«Նորաձևության թրենդը կուրորեն կրկնօրինակելով կնմանվես ծիծաղելի տիկնիկի». Աստղիկ Սաֆարյանի նոր ֆոտոշարքն ու ոճային համադրությունը

Աստղիկ Սաֆարյանը նոր ֆոտոշարք ունի, որի հիմքում Երևանի գեղեցկությունն ու առանձնահատկությունն իր հին ու նոր վայրերով ներկայացնելն է: Երգչուհին լուսնկարները տրամադրել է Tert.am Life-ին և խոսել  ֆոտոմոդելինգով զբաղվելու, նոր ֆոտոշարքի ոգեշնչման առիթի և ստեղծագործական նորությունների մասին:

Աստղիկը նկատեց, որ ֆոտոմոդելինգով զբաղվում է ինչպես Հայաստանում, այնպես էլ Բարսելոնայում: Նա ընդգծեց, որ լուսանկարչական օբյեկտիվի առաջ հայտնվելը բավարար չէ հաջողված լուսանկարներ ստանալու համար, պետք է տիրապետել որոշ նրբությունների:

«Ֆոտոմոդելինգը, անշուշտ, մոդելինգը չէ ամբողջությամբ, բայց այստեղ ևս պետք է տիրապետել գործի նրբություններին, հասկանալ` ինչպես ճիշտ աշխատել լուսանկարչի հետ, որ ռակուրսում ինչպես ճիշտ ներկայանալ և այլն»,-ասաց երգչուհին:

Աստղիկի խոսքով` իր նոր՝ երեք ֆոտոշարքերում նպատակ է ունեցել ներկայացանելու Երևանն իր ողջ գեղեցկությամբ: Երգչուհին հասցրել է լուսանկարվել աշխարհի տարբեր երկրներում։ Ըստ նրա` երևանյան հմայքն էլ պետք է ներկայացանել ըստ արժանվույն, ինչու չէ, այդ կերպ նաև նպաստելով մեր երկրում զբոսաշրջության զարգացմանը:

«Շատ ֆոտոշարքեր եմ ունեցել աշխարհի տարբեր գեղեցիկ վայրերում, ինչպիսիք են Փարիզը, Բարսելոնան, Հռոմը, Միլանը, ծովափնյա երկրներ և այլն: Ամեն մեկում էլ ներկայացվում էր տվյալ քաղաքի գեղեցկությունը և յուրահատկությունը։ Վերջին ֆոտոշարքերս միտում ունեն ներկայացնելու Երևանի գեղեցիկ վայրերը՝ Հաղթանակի այգին, Հին Երևանը` Կոնդը, Հյուսիսային Պողոտան, ամենագեղեցիկ Կասկադը, մեր հին ու մոռացված, բայց այլ ազգի մարդկանց կարծիքով` շատ յուրահատուկ վայրերը։ Չէ՞ որ դրանք ևս շատ հատուկ են և արժե կարևորել, ինչու՞ ոչ։ Դա էլ մերն է, մեզ պես հանրային մարդիկ պետք է լավագույնս ներկայացնեն այն, որպեսզի բազմահազար այլազգի հետևողների մոտ հետաքրքրություն առաջացնենք մեր Երևանի հանդեպ և նրանց ոգեշնչենք, որ հաճախ այցելեն Հայաստան, տեսնեն գեղեցիկ Երևանի առանձնահատկությունները»,-ասաց նա:

Երգչուհու վերջին երկու ֆոտոշարքերն իրականացրել է երիտասարդ լուսանկարիչ Տաթև Մովսիսյանը, երրորդը` լուսանկարիչ Արթուր Վարդանյանը. «Արթուրի հետ առաջին անգամ աշխատել եմ դեռ 2008-ին:  Իմ առաջին գեղեցիկ ֆոտոշարքերի լուսանկարիչներից մեկը հենց նա է եղել։ Ուրախ էի մոտ 10 տարի անց նորից համագործակցել իր հետ: Մեր համագործակցությունը միայն այս ֆոտոշարքով չի սահմանափակվել։ Շուտով նոր աշխատանաքներ էլ կներկայացնեմ»:

Աստղիկը նշեց, որ հիմնականում իր ֆտոշարքերում ոճային համադրությունն ինքն է անում։ Այս անգամ էլ բացառություն չի եղել: Սեփական ոճն ընդգծելու հարցում երգչուհին կարևորում է նորաձև լինելու հետ մեկտեղ սեփական տեսակին համահունչ հագուստ կրելը։ «Նորաձևության հանդեպ իմ աչքը միշտ բաց է, բայց ավելի կարևոր է, որ նորաձև թրենդի շրջանակում կարողանաս գտնել քոնը, թրենդը համատեղես քո ոճային մտքերի, տեսակի և բնույթի հետ։ Միայն նորաձևության թրենդը կուրորեն «կրկնօրինակելով», կարող ես նմանվել ծիծաղելի տիկնիկի, որը կրում է մի բան, որն իրականում իր ներսում չկա։ Դա բացահայտ երևում է, հատկապես, ոճից հասկացող մարդկանց աչքին: Այնպես որ, այս հարցում ևս պետք է զգույշ լինել: Նորաձևությունը, առհասարակ, շատ նուրբ է և պահանջում է նույնքան նուրբ մոտեցում,- ասաց երգչուհին և ավելացրեց, որ հատուկ ոչինչ չի անում տարբերվելու համար,- Միգուցե տարբեր լինեն իմ ոճային մտքերը, համադրությունները, անհրաժեշտության դեպքում` նաև մինիմալիզմը, բայց ես միշտ ներկայանում եմ այնպիսին, ինչպիսին կամ։ Հաճելի է, որ շատերը դա ամեն անգամ «տարբեր» են անվանում:)»:

Երգչուհին շուտով ևս մեկ նոր ֆոտոշարք կներկայացնի: Խոսելով ստեղծագործական նորությունների մասին՝ Աստղիկն ասաց, որ երկրպագուներին երկար սպասեցնել չի տա: Նա նշեց, որ համերգային ծրագիր է պատրաստում, որով կներկայանա տարբեր վայրերում:

Ամառային հանգստի մասին երգչուհին առայժմ չի մտածել: Ասում է ՝ դեռ անավարտ գործեր ունի. «Դրանք ավարտին հասցնելուն պես, հավանաբար, կմեկնեմ իմ երկրորդ տուն դարձած Բարսելոնա: Բոլոր ընկերներս արդեն սպասում են ինձ, մինչ այդ վայելում եմ երևանյան գեղեցիկ ամառը»:

Լուսանկարները՝ Տաթև Մովսիսյանի և Արթուր Վարդանյանի