«Չենք քարոզում չափն անցած պլաստիկ միջամտություններ». Մանե Գրիգորյանը՝ իր հաղորդման հասցեին հնչող քննադատությունների և նոր ֆոտոշարքի մասին

Հաղորդավարուհի Մանե Գրիգորյանը, ով տևական դադարից հետո վերադարձավ հեռուստաեթեր, նոր ֆոտոշարք է իրականացրել, որը տրամադրել է Tert.am Life-ին: Մեզ հետ զրույցում Մանեն նշեց, որ ֆոտոշարքն արել են Երևանում, կոնկրետ թեմատիկա ընտրված չի եղել:

Տեսախցիկի հետ աշխատելու փորձ ունեցող հաղորդավարուհին ֆոտոխցիկի օբյեկտիվում հայտնվել սիրում է, դա փաստում է հետաքրքիր ֆոտոշարքերի հաճախականությունը:

«Լուսանկարվել սիրում եմ, սիրում եմ նաև ինքս լուսանկարել, հատկապես, աղջկաս: Առհասարակ, ժամանակակից հեռախոսների հնարավորությունները մեզ թույլ են տալիս բաց չթողնել ամեն մի գեղեցիկ պահ։ Դա մեր ժամանակների շատ հաճելի առավելություններից է, ինչը, օրինակ, չեն ունենցել մեր ծնողները։ Ինչ վերաբերում է պրոֆեսիոնալ ֆոտոշարքերին, լուսանկարիչ Lon-ի հետ լավ ընկերներ ենք, երբ երկուսիս մոտ էլ «մուսան» գալիս է, փորձում ենք բաց չթողնել և հետաքրքիր նկարներ ունենալ ։ Շատ եմ սիրում աշխատել Lon-ի հետ՝ երիտասարդ, բայց շատ տաղանդավոր լուսանկարիչ է, որը Երևանը իր նկարներում է՛լ ավելի գեղեցիկ է ներկայացնում։ Վստահում եմ նրան. գիտեմ, որ արդյունքում կստանա այն, ինչը երկուսս էլ կհավանենք»։

Լուսանկարներում Մանեն ներկայացել է մի քանի հագուստներով: Դրանցից մեկը՝ թույլ, չընդգրկող կանաչ զգեստն է՝ համադրված սպորտային կոշիկների հետ: Հաղորդավարուհին նշեց, որ ոճն ընդգծելու մասին հատուկ չի մտածում, պարզապես, միշտ կրում է այնպիսի հագուստ, ինչն առաջին ակնթարթից իրեն գրավում է:

«Ոճը  ներքին զգացողություն է: Այն, թե ինչ կոշիկ կամ զգեստ ես կրում, կարող է ամբողջությամբ պատմել քո բնավորության, խառնվածքի, նախասիրությունների, աշխատանքի մասին։ Ընտրություն կատարելիս հեշտ եմ կողմնորոշվում: Ես կարող եմ շատ կարճ ժամանակում արագ հասկանալ, թե ինձ ինչ է պետք և կատարել ճիշտ գնումներ»,- ասաց նա:

Կար ժամանակ, երբ Մանեն դստեր՝ Կարինայի հետ, հաճախ էր ներկայանում միանման հագուստներով, ինչը գրավում էր շատերի ուշադրությունը և դառնում ընդօրինակման առիթ: «Այդ ժամանակ դա Երևանում  այդքան էլ տարածված չէր, ու մեզ շատ հաճախ, մեզ հենց այդպես էին ճանաչում, բայց նա արդեն մեծացել է։ Իհարկե, երբեմն, հենց ինքը ցանկանում, որ միանման հագնվենք, բայց, հիմնականում, արդեն ինքուրույն է հագնվում:) Քանի որ այս տարի դպրոց է գնալու, ինքս շատ եմ ցանկանում, որ նա ավելի ինքուրույն դառնա»,- ասաց Մանեն:

Մանեն եթերային 7 տարվա ընդմիջումից հետո կրկին ներկայանում է որպես հաղորդավարուհի «Առաջին ալիքի»՝ «Անկախ տարիքից» նախագծում, որը փորձում է օգնել կանանց վերագտնելու սեփական ոճը, ինքնավստահությունն ու գեղեցկությունը: Հաղորդավարուհուց հետաքրքվեցինք, թե հայ կանանց հետ շփումներն ի՞նչ են ցույց տալիս, նրանք բավականաչափ համարձա՞կ են արտաքին տեսքում փոփոխություններ անելու և իրենց գեղեցկությունն ընդգծելու հարցում. «Հայ կանայք ավելի լավն են, քան մենք բոլորս պատկերացնում ենք։ Այս ամիսների ընթացքում ես հասկացա, որ հայ կանայք վերջին տարիներին ոչ միայն կարողացել են իրենց ուսերին վերցնել կամ կիսել ընտանիք պահելու բեռը, այլև կարողացել են նրբանկատորեն այդ ամենն անել այնպես, որ նրանց կողքի հայ տղամարդիկ իրենց վատ չզգան։ Դա շատ կարևոր է։ Նրանք, իրոք, շատ ուժեղ են ու շատ համարձակ, այդ պատճառով արտաքին տեսքի փոփոխությունները մեծ խնդիրներ չեն առաջացնում նրանց համար»։

Ցանկացած նոր նախագծի դեպքում, հանրային կարծիքը միանշանակ չի լինում: Անդրադառնալով հաղորդման հասցեին հնչած քննադատություններին, թե իրենք խրախուսում են պարտադիր պլաստիկ վիրահատական միջամտություններ անել, քանի որ միայն այդ դեպքում է կինը դառնում ավելի գեղեցիկ, Մանեն նկատեց, որ իրենց պարագան այլ է, չեն կորցնում չափի զգացողությունը, որը շատ դեպքերում այսօր չի պահպանվում:

«Մենք չենք քարոզում արհեստական, չափն անցած, ցավոք, գուցե այդ պատճառով շատ քննադատված պլաստիկ միջամտությունները։ Մենք ներկայացնում ենք չափի մեջ, գրագետ «էսթետիկ օգնություն»։ Կարելի է ասել՝ էսթետիկ ոճաբանություն այն կանանց համար, ովքեր գուցե ունեն այդ «ռեսթարթի» կարիքը»,– ասաց նա։

Հարցին, ո՞րն է կանացի գեղեցկության գաղտնիքն, արդյոք ներքուստ ինքնաբավ ու երջանիկ լինելն արտահայտվում է կնոջ արտաքին տեսքում, Մանեն պատասխանեց. «Երբ կինը հանգիստ է, ինքնաբավ, չի նախանձում, չի բամբասում, չի չարախոսում, նրա աչքերը փայլում են, նրանից հանգստություն Է գալիս.... Ինձ թվում է` դա է կնոջ գեղեցկության գաղտնիքը»:

Լուսանկարները՝ Lon-ի