Սոնա Շահգելդյան. «Հիասթափվել եմ` բացահայտելով գործընկերներիցս շատերի դեմքերը»

Հայտնի մարդկանց մասին Tert.am Life-ի բացահայտումները շարունակվում են: Այս անգամ «Հայտնիների անհայտ կողմերը» խորագրում ներկայացնում ենք երգչուհի Սոնա Շահգելդյանին:

Սոնան կարծում է՝ իրեն մյուսներից կարելի է տարբերել անկեղծության մեծ չափաբաժնի շնորհիվ: Միշտ ասում է այն, ինչ մտածում է: Երգչուհին խոստովանեց, որ հասցրել է հիասթափվել՝ բացահայտելով գործընկերներից շատերի դեմքերը:

-Ո՞րն է  Ձեր բնավորության ամենաբնութագրական գիծը։

-Կարծում եմ՝ անկեղծությունը: Այն հոգու հայելին է, շատ լավ զգացվում է՝ ով է իրականում անկեղծ, ով՝ ոչ: Ամեն մարդու մեջ չէ, որ դա կա, այդպիսին ծնվում են: Ես շատ եմ նշել անկեղծություն բառը, ինձնից լսելով՝ շատ մարդիկ, լավ իմաստով, հասկացան այդ բառի նշանակությունն ու սկսեցին կիրառել այն:

-Ո՞րն եք համարում Ձեր ամենամեծ  թերությունը, որը, հնարավորության դեպքում, կուզեիք շտկել կամ վերացնել։

-Ամբողջ հոգով ու սրտով մարդկանց նվիրվելը: Թեև աստիճանաբար ուղղվում եմ, արդեն որպես ընկեր ընտրում եմ այն մարդկանց, ովքեր ինձ համապատասխան են: Ավելի լավ է լինեն քիչ թվով, բայց լավ որակով մարդիկ: Տարիների ընթացքում շատ բան եմ հասկացել, հասցրել եմ բացահայտել շատ մարդկանց իրական դեմքը թե՛ իմ բնագավառից, թե՛ առհասարակ: Իմ մեծ առավելությունն եմ համարում այն, որ կարողանում եմ դիմացինին ասել այն, ինչ մտածում եմ: Շատ մարդկանց դա չի հաջողվում:

-Կա՞ մի բան, ինչից վախենում  եք, անհաղթահարելի համարո՞ւմ եք այդ վախը։

-Իհարկե, վախեր բոլորս էլ ունենում ենք, բայց տարիքի հետ դրանք հաղթահարելը հեշտ է դառնում: Ինչ-որ բան կդժվարանամ առանձնացնել:

-Ի՞նչ հատկությամբ  կուզեիք  օժտված լինել։

-Օժտված եմ մեծ տաղանդով՝  լավ մարդ լինելով: Ես կուզեի շատ մարդկանց մոտ լիներ բարություն, ազնվություն: Դա բացակայում է ոչ միայն Հայաստանում, այլև ամբողջ աշխարհում:

-Որևէ գերբնական կարողությամբ կուզեի՞ք օժտված լինել։

-Չէ: Իմ կարծիքով, գուցե, արդեն գերբնական ուժով օժտվել եմ Աստծո կողմից: Նա ինձ տվել է երգելու տաղանդը: Ընդհանրապես, ես ունեմ կանխազգալու կարողություն. Հաճախ մայրս, ընկերներս ինձ ասում են՝ կարծես գուշակ լինես:

-Ի՞նչն է Ձեզ  ամենից շատ բարկացնում  հասարակության, մարդկանց մեջ։

-Նախանձը, չար լինելը, ինչպես նաև ձևականությունն ու օտարամոլությունը:  Քաղքենի մտածողությունն էլ կուզեի  վերացնել մարդկանց միջից:

-Հաճա՞խ եք մենակ մնալու հնարավորություն ունենում։ Ի՞նչի մասին եք մտածում, երբ  ինքներդ Ձեզ հետ մենակ եք մնում։

-Միայնակ մնալու և մտածելու ժամանակ հաճախ չի լինում: Բայց ես նման պահերին հիմնականում  մտածում եմ այն մասին, որ մեր ժողովուրդը լավ ապրի:

-Ի՞նչը կարող  է Ձեզ ստիպել հունից դուրս գալ, նյարդայնանալ։

-Շատ բաներ կան, օրինակ, վատ վերաբերմունքը երեխայի, բնության նկատմամբ: Ես դրանից կարող եմ բարկանալ: Ժամանակին, ավելի շատ բաներից էի նյարդայանանում, հիմա շատ բան ուղղակի անտեսում եմ, ծիծաղում: Ինձ բարկացնող շատ երևույթների մասին արտահայտվում եմ նաև ֆեյսբուքյան տիրույթում: Ես այն երգչուհին եմ, որը որևէ մեկից կախում չունի, ամեն ինչին հասել եմ ինձնով ու իմ ընտանիքի աջակցությամբ:

-Ի՞նչը կարող է խաղաղություն պարգևել Ձեզ նյարդայնացած ժամանակ, հակասթրեսը ո՞րն է:

-Հակասրթեսն արհամարհելն է ամեն վատ բան, երբեմն, նաև տվյալ մարդուն, որն ինձ նեղացրել է, դիպուկ պատասխան տալը, որպեսզի ինքն էլ խոցվի: Մեծ հաշվով, երբ ճանաչում եմ մարդկանց իրական դեմքերը, սկսում եմ արհամարհել նրանց, գրեթե, չեմ շփվում: Ինձ համար հակասթրես է նաև երգը:

-Ինչի՞ց կարող եք հիասթափվել։  Հասցրե՞լ  եք ունենալ խորը հիասթափություն։

-Իհարկե, հիասթափություններ ունեցել եմ, բայց հիմա ես դրան այլ կերպ եմ մոտենում: Պետք է հասկանաս, որ կյանքում  հիասթափություններն անխուսափելի են, բայց պիտի փորձես քո ճիշտը պահել, ազնիվ լինել ու առաջ շարժվել:

-Ափսոսանքի զգացողություն  հաճա՞խ եք ունենում, ինչի՞ համար եք ամենից շատ ափսոսում:

-Փառք Աստծո, ափսոսանքի զգացողոթյուն երբևէ չեմ ունեցել: Շատ մարդկանց համար մինչ օրս շատ բան եմ արել, երեսով տալ չեմ սիրում,  բայց դա փոխադարձ պետք է լինի: Իհարկե, ես դա արել եմ առանց պատասխան ակնկալելու, ոչ էլ PR-ի կամ ձևականության համար: Ամեն դեպքում, երբ իմ լավ արարքը չի գնահատվում, արհամարհում եմ ու անցնում առաջ: Միշտ ասում եմ՝ թող Աստված ամեն մեկին իր սրտի չափով տա:

-Ո՞վ կամ ի՞նչը կարող է ոգեշնչման աղբյուր լինել Ձեզ համար։

-Իմ շունիկն էր ինձ համար ոգեշնչման աղբյուր:  Ես շատ ուրախ էի նրա հետ: Նա միշտ կմնա իմ հոգում ու սրտում: Եթե անգամ վատ էի լինում, համբուրում էի ու հանգստանում: Նա ինձ համար նաև սփոփանք էր, շատ մարդկանցից ավելի հավատարիմ: Հիմա, երբ արդեն բալիկ ունեմ, նա է ոգեշնչում ինձ. Ես ապրում ու շնչում եմ նրանով:

-Եթե քաղաքական գործիչ լինեիք, ինչպիսի՞ն կլիներ Ձեր կարգախոսը։

-Չգիտեմ՝ կլիեի, թե ոչ, բայց կարգախոսս կլիներ հետևյալը՝ դուխով ու միշտ առաջ, միշտ հպարտ: Ես չեմ ընդունում, երբ ասում են՝  երգիչը քաղաքականություն չպետք է մտնի, հատկապես, եթե դու քո ժողովորդի մի մասնիկն ես, սիրում ես քո հայրենիքը:

-Իսկ կյանքում ունե՞ք կարգախոս, որով առաջնորդվում եք։

-Միշտ ասում եմ՝ մարդ պետք է մնա այնպիսին, ինչպիսին կա:

-Ունե՞ք իր, որը միշտ Ձեզ հետ է: 

-Շունիկիս լուսանկարը, քանի որ այլևս նա ֆիզիկապես ինձ հետ չէ: