«Ֆանտաստիկ է». Թոմաս Անդերսի երևանյան համերգի հետաքրքիր պահերը

Էներգետիկ ռիթմերով, 1980-ականների շնչով ու պարային տրամադրությամբ կայացավ  «Մոդերն թոքինգի» մենակատար Թոմաս Անդերսի երևանյան համերգը, որը վայելելու էին եկել ոչ միայն հայեր, այլև մեծ թվով զբոսաշրջիկներ, հիմնականում հարևան երկրից` Իրանից։

Tert.am Life–ը ներկայացնում է երեկոյի հետաքրքիր մանրամասներն ու ֆոտոշարքը։

Թեև Թոմաս Անդերսը համարվում էր 80-ականների աստղ և դահլիճում մեծ թվով 50-ն անց մարդիկ կային, որոնք ակտիվ պարում էին, երիտասարդների պակաս էլ չէր զգացվում։ Նրանք բաց չէին թողել ծնողների լսած երգերը կենդանի հնչողությամբ վայելելու հնարավորությունը։ Համալիրի մեծ դահլիճի նստատեղերը քչերին պետք եկան։ Հանդիսատեսի մեծ մասը համերգը վայելեց կանգնած պարելով։ Քանի որ Թոմաս Անդերսի հիթային և ոչ այնքան հայտնի երգերի ռիթմերը բավականին նման են իրար, հանդիսատեսը պարեց, գրեթե, բոլոր երգերի ներքո։  

Թոմաս Անդերսը երգերը համեմում էր պատմություններով։ Նա պատմեց Հայաստան այցի, տպավորությունների մասին։ Երգչին շատ էր ոգևորել Երևանի եղանակը։ «Մինչև Երևան գալս համերգային շրջագայությամբ Ռուսաստանում էի։ Երբ եկա Հայաստան, ինձ դիմավորեց գարունը, ինչն ինձ շատ ուրախացրեց,  որովհետև ես ինձ ամառային մարդ եմ համարում: Համոզված եմ՝ ամառն էլ մեզ համար շուտ կգա»,– ասաց նա։

Երգիչը հիշեց, որ Հայաստանում եղել է 28 տարի առաջ։ «Հրաշալի է։ Ֆանտաստիկ զգացողություններ ունեմ: Այս առավոտյան եմ հասել Հայաստան։ Ամբողջ ճանապարհին մտածում էի, որ վերջին անգամ այստեղ եղել եմ 28 տարի առաջ։ Երջանիկ եմ, որ վերադարձել եմ: Շատ բան է փոխվել, բայց ձեր սերը մնացել է նույնը»,– նկատեց Անդերսը։

Երգիչը նշեց, որ արդեն 50 տարի է` բեմում է, այս ընթացքում շատ բան է փոխվել. փոխվել են նաև տեխնոլոգիական հնարավորությունները։ Նա նկատեց, որ սովորաբար հանդիսատեսն է իրեն նկարում, սակայն այսօր ինքն է ցանկանում նկարել հանդիսատեսին ու տեսանյութ նկարեց հայաստանյան լսարանի հետ։

Հայաստանում ամենաճանաչված երգերից մեկը`  You're My Heart, You're My Soul–ը Թոմաս Անդերսը կատարեց նոր գործիքավորմամբ` ակուստիկ հնչողությամբ, սակայն հայ հանդիսատեսը չէր կարող բաց թողնել նրան առանց լսելու սիրելի երգը հայտնի հնչողությամբ։ Մոտ մեկուկես ժամ տևած ելույթից հետո հանդիսատեսը ծափերով բաց չթողեց երգչին։ Վերջինս հայտնի երգը կատարեց նաև ռիթմիկ տարբերակով։ Նա իր վերջին ելույթի համար էր պահել նաև Cheri Cheri Lady հայտնի երգը, որը հանդիսատեսը լսեց մեծ ոգևորությամբ ու ջերմ ծափողջույններով ճանապարհեց երգչին։

 

«Մոդերն թոքինգի» խելահեղ համերգը Երևանում #yerevan #armenia #moderntalking #concert #tertamlife #news

Публикация от Tert.am Life (@life.tert.am) 27 Мар 2018 в 12:32 PDT

Լուսանկարները՝ Շաքե Հովհաննիսյանի