«Հարսանիք թիկունքում» ներկայացման աննախադեպ հաջողությունը, տոմսերի բարձր արժեքն ու երևանյան պրեմիերան

Այն, ինչ կատարվում է պատերազմի դաշտում, հաճախ է նյութ դառնում ֆիլմերի, ներկայացումների համար, իսկ ի՞նչ է լինում թիկունքում, որը պակաս պատերազմող չէ, ունի մի շարք մարտահրավերներ, հագեցած է հույզերով ու ծանր ապրումներով. Գյումրու Վարդան Աճեմյանի անվան դրամատիկական թատրոնում վերջերս կայացավ  «Հարսանիք թիկունքում» ներկայացման պրեմիերան, որը կարճ ժամանակում արժանացավ հանդիսատեսի ուշադրությանը։ Այսօր սպասվում է ներկայացման երևանյան պրեմիերան, որին նախորդած ասուլիսին ներկա է եղել Tert.am Life–ը։

1 ամսվա ընթացքում ներկայացումը հասցրել է ունենալ 10 հազար հանդիսատես և Գյումրին, դարձնել մշակութային կենտրոն, ուր Հայաստանի տարբեր քաղաքներից մեկնում են ներկայացում դիտելու։

«Ժամանակին մարդիկ գալիս էին Գյումրի` ներկայացում նայելու, լավ երաժշտություն լսելու։ Ցավոք, որոշ ժամանակ սկսեցին գալ միայն քյալա ու խաշ ուտելու։ Հիմա վստահ եմ, որ հին  ժամանակները վերականգնվելու են։ 1 ամսվա ընթացքում 10 հազար հանդիսատես ունենալը կարևոր ցուցանիշ է, որ կարողանանք ներկայացման համար ծախսված գումարը 1 ամսում կրկնակի հետ վերադարձնել»,– ասաց Գյումրու դրամատիկական թատրոնի տնօրեն Տիգրան Վիրաբյանն ու նկատեց, որ լավ PR–ը կարող է լսարան ապահովել մինչև առաջին 2 ներկայացումը, այնուհետև որոշիչը  մարդկանց արձագանքներն ու ստացած տպավորություններն են։

Ստեղծագործական թիմը պատրաստվում է ներկայացումը  խաղալ նաև Արցախում և Սփյուռքում։ Փոքր–ինչ դժվարություններ կան կապված դեկորների հետ, քանի որ դեկորներ պետք է պատրաստվեն տվյալ թատրոնների բեմերին համապատասխան։ Այդուհանդերձ շրջագայություն նախատեսում են։

Երևանում նրանք մի քանի ներկայացում ենք խաղալու, որոնց տոմսերն արդեն սպառված են։ «Հյուրախաղային տոմսերի արժեքը բավականին բարձր է` 2000-5000 դրամ։ Սա մարզային թատրոնի` մայրաքաղաքում ներկայանալու համար աննախադեպ գին է, երբեք չի կիրառվել, սակայն ներկայացման հանդեպ եղած  մեծ ուշադրությունն ինձ ու Վարդան Մկրտիչյանին ստիպեց ընտրել գնային այս քաղաքականությունը։ Առաջին 2 ներկայացումների տոմսերը վաճառվեցին այն ժամանակ, երբ  դեռ չէինք սկսել գովազդային արշավը»,– ոգևորությամբ հայտնեց Տիգրան Վիրաբյանը։

Ներկայացման հիմքում մի ընտանիքի պատմություն է, որի միջոցով ներկայացվում է այն, ինչ կատարվել է Ապրիլյան պատերազմի թիկունքում: Դրամատուրգ Անահիտ Աղասարյանի՝ «Ապրիլ և ապրել» պիեսը գրվել է Գյումրու դրամատիկական թատրոնի պատվերով: Ներկայացման  ռեժիսորը Լյուդվիգ Հարությունյանն է, վերջինս առանձնացրեց պատերազմի հերոսների ծնողների արձագանքները։

«Ներկայացումներին հրավիրում էինք պատերազմի հերոսների հարազատներին, թեև հասկանում էինք, որ իրենց համար բարդ է դիտել այն։ Առաջնախաղից հետո մեզ մոտեցան տղաներից մեկի` Հրաչի մայրն ու ասաց` շնորհակալ եմ, որ տղայիս մասին բեմադրութուն եք արել, ասացի` Ձեր տղան մեզ համար հերոս է, բայց ներկայացումը ոչ թե իր, այլ հերոս մոր մասին է։ Յուրաքանչյուր ծնող ներկայացումը դիտելուց հետո ավելի է ոգևորվում։ Ես ուրախ եմ, որ ծնողները հպարտությամբ ու չկոտրված են դուրս գալիս դահլիճից։ Դա է եղել իմ խնդիրը»,– նկատեց ռեժիսորը։

Տիգրան Վիրաբյանն ընդգծեց, որ «Արմենիա TV»–ն նկարահանելու է ներկայացումը. «Իհարկե, մոտ ժամանակներս այն չի ցուցադրվի, սակայն լավ է, որ մենք կրկին ունենք ներկայացումների հեռուստատեսային տարբերակներ։ Ժամանակին հեռուստաթատրոնը շատ  սպասված էր, հիմա փորձում ենք ներկայացումները կրկին բերել հեռուստատեսություն»։

Ներկայացման երաժշտությունը գրել է Հայկոն, որը ներկա է եղել բոլոր փորձերին։ Արդյունքում ստացվել է այնպիսի երաժշտություն, որը լրացնում է ներկայացումը։ Նույնիսկ Տիգրան Մանսուրյանը երաժշտությունը լսելուց հետո արցունքոտ աչքերով Հայկոյին ասել է՝ շնորհավորում եմ քեզ, տղաս, դու ֆանտաստիկ երաժշտություն ես գրել այս ներկայացման համար: