրվեց դերասանուհի և բեմադրիչ Նարինե Գրիգորյանին` «Իմ կյանքը իմ  ճամպրուկի մեջ» ներկայացման համար: Նարինեն, հազիվ զսպելով հուզմունքը, նկատեց, որ դահլիճում շատերն են եղել թատերական գործունեության ընթացքում իր ուսուցիչները և առանձնացրեց, հատկապես, Ալեքսանդր Գրիգորյանին:

«Երբ ընդունվել էի Ալեքսանդր Գրիգորյանի կուրս, ինձ միշտ հարցնում էին՝ դու նրան բարեկա՞մ ես, ես շարունակ ասում էի՝ չէ, բայց վերջերս հասկացա, որ այո՛, մենք հարազատներ ենք, որովհետև Ալեքսանդր Գրիգորյանը ամեն վայրկյան իմ կողքին է եղել: Նա գիտեր իմ ապրումները, նույնիսկ, իր վիրահատության հաջորդ օրը եկել էր իմ պրեմիերային, որովհետև պարտադիր պետք է ներկա լիներ»,- վերհիշեց Նարինեն:

Այս տարի խրախուսական մրցանակներ հանձնվեցին թատերարվեստում իրենց առաջին քայլերն արած ու արդեն հաջողություն գրանցած երիտասարդ դերասանների: «Արտավազդ» դեբյուտ դիպլոմների արժանացան Հռիփսիմե Նահապետյանը, Լաուրա Ստեփանյանը, Հարութ Մելիք-Բեկյանը և Պապ Իսպիրյանը:

«Արտավազդ» խրախուսական մրցանակը տրվեց բեմադրիչ Արմեն Սաֆարյանին Օսկար Ուայլդի պիեսի հիման վրա բեմադրված «Սալոմե» ներկայացման համար:

Թատերարվեստին արժանապատիվ ծառայության համար «Արտավազդ»-ի արժանացան Երվանդ Ղազանչյանը, Ռաֆայել Քոթանջյանը, Արթուր Ութմազյանը և Արմեն Սանթրոսյանը:

Թատերական գործին անմնացորդ ծառայելու համար Թատերական գործիչների միության  ոսկե մեդալների արժանացան Վարուժան Խաչատրյանը և Գագիկ Թովմասյանը:

«Լավագույն երիտասարդ բեմադրիչ» ճանաչվեցին Նորա Գրիգորյանը՝ «9 ամիս» և Սարգիս Արզումանյանը՝ «Անասնաֆերմա» ներկայացումների համար:

«Լավագույն սցենոգրաֆիա» անվանակարգում հաղթեց Մարիամ Մուրադյանը և Տաթև Հովհաննիսյանը՝ «Չափն ըննդդեմ չափի» ներկայացման համար:

«Լավագույն մանկական ներկայացում»  ճանաչվեց Պատանի հանդիսատեսի թատրոնում բեմադրված՝ Ա. Միրիջանյանի «Փոքրիկ ուրվականը»:

«Լավագույն երիտասարդական ներկայացում» անվանակարգում հաղթող ճանաչվեց Լուսինե Երնջակյանի  «Ռոմեո և Ջուլիետ» նորարարական մոտեցումներով բեմադրված ներկայացումը:

«Լավագույն պիես» համարվեց Կարինե Խոդիկյանի «Երկու օր դրախտում» ստեղծագործությունը:

«Երկրորդ պլանի լավագույն դերասանուհի» ճանաչվեց Քնարիկ Զաքարյանը՝ «Վատ տղաներ» ներկայացման համար:

«Երկրորդ պլանի լավագույն դերասան» ճանաչվեց Վահագն Գալստյանը:

Մրցանակաբաշխության փորձագետների կազմում եղել են ՀՀ ժողովրդական արտիստ Հրաչյա Գասպարյանը, ՀՀ ժողովրդական արտիստ Վահե Շահվերդյանը, ՀՀ արվեստի վաստակավոր գործիչ Ժիրայր Դադասյանը, ՀՀ արվեստի վաստակավոր գործիչ Վիգեն Ստեփանյանը, պրոֆեսոր Աննա Հեքեքյանը, թատերագետներ Նվարդ Ասատրյանը, Ռուզաննա Առաքելյանը:

Այս տարի ՀՀ Մշակույթի նախարարության աջակցությամբ «Արտավազդ» թատերական մրցանակաբաշխություն-փառատոնը կանցկացվի նաև Գորիսում՝ մարտի 29-ին:

Անահիտ Հակոբյան

Լուսանկարները` Հրանտ Մարինոսյանի