Տաթև Սարգսյանի նոր ֆոտոշարքը՝ պլաստիկ վիրահատության դիմելուց հետո

Դերասանուհի Տաթև Սարգսյանը նախորդ ամիս որոշեց փոփոխություն անել իր արտաքինում և վիրահատեց քիթը։ Վիրահատությունից հետո դերասանուհին մասնակցել է Tert.am Life–ի ֆոտոշարքին և պատմել, թե ինչու միայն հիմա որոշեց փոփոխություն անել։

«Տարիներ առաջ, երբ ինձ հարցնում էին՝ վիրահատության դիմելու մտադրություն չունե՞ս, պատասխանում էի, որ ինքս իմ լավագույն տարբերակն եմ:) Միշտ ինքնաբավ եմ եղել, մանկուց ծնողներիս կողմից շատ եմ լսել, որ ամենագեղեցիկն եմ, նաև միակ հայուհին էի դպրոցում, ինչն  ինձ ինքնավստահություն էր ներշնչում առանձնահատուկ զգալու համար։ Սակայն անցան տարիներ և հասկացա, որ կարող ես ավելի լավ զգալ քեզ, դա չի խոսում այն մասին, որ մեծ խնդիր ունես, պարզապես է՛լ ավելի նրբանկատ ես դառնում և փորձում ես թե՛ ներքին աշխարհի մեջ որոշ գծեր շտկել, թե՛ արտաքինդ ընդգծել,– ասաց Տաթևն ու խոստովանեց, որ, այնուամենայնիվ, եղել են պահեր, երբ կոմպլեքսավորվել է քթի ձևից։ –Չեմ թաքցնի, որ նկարահանման հրապարակում նեղվում էի պրոֆիլից նկարահանվել։ Դա ինձ լարվածության մեջ էր գցում և փոխանցվում էր նաև տեխնիկական խմբին։ Պրոֆիլից արված նկարներ ևս չէիք տեսնի իմ էջում»։

Դերասանուհուց հետաքրքրվեցինք` արդյոք հետագայում կփորձի պլաստիկ այլ միջամտությունների էլ դիմի. «Պլաստիկ վիրահատությունների մասին, իսկապես, ավելորդ կլինի մտածել։ Շատ հաճախ եմ լսում, իբրև թե, շրթունքներս բնական չեն, բայց երբ իրականում տեսնում են ինձ, հասկանում են, որ այդպես չէ։ Օրինակ դիմահարդարներն ինձ առաջին անգամ տեսնելիս միշտ ասում են` փաստորեն, իսկապես, շրթունքներդ լցրած չեն։ Կարծում եմ `մի փոքր ուշադիր լինելու դեպքում կարելի է տարբերել դա և անհեթեթ լուրեր, կարծիքներ չտարածել»։

Ֆոտոշարքի ժամանակ բացահայտեցինք, որ Տաթևը սարսափելի վախենում է բարձրությունից։ Որքան էլ անհավանական է հնչում, նա վախենում էր ներքև նայել նույնիսկ երկրորդ հարկից։ Իհարկե, չէինք կարող չբացահայտել, թե ինչն է պատճառը։ Պարզվում է այս վախի հիմքը գնում է դեպի մանկություն։ Ընդ որում, դա Տաթևի միակ վախը չէ։

«Փոքրը ժամանակ լունատիկ եմ եղել։) Մի անգամ, երբ գիշերը կրկին շրջում էի տանը, հայրիկս ինձ փրկել է աստիճաններից ընկնելուց։ Ինձ հետ քաշելու պահին արթնացա, աստիճանները բավականին բարձր էին։ Այդ պահին ինձ թվաց, թե երկնքից եմ նայում ներքև։ Այդքան շատ չեմ տրամադրվում, բայց, երբեմն, վախն իր մասին հիշեցնում է։  Մեր նախորդ զրույցում պատմել էի, որ նաև ջրից եմ վախենում, առհասարակ, խուսափում եմ լինել այնտեղ, որտեղ ինձ ամրապնդված չեմ զգում։ Եվս մի նաև սարսափելի վախ ունեմ կատուներից։ Դա մի ուրիշ ատելության խառնուրդ է։ Ամռանը սրճարաններում հանդիպումներս, երբեմն,  վերածվում են արկածների։ Երեկոն վայելելու փոխարեն շուրջ բոլորը ընկնում են կատուների հետևից, իսկ ես այդ ընթացքում վախից կարող է տուն հասած լինեմ։)»,– պատմեց նա։

Կյանքի այս փուլում Տաթևը ունի հստակ սկզբունքներ, որոնցով առաջնորդվում է։  «Հիմնավոր սկզբունքս միշտ եղել է չկորցնել սեփական անձի հանդեպ մեծ հարգանքը, որը թույլ չի տալիս խեղկատակի կերպարի վերածվել։ Պետք է պահել անհատականության կայծեր, որով քեզ տարբերում են մյուսներից։ Կարևոր չէ, թե մարդու անհատականությունն ինչում կարտահայտվի` ծիծաղի, հումորի զգացողության, մելանխոլիկ լինելու, թե վառ արտահայտված դիվանագիտական գծերի մեջ։ Սկզբունքներիդ համակարգում դա մեծ տեղ պետք է զբաղեցնի «լինելը»։ Կյանքիս այս շատ հաճելի շրջանում ավելացավ ևս մեկ սկզբունք` այլևս չասել ժամանակը կգա, ժամանակը միշտ կա, սովորաբար, այն գնում է։ Էլ չեմ ուզում ժամանակ տալ ո՛չ ինքս ինձ, ո՛չ մարդկանց։ Այլևս չեմ ուզում հասկանալ, սպասել, լռել, տեսնել կամ իմ մեջ աշխարհներ քանդել–հավաքել։ Ես վստահ եմ, որ «հիմա»–ն միշտ ճիշտ է, կյանքը շատ ճիշտ հերթականություն ունի, ինչը պետք է ժամանակին նկատես»,– նշեց նա։

Լուսանկարները՝ Johny Core-ի

Հագուստը՝ White Store-ի

Դիմահարդարումը՝ Լիլիթ Կոստանդյանի

Վարսահարդարումը՝ Արամ Թարվերդյանի

Նկարահանումներին աջակցելու համար շնորհակալություն ենք հայտնում Մանուկ Ալեքսանյանին և The Alexander հյուրանոցային համալիրին