Մաշա Մնջոյանը` հայտնի ազգականի հետ կապված պատմության և նրա մատանիով ֆոտոշարքի մասին

Երգչուհի Մաշա Մնջոյանը նոր ֆոտոշարք ունի, որի շրջանակում ներկայացել է ուժեղ ու ինքնավստահ բիզնես լեդիի կերպարով. Սա երգչուհու հերթական համագործակցությունն է իր մտերիմ ընկերոջ՝ լուսանկարիչ, երգիչ Ռոբերտ Քոլոյանի հետ: Մաշան առաջինը Tert.am Life-ին է տրամադրել լուսանկարներն ու բացահայտել հետաքրքիր պատմությունը, որը դարձել է նոր ֆոտոշարք անցկացնելու շարժառիթ:

«Ռոբերտի հետ արդեն 4 ֆոտոշարք ենք իրականացրել։ Յուրաքանչյուրն առանձնանում է մյուսից: Այս անգամ փորձել ենք ուժեղ ու ինքնավստահ լեդիի կերպար ստանալ: Լուսանկարներից մի քանիսն ավելի հանգիստ ու նուրբ գույների մեջ են արվել: Քանի որ ես ու Ռոբերտը շատ մտերիմ ենք, նրա հետ աշխատելիս ինձ ավելի ազատ եմ զգում: Այլ լուսանկարիչների հետ աշխատելիս փոքր-ինչ բարդութավորվում եմ: Այս պարագայում էմոցիաներս ցույց տալը շատ հեշտ է ստացվում, առանձնապես ջանք չեմ գործադրում տեսախցիկի առաջ համապատասխան հայացք ստանալու համար: Մեր ֆոտոշարքերը շատ ավելի լավ են ստացվում այն դեպքում, երբ ոչ թե ես եմ դիմում լուսնակարվելու խնդրանքով, այլ ինքն է տրամադրված ինձ լուսանկարելու, պատկերացնում է` կոնկրետ ինչ կերպարի պիտի ստանանք»,- ասաց Մաշան:

Երգչուհին նշեց, որ իր կերպարն ու հագուստները ինքնուրույն է մտածել, լուսանկարներից մեկում կրում է դիզայներ Վահան Խաչատրյանի հեղինակած թագը: Մեկ այլ լուսանկարում Մաշան ցուցադրում է մատանի, որը հետաքրքիր պատմություն ունի:

«Շատ էի ուզում այդ մատանիով լուսանկար ունենալ: Հենց այդ ցանկությունից ծնվեց նոր ֆոտոշարքի գաղափարը: Այն պատկանում է պապիկիս եղբորը, որը շատ հայտնի է եղել, ապրել է մեզ հետ: Մինչև հիմա Գյումրու մեր տանը պահպանվում են նրա անձնական իրերը՝ գրքերը, լուսանկարները: Ես դեռ ծնված չեմ եղել, երբ նա մահացել է, բայց շատ եմ լսել իր մասին: Այդ մատանին իր կյանքի ընթացքում միայն ինքն է կրել: Այն ինձ գրավել է ինչպես իր դիզայնով, այնպես էլ հանգամանքով, որ դա հենց իր ձեռքին է եղել: Հավատում եմ այն փաստին, որ մատանին իր մեջ որոշակի աուրա ունի այն մարդուց, որը դա կրել է: Որոշեցի այս կերպ թարմացնել նրա մասին հիշողությունը, մարդկանց հիշեցնել այդ անունը, թեև չեմ կարծում, որ ճանաչողներն իրեն մոռացած կլինեն»,-ասաց Մաշան և ավելացրեց, որ մատանին առօրյայում չի կրում, քանի որ իր մատին շատ մեծ է, այն պահում է որպես հիշողություն:

Երգչուհին ասաց, որ բազմաթիվ դրական արձագանքներ է ստացել նաև անծանոթ մարդկանցից, որոնք գնահատել են իր նոր ֆոտոշարքն ու տարբերվող կերպարը: Մաշայի խոսքով` առօրյայում տարբերվելու խնդիր իր առաջ չի դնում, բայց սիրում է երբեմն համադրել անհամադրելին ու հետաքրքիր ոճ ստանալ. «Իմ առօրյա ու բեմական հագուստների մեջ փորձում եմ տարբեր ոճեր համադրել: Հետևում եմ համաշխարհային նորաձևության միտումներին: Առօրյայում  փորձում եմ հնարավորինս հարմարավետ հագուստ ընտրել, բայց չեմ մոռանում հանուն գեղեցկության  բարձրակրունկներ հագնելու մասին: Ամեն դեպքում, երբեք չեմ ընտրում այնպիսի հագուստ, որը բացարձակապես կապ չունի ինձ հետ»:

Անդրադառանալով ստեղծագործական նորություններին՝ երգչուհին ասաց, որ այս փուլում արդեն նոր երգ է ձայնագրել, որի երաժշտության և գործիքավորման հեղինակը Նիկ Էգիբյանն է։ «Երգն անգլերեն է: Խոսքերը իմ ընկերներից մեկն է գրել Նիկի հետ: Շատ ռիթմիկ երգ է ստացվել, որն իմ հասակակիցներին հոգեհարազատ ոճի մեջ է: Արդեն ունենք մի քանի վիդեոներ, որոնք պետք է համադրենք ու ստանանք նոր տեսահոլովակ: Երևի թե, հուլիսին պատրաստ կլինի»,-եզրափակեց Մաշան:

Լուսանկարները՝ Ռոբերտ Քոլոյանի